Киирии

Киирии

“Ханна да тиийдэрбин саарбахтыы, толкуйдуу сылдьыбаппын, ыллым да тиһэҕэр тиэрдэбин”-, диир Сунтаартан төрттээх Владимир Данилов. Кини көҥүл тустууга Арассыыйа спордун маастара. 

- Владимир, бэйэҥ тускунан сырдата түс, хантан сылдьаҕыный?

- Мин төрдүм – Сунтаар. Онно оҕо сааһым ааспыта. Оскуолаҕа үөрэнэр сылларбар олус сытыы, хайдах да биир сиргэ түптээн олорбот, оҥой-соҥой көрбүт оҕо этим. Ыал улахан оҕотобун, бииргэ төрөөбүт балтылаахпын.

-Хайдах тустуу эйгэтигэр киирбиккиний?

-Биһиги төрдүбүтүгэр күүстээх дьон бааллар үһү. Тустууну саҕалаабыт хос-хос эһэм Тихон Кириллович Иванов буолар. Кини Аҕа Дойду сэриитин кыттыылааҕа, хапсаҕайдьыт. Киниттэн сиэттэрэн биһиги аймах тустууну сэҥээрэбит, бырааттарым, балтыларым эмиэ тусталлар. Аҕам Николай Романович Данилов Арассыыйа спордун маастара, хапсаҕайга Саха сирин спордун маастара. Кини Сунтаарга тириэньэрдиир. Балтым Диана оҕунан ытыынан утумнаахтык дьарыктанар. Биир тастыҥ балтым Герда кыргыттарга аан дойду таһымнаах күрэхтэргэ ситиһиилээхтик тустар. Бэйэм спортка оҕо эрдэхпиттэн олус чугаспын. Онон тустууну талбыппыттан улаханнык сөхпөппүн. Тоҕо чуолаан тустууну талбытым туһунан санаабатаҕым.

- Тустуу элбэх сыраттан тахсар. Инньэ гынан , кытаанах характердаах киһи ылсар дьарыга буолуохтаах. Эйиэхэ ким сүбэ-ама буоларый?

- Миигин куруук өйүүр-өйдүүр дьоммунан төрөппүттэрим буолаллар. Маны таһынан куруук аттыбар баар доҕотторум көмөлөһөллөр.

-Тас дойдуларга эҥин дьарыктана сылдьан тириэньэрдэр тус-туһунан үөрэтэр ньымалардаахтарын бэлиэтээбит буолуохтааххын. Кинилэр сүрүн кистэлэҥнэрэ тугуй?

-Туох кистэлэҥэ кэлиэй, арай тас үлэ ньымата атын буолуон сөп. Тириэньэр үлэтэ диэн чыҥха атын буоллаҕа. Туораттан көрдөххө чэпчэки курдук эрээри, саамай уустуга – спортсмен тириэньэр эрэлигэр киириитэ буолар. Кини эппитин хайаан да толорон иһиллиэхтээх. Тириэньэр этиитэ – сокуон.

-Атын сиргэ дьарыктанар туох уратылааҕый?

-Улахан уратыта суох, арай атын омуктары кытта тустар интэриэһинэй.

Danilov

- Биирдэ эмэ «кэбис, тустан бүтүүһүкпүн» диэн санаалар киирэллэр дуо?

- Хас биирдии спортсмеҥҥа маннык быстах санаа киирэрэр буолуо дии саныыбын. Дьарык көрдөрүүтэ, түмүгэ суох буоллаҕына, кыайтарыы хомолтотугар куустардахха араас санаа киирэн ылар. Маннык түгэҥҥэ чугас дьоммун кытары кэпсэттэхпинэ уоскуйабын. Оччоҕуна ол санааларым тута суох буолаллар. Эһэм кыра эрдэхпинэ “туохтан да толлон турума, инниҥ хоту чаҕыйбакка, харса суох баран ис” диэн эппит тылларын саныы биэрэбин.

- Кистэлэҥ буолбатах буоллаҕына кэрэ аҥардааххын дуо?

- Таптыыр уонна таптатар дьүөгэлээхпин. Мин куруук айаҥҥа сылдьарбын сөбүлээбэт курдук этэ, кэлин өйдөөбүтэ. Таах мээнэ күүлэй тэбэ барбаппын билэр.

-Иллэҥ кэмҥин хайдах атаараҕын?

Иллэн кэммэр доҕотторбун кытта көрсөбүн уонна үөрэхпэр улахан болҕомтону уура сатыыбын. Мин ХИФУ физкултуура уонна спорт институгар үөрэнэбин.

-Спорду сэҥээрээччилэргэ тугу этиэҥ этэй?

- Эккитин-сииҥҥитин куруук эрчийиҥ, үүнүҥ сайдыҥ, бэйэҕитин сайыннарыҥ, доруобуйаҕытын харыстааҥ.

Айталыына Иванова кэпсэттэ.

Тарҕат:

Ырытыыгын суруй

Защитный код
Обновить

Бүтэһик сонуннар