Киирии

Киирии

Олунньу 19 күнүгэр Бырабыыталыстыба дьиэтигэр, “Азия оҕолоро” бастакы кыһыҥҥы оонньуулар призердарын уонна кыттыылаахтарын чиэстээтилэр.

““Азия оҕолоро” оонньуулар призердара Арассыыйа, Аан дойду уонна Олимпийскай оонньуулар чөмпүйүөннэринэн буолбуттара. Онон, бастакы кыһыҥҥы оонньууларга кыттыы инникитин улахан кыайыыларга кынаттыа диэн эрэнэбин”, – диэн СӨ спордун миниистирэ Иннокентий Григорьев эҕэрдэлээтэ.

Саха сирин хамаандатыттан 117 киһи кыттыыны ылла. Олортон 75 спортсмен, 17 тренер, хамаандалар алта салайааччылара, сэттэ бэрэстэбиитэллэрэ, икки психолог, үс быраас, биэс исписэлиис, биир суруналыыс уонна  сүүмэрдэммит хамаанда салайааччыта. Чуолаан Алдан, Нерюнгри, Амма, Мэҥэ-Хаҥалас уонна Ленскэй оройуонуттан спортсменнар кытыннылар.

““Азия оҕолоро” бастакы кыһыҥҥы оонньууларга кыттыы олус долгутуулаах уонна эппиэтинэстээх этэ. Тоҕо диэтэххэ, өрөспүүбүлүкэбит эрэ буолбакка, бүтүн дойдубут аатыттан кытынныбыт. Барыта этэҥҥэ ааста. Бириистээх миэстэлэри ылбыппытыттан олус үөрэбит. Биһиги кыайыыбыт улахан өҥөтө тренердэр үлэлэрэ буолар. Бу – улахан кыайыыларга бастакы хардыылар. Онон, инникитин улахан күрэхтэһиилэртэн кыһыл көмүс мэтээллэри аҕалыахпыт диэн эрэнэбин”, – диэн ““Азия оҕолоро” кыһыҥҥы оонньуулар үрүҥ көмүс мэтээл хаһаайына Илья Заворотных эттэ.

Ил Дархан Айсен Николаев махтал суругунан уонна харчылаах сэртипикээттэринэн Илья Заворотных, Владислав Парфенов  уонна Анастасия Ткаченко наҕараадаланнылар. Кинилэр икки нэдиэлэнэн Хабаровскай кыраайга Комсомольск-на-Амуре куоракка хайыһарга күрэхтэһэ барыахтара.

 Андрей Сорокин СИА хаартыскалара

 

Тарҕат:

Комментарии

Защитный код Обновить