Киирии

Киирии

Бэс ыйын 9-14 күнэригэр Казахстан Нур-Султан куоратыгар диализ көмөтүнэн сылдьар уонна уорганнарын көһөртөрбүт спортсменнар ортолоругар Национальнай спорт оонньуулара ыытылыннылар.

Бу күрэххэ Саха сирин спортсменнара бэрт ситиһиилээхтик кыттан кэллилэр. Өрөспүүбүлүкэтээҕи инбэлииттэр уопсастыбаларын чилиэнэ, диализниктар уонна көһөрүү уорганнаах ыараһахтар (трансплантация) ячейкаларын бэрэссэдээтэлэ, Аҕа Лигатын чилиэнэ, диализниктар ортолоругар чэпчэки атлеткаҕа Европа призера, урбаанньыт Гаврил Чемоханов оонньуулар тустарынан санаатын үллэстэр:

— Бу спорт тэрээһинэ бэрт таһымнаахтык ыытылынна. Ымпыгар-чымпыгар тиийэ барытын учуоттаабыттар. Соһуйуоҥ иһин, спортсменнар үгүстэрэ 1-кы уонна 2-с курууппалаах инбэлииттэр. Күрэх сүрүн тэрийээччитэ Жанибек Успанов бэйэтэ эмиэ сүрэҕин көһөртөрбүт.  Кини Хельсинки куоракка (Финляндияҕа) Европа чөмпүйэнээтигэр сылдьан баран бу тэрээһини оҥорор туһунан санаабыт уонна дьэ, ылсан тэрийдэ. Кини хас биирдии инбэлииккэ спорт саамай сүрүн реабилитация буоларын чопчу өйдүүр. Күрэхтэһиигэ сүүстэн тахса спортсмен тоҕуоруста. Маннык тэрээһиннэргэ сылдьан инбэлииттэр олоххо тардыһыылара күүһүрэрэ, санаалара уларыйара саарбаҕа суох. Жанибек этиитин чунуобунньуктар быһа гыммакка, тэрээһин бэрт таһаарыылаахтык ыытылларыгар көмө-тирэх буолбуттарын бэлиэтиир тоҕоостоох.

sport1

Ыарыыга быһа ыстата сылдьар дьон тас дойдуга тиийэн күрэхтэһэллэрэ, дьонтон уратыта суох көҥүл көччүйэллэрэ тугунан да кэмнэммэт дьоруойдуу быһыы буоллаҕа. Маннык сырыы кэннэ олоҕу олох атын харахтарынан көрөллөр, бэйэлэрин уопсастыбаҕа туһалаахпыт диэн дьэ итэҕэйэллэр. Онон биһиги Сахабыт сиригэр ситэриилээх былаастар эмиэ Казахстан чунуобунньуктарын курдук инбэлииттэри өйүүллэрэ буоллар диэн баҕа санаалаахпын. Чахчы, Казахстааҥҥа олох атын таһымнаахтар, киһи көрөн ымсыырар. Биһиги өрөспүүбүлүкэбитигэр диализниктар уонна трансплантация оҥорторбут спортсменнар ортолоругар тоҕо национальнай оонньуулары тэрийэрбит табыллыа суоҕай?

sport

Биһиги өрөспүүбүлүкэбит, дойдубут чиэһин ситиһиилээхтик көмүскээбит,  киэн туттар спортсменнарбытын кытары билиһиннэрэбин.

sport2

 

Ол курдук, харбааһыҥҥа Григорий Кобяков 1-кы миэстэни ылла. Остуол тенниһигэр Туйаара-Умсулҕана Иванова 3-с миэстэни ылла, оттон Марианна Константинова 2-с бочуоттаах миэстэҕэ таҕыста. Маны таһынан, Марианна боулиҥҥа 3-с миэстэни ылары ситистэ. Константин Семенов остуол тенниһигэр уонна дартска 3-с бочуоттаах миэстэлэри ылла. Дартска Маргарита Охлопкова иккистээтэ. Маладыьастар! Кинилэринэн киһи киэн туттар! Салгыы ылсыбыт дьыалаҕытын ыһыктыбакка өссө да үрдүк ситиһиилэри дабайаргытыгар баҕарабын!

Тарҕат:

Комментарии

Защитный код Обновить