Айдааннаах, Арассыыйа туһугар атаҕастабыллаах Олимпиада түмүктэннэ. Өскөтүн 4 сыллааҕыта “допиннаах” Сочига Арассыыйа сүүмэрдэммит хамаандата кими да илиилээх-атахтаах оҥорбокко аҥаардастыы айбардаабыт эбит буоллаҕына, билигин балаһыанньа лаппа атын.
Өскөтүн олимпиадаҕа барыта 102 мэтээл кэмпилиэгэ оонньоммут эбит буоллаҕына, хамаанданан ааҕыыга Арассыыйа 2 кыһыл көмүс, 6 – үрүҥ көмүс, 9 боруонса мэтээли ылан 13-с миэстэнэн муҥурданна. Бастакы миэстэни Норвегия (14 кыһыл көмүс, 14 үрүҥ көмүс, 11 боруонса), иккиһи – Германия (14-10-7), үсүһү Канада (11-8-10) ыллылар. Салгыы АХШ (9-8-6), Нидерланд (8-6-6), Швеция (7-6-1), Соҕуруу Кэриэйэ (5-8-4), Швейцария (5-6-4), Франция (5-4-6), Австрия (5-3-6), Япония (4-5-4), Италия (3-2-5), Арассыыйа (2-6-9), Чехия (2-2-3), Белоруссия (2-1-0) кэлэллэр.
Арассыыйа бэйэтин устуоруйатыгар кыһыҥҥы олимпиадаҕа хаһан да итинник мөлтөхтүк кытта илигэ. Холобур, бу иннинэ саамай быстар мөлтөх көрдөрүүлээҕинэн, “провалынан”, 2010 с. Ванкуверга буолбут олимпиаданы ааҕарбыт. Онно Арассыыйа 3 кыһыл көмүс, 5 үрүҥ көмүс, 7 боруонса мэтээли ылбыттааҕа.
