Киирии

Киирии

“Кросс наций” тэрээһин чэрчитинэн, Южно-Сахалинскай куоракка, балаҕан ыйын 15 күнүгэр, “Азия оҕолоро” норуоттар икки ардыларынааҕы спорт оонньууларын былааҕын үөрүүлээх быһыыга-майгыга Саха сириттэн Сахалиҥҥа тиэрдии сиэрэ-туома ыытылынна.

Южно-Сахалинскай аэропордуттан бочуот караула арыаллаах былааҕы куорат киин болуоссатыгар – Кыайыы болуоссатыгар уобалас бастакы салайааччыларыгар туттардылар.

“Бу бырааһынньык чөл олоҕу тылынан эрэ буолбакка, дьиҥнээх дьайыынан олоххо киллэрэр дьону түмэр. Биһиги эрэгийиэммитин чахчы даҕаны спорду өрө тутар гына оҥордубут, ол туоһутунан “Азия оҕолоро” норуотар икки ардыларынааҕы аан бастакы кыһыҥҥы оонньууларын ыытар чиэстэннибит. Бу оонньуулар Сахалин уобалаһыгар уонна Курил арыыларыгар спорду эрэ буолбакка, туризмы сайынарыыга төһүү буолуоҕа. Тэрээһин үрдүк таһымнаахтык ыытылларыгар саарбахтааһын суох ”, - диэн Сахалин уобалаһын бэрэссэдээтэлин солбуйааччы Антон Зайцев мустубут дьоҥҥо эттэ.

“Азия оҕолоро” норуоттар икки ардыларынааҕы эмитиэтин бэрэсидьиэнэ Дмитрий Глушко Сахалин уобалаһын спортивнай инфраструктурата үрдүк таһымнааҕын бэлиэтээтэ уонна кэлэр оонньуулартан кынаттанан дойдуну аатырдар улахан спортсменнар тахсыахтара диэн эттэ.

“Азия оҕолоро” былааҕын туттарар бочуотунай миссияны оонньуулартан кынаттанан тахсыбыт аатырбыт спортсменнар, Европа уонна аан дойду чөмпүйүөннэрэ – Леонид Спиридонов (көҥүл тустуу), Михаил Гюнтер (баскетбол), Гаврил Цыпандин (хотугу многоборье) уонна Светлана Тарнайкина (тхэквандо) толордулар.

Кинилэр Сахалин спортсменнарыгар маастар-кылаастары көрдөрүөхтэрэ. Бырааһынньык түмүгэр Сахалин уобалаһын көмүскүүр спортсменнары ааттыахтара. Тиэрдиллибит былааҕы “Азия оҕолоро” I кыһыҥҥы оонньуулар үөрүүлээх аһыллыытыгар диэри “Кристалл” спорт Дыбарыаһыгар харайыахтара. Оонньуулар үөрүүлээх аһыллыыта 2019 сыл олунньу 8 күнүгэр “Спартак” стадиоҥҥа буолуоҕа.

Тарҕат:

Комментарии

Защитный код Обновить