Киирии

Киирии

Тохсунньу 19 күнүгэр Баһылай Манчаары аатынан “Модун” спорт национальнай көрүҥнэрин киинигэр өрөспүүбүлүкэ биллэр мадьыныларыгар эрчиллэр хомуур хамаандалар икки ардыларыгар “Офсет” хампаанньа кубогар сытыы киирсиилэр буолуохтара.

Дария, Алексей Скобелевтар салайар “Офсет” рекламнай-бэчээттиир кииннэрин көҕүлээһининэн, тэрийиилэринэн уонна спонсорынан ыытыллар күрэххэ 8 бастыҥ хамаанда күөн көрсүөҕэ: Анатолий Баишев салайар “Амикан” спорт кулууба, Алексей Агапов салайар “Батас” спорт кулууба, Уйбаан Белолюбскай салайар “Боотур” СК, Николай Константинов салайар “Модун” СК, Егор Кудрин салайар “ХИФУ” СК, Петр Бурнашев салайар “СУ-77” СК, Петр Давыдов салайар “Тайм” СК уонна Николай Дьяконов салайар “Эҥсиэли” СК.

of1

Бырагыраама быһыытынан күн бастакы аҥарыгар кыттааччылары бэлиэтээһин уонна ыйааһыннааһын буолуоҕа. Онтон күнүс 13 ч. саха эстрадатын ырыаһыттара кыттыылаах күрэх үөрүүлээх аһыллыыта буолар. 14 ч. барыллаан киирсиилэр, онтон 17 ч. финал киирсиилэрэ буолар. 18 ч. Кубок үөрүүлээх сабыллыытыгар кыайыылаахтар ааттаныахтара. Манна “Офсет” хампаанньа туруорбут кылаан бирииһэ – 100 тыһ. солк. уонна көһө сылдьар Кубок хаһаайыннара ааттаныахтара. Күрэхтэһиини көрө киирии буор-босхо. Инньэ гынан, бу күн саха национальнай көрүҥүн таптааччыларга умнуллубат бырааһынньык буолуоҕа.

Санатар буоллахха, өрөспүүбүлүкэ мас-тардыһыытын вице-бэрэсидьиэнэ, “Офсет” салайааччыта Алексей Скобелев төрүттээбит уонна тэрийэр Кубога иккис төгүлүн үрдүк таһымнаахтык ыытыллыаҕа.

of2

Быйылгы Кубогы былдьаһыыга мадьынылар биир эрэ ыйааһыҥҥа кыттар бырааптаахтар. Уопсайа 5 ыйааһыҥҥа илин-кэлин түсүһүүлэр буолуохтара: 60 кг дылы, 70 кг дылы, 80 кг дылы уонна 90 кг үөһэ. Күрэхтэһии хамаанданан буолуоҕа уонна мас-тардыһыытын норуоттар икки ардыларынааҕы федерациятын быраабылатынан (“стенка на стенку”) ыытыллыаҕа. Кубокка өссө кыттыан баҕалаах хамаандалар сайаапкаларын тохсунньу 16 күнүгэр дылы Киров уул., 20/1, 63 кэб. ( “Б. Манчаары аатынан РЦНВС”) мас тардыһыытын сайыннарар отделга ылаллар. Сиһилии 32-50-64 төл. билсиҥ.

Яна Байгожаева, “Офсет” РИЦ СМИни кытары үлэлэһэр уонна сайыннарар салаатын салайааччы.

Тарҕат:

Комментарии

Защитный код Обновить