Киирии

Киирии

Дьокуускайдааҕы “Триумф” успуорт комплексыгар үс күнү быһа Роман Дмитриев кэриэһигэр VI аан дойдутааҕы турнир (көҥүл тустууга) ыытылынна.

Саха сирин хамаандата бу күрэхтэһиигэ сэттэ мэтээли ылары ситистэ – 1 кыһыл көмүс, 1 үрүҥ көмүс уонна 5 боруонса. Өрөспүүбүлүкэбит тустууктарыттан күрэхтэһии бастакы наҕараадатын Мииринэйтэн төрүттээх Андрей Аронов (97 кг) ылбыта эрдэттэн биллибитэ. Тоҕо диэтэххэ, ити ыйааһыҥҥа 5 эрэ бөҕөс баар буолан – миэстэлэри эргиир систиэмэтинэн эрдэ быһаарсан кэбиспиттэрэ.

IMG 3804 Copy

Үһүс миэстэ иһин хапсыһыыларга Петр Константинов Казахстан бөҕөһө Заманбек Хамитовы, Алексей Копылов Тыва бөҕөһө Чаян Монгуһу кыайаннар боруонса мэтээл хаһаайыннарынан буолбуттара.

65 киилэ ыйааһыҥҥа тустубут Айсен Потапов эмиэ үһүс миэстэ иһин Молдавия бөҕөһө, уолаттарга аан дойду чөмпүйэнээтин призера Стефан Тонуну кытта тустубута уонна хапсыһыы сүрүн бириэмэтэ бүтэ илигинэ кыайыыны ситиспитэ. Инньэ гынан күрэхтэһии иккис күнүгэр түөрт боруонса мэтээлинэн дуоһуйбуппут.

Аллайыаха Чокуурдааҕыттан төрүттээх Максим Толмачев тустубут ыйааһыныгар (92 кг) баар алта бөҕөһү икки бөлөххө араарбыттара. Максим бэйэтин бөлөҕөр – Монголия бөҕөһө Чинбат Алтангерелы (12:5) уонна Греция бөҕөһө Христос Петридиһы (8:4) ахсааннарынан баһыйа тутуталаан финалга тахсыбыта. Атын бөлөх кыайыылааҕынан Казахстан бөҕөһө Алишер Ергали буолбута. Финалга Максим Толмачев уонна Алишер Ергали бастаан утаа эрбии биитин курдук эриспиттэрэ. Иккис түһүмэх ортотун диэки Максим Толмачев утарылаһааччытын 4 баалга быраҕан күдээритэр, эбиитин киһитин көбүөргэ эпсэри баттаан ыраас кыайыыны ситиһэр.

61 киилэ быһаарыылаах хапсыһыытыгар саха бөҕөһө Христофор Потапов – уолаттарга Арассыыйа уонна Европа чөмпүйүөнэ, Дагестан бөҕөһө Абасгаджи Магомедовка кыайтаран – турнир үрүҥ көмүс призерунан буолар. Оттон үһүс миэстэ иһин хапсыһыыга Чурапчы институтун устудьуона Владислав Кривошапкин Красноярскай бөҕөһө Николай Донзаленконы 14:4 ахсаанынан кыайан – боруонса мэтээли ылары ситиһэр.

IMG 3894 Copy

“Кыым” кэрэспэдьиэнэ Федор Рахлеев Саха сирин уолаттарга сүүмэрдэммит хамаандатын сүрүн тириэньэрэ Станислав Захаровтан күрэхтэһии туһунан санаатын үллэстэригэр көрдөстө:

– Уолаттар бэйэлэрин кыахтарынан туһуннулар. Биллэн турар, кыһыылаах кыайтарыылар бааллар. Күрэхтэһиигэ уолаттарбыт атын эрэгийиэннэр, дойдулар күүстээх бөҕөстөрүн кытта хайдах тусталларын көрдүбүт. Түмүк куһаҕан диир сатаммат, сэттэ уол Арассыыйа чөмпүйэнээтигэр путевка ыллылар. Арассыыйа чөмпүйэнээтэ муус устар 11-15 күннэригэр Смоленскайга ыытыллыахтаах. Сорох дьон, холобур: “Оҕолорго Европа уонна аан дойду чөмпүйүөннэрэ бырааттыы Копыловтар күрэхтэһии финалыгар тахсар курдук тустуохтаах этилэр”, – дииллэр. Манна биири өйдүөххэ наада, кинилэр 55, итинтэн да аллараа ыйааһыннарга туста сылдьыбыт уолаттар. Оттон бу күрэхтэһиигэ саамай аллараа ыйааһын – 57 киилэ.

– Станислав, күрэхтэһии иннинэ бачча мэтээли ылыахтаахпыт диэн суоттаммыккыт дуу?

– 57, 61, 65 киилэ ыйааһыннарга уолаттарбыт үс иһигэр киириэхтэрин сөп диэн суоттаммыппыт. Ити ыйааһыннарга уолаттарбыт үс иһигэр киирдилэр. Бу күрэхтэһии саҥа систиэмэнэн ыытыллыбытын бэлиэтиэххэ наада. Урут ыйааһыннарга кыайыылаахтар уонна призердар биир күн иһинэн быһаарыллаллара дии. Билигин ыйааһын аайы бөҕөстөр икки күн тусталлар. Кинилэр, аны туран, икки күн устата ыйааһыннарын тута сылдьыахтаахтар.

92 киилэҕэ чөмпүйүөннээбит Максим Толмачев кыайыыта соһуччу буолла дуу?

– Максим Толмачев үчүгэй тустууну көрдөрүө диэн эрэнэр этибит. Кини Роман Дмитриев кэриэһигэр ыытыллар күрэхтэһиилэргэ мэлдьи миэстэлэһэр. Ол курдук 2016 сыллаахха 84 киилэҕэ үрүҥ көмүс призерунан буолбута. Былырыын эмиэ ити ыйааһыҥҥа боруонса мэтээлинэн наҕараадаламмыта. Кини – Олимпийскай эрэллэр училищеларын иитиллээччитэ. Бэйэтэ Аллайыаха улууһуттан төрүттээх. Биһиги, арай, Максим эчэйиитин бэргэтиэ диэн сэрэхэдийбиппит. Кини былырыын күһүн Дагестаҥҥа ыытыллыбыт Арассыыйа чөмпүйэнээтигэр эчэйиини ылбыта. Ону саҥа оһорунан баран бу күрэхтэһиигэ кытынна.  

Чөмпүйүөннэр уонна призердар

57 кг: 1 – Ахмед Идрисов (Дагестан); 2 – Андрей Гатаулин (Бурятия); 3 – Петр Константинов уонна Алексей Копылов (иккиэн – Саха сирэ).

61 кг: 1 – Абасгаджи Магомедов (Дагестан); 2 – Христофор Потапов; 3 – Владислав Кривошапкин (иккиэн – Саха сирэ) уонна Роберт Манасян (Красноярскай).

65 кг: 1 – Тумур-Очир Тулга (Монголия); 2 – Хаджимурад Гаджиев (Азербайджан); 3 – Айсен Потапов (Саха сирэ) уонна Сайын Казырык (Тыва).

70 кг: 1 – Разамбек Жамалов (Дагестан) 2 – Василе Дьякон (Молдавия); 3 – Нуркожа Кайпанов (Казахстан) уонна Адам Юсупов (Чечня).

74 кг: 1 – Ахмад Ташухаджиев (Чечня); 2 – Диас Аскаров (Казахстан);
3 – Шынгыс Мухамметкалиев (Казахстан) уонна Буян Цыренов (Бурятия).

79 кг: 1 – Шамиль Харумов (Чечня); 2 – Арслан Гаражиев (иккиэн – Чечня); 3 – Рашад Юсифли (Азербайджан).

86 кг: 1 – Иван Стефанов (Болгария); 2 – Юрий Калашников (Израиль); 3 – Батмангай Энхтувшин (Монголия) уонна Андрей Елбаскин (Бурятия).

92 кг: 1 – Максим Толмачёв (Саха сирэ); 2 – Алишер Ергали (Казахстан); 3 – Чинбат Алтангерел (Монголия).

97 кг: 1 – Адам Бетербиев (Чечня); 2 – Серик Бакытханов (Казахстан);
3 – Андрей Аронов (Саха сирэ)

125 кг: 1 – Мөнхтөр Лхагвегерел (Монголия); 2 – Хасанбой Рахимов (Узбекистан); 3 – Самат Тажи (Казахстан) уонна Ахмед Альбекхаджиев (Чечня).

Тарҕат:

Ырытыыгын суруй

Защитный код
Обновить

Бүтэһик сонуннар