Арассыыйа сүүмэрдэммит хамаандатыттан Степанида Артахинова биирдиилээн, хамаанданан уонна “микс” диэн пааранан күрэстэһиигэ кыайыыны ситистэ.
Муус устар 28-тан ыам ыйын 5 күнүгэр диэри Италия Олбия куоратыгар оҕунан ытыыга Европа Кубогын күрэстэһиитэ буолан ааста. Манна аан дойду элбэх төгүллээх чөмпүйүөнэ, Арассыыйа спордун үтүөлээх маастара Степанида Артахинова бастакы түһүмэҕи ситиһиилээхтик түмүктээтэ. Ол курдук, биирдиилээн уонна Бурятия спортсменын Баир Шигаевы кытта пааранан күрэстэһиигэ бастаата. Өссө биир кыһыл көмүс мэтээли хамаанданан турнирга ылла. Кинини кытта дойду сүүмэрдэммит хамаандатын чиэһин Хабаровскай кыраайтан Нонна Александрова уонна Бурятияттан Татьяна Андреевская көмүскээтилэр.
Бу күрэстэһии бэс ыйын 3 күнүгэр Голландия Хортегенбош куоратыгар буолуохтаах Аан дойду чөмпүйэнээтигэр бэлэмнэнии курдук буолар. Манна 2020 сылга буолар Паралимпийскай оонньууларга квоталар бэриллиэхтэрэ. Аан дойдутааҕы олимпийскай кэмитиэт (МОК) быһаарыытынан, кэлэр сылга Токиоҕа оҕунан ытыыга доруобуйаларыгар хааччахтаах спортсменнар пааранан күрэстэһиигэ эрэ кыттыахтара. Ол аата дойду сүүмэрдэммит хамаандатыгар биир дьахтар уонна биир эр киһи эрэ киирэр кыахтаахтар. Бу туһунан “Спорт Якутии” хаһыакка оҕунан ытыыга Саха сирин сүүмэрдэммит хамаандатын сүрүн тренерэ, Степанида Артахинова тус сүбэһитэ Андрей Иксман кэпсээтэ.
Европа Кубогын иккис түһүмэҕэ от ыйыгар Чехия Нове-Место диэн куоратыгар буолар. Оттон үһүс түмүктүүр түһүмэх атырдьах ыйыгар Берлиҥҥэ ыытыллыаҕа
