Виктор Ан “Дохсун” спорткомплексыгар баҕалаахтарга шорт-треккэ маастар-кылаас биэриэ.
Олимпиада 6 төгүллээх чөмпүйүөнэ Виктор Ан шорт-треккэ маастар-кылаас көрдөрүө. Ким баҕалаах кэлэн истиэн-билиэн сөп.
“От ыйын 4 күнүгэр Виктор Аны күүтэбит. Кини Арассыыйа хаҥкынан сүүрээччилэрин сойууһун салалтатын кытта кэлиэ. Маастар-кылаас бу күн иккис аҥаарыгар “Дохсуҥҥа” буолуоҕа. Кимиттэн-тугуттан тутулуга суох, ким баҕалаах кэлэн ааттаах-суоллаах спортсмен сүбэтин ылыан сөп”, -- диир Саха сирин спорка миниистирин солбуйааччы Александр Бугаев.
Бугаев ону тэҥэ биэдэмистибэ Арассыыйа хаҥкынан сүүрээччилэрин сойууһун кытта бииргэ үлэлэһии туһунан Сөбүлэһии түһэрсэрин эттэ.