Өрөспүүбүлүкэ Ил Дархана Айсен Николаев Саха сирин норуоттарын 7-с спортивнай оонньууларын үөрүүлээх аһыллыытыгар сырытта. Оонньуу суолтатын уонна Амма улууһугар туһаайан бу курдук этэр:
– Бастатан туран, өрөспүүбүлүкэ олохтоохторун ааттарыттан Амма улууһун хорсун-хоодуот, үлэһит дьонугар махталбын тиэрдэбин. Сыл устата улуус өссө киэргэйдэ, олоҕо-дьаһаҕа тубуста. Кэнэҕэскитин успуордунан көхтөөхтүк дьарыктаналларыгар усулуобуйа баар буолла. Бары билэрбит курдук, ааспыт сылга аммалар халааҥҥа былдьанан, өссө күүстээх санааны ылынан, сыл устата бэлэмнэнэн сүрдээх улахан үлэни ыыттылар. Улууска «Амма-олимп» стадион, Сахаачча аатынан элбэх функциялаах успуорт саалата, Чапчылҕаҥҥа успуорт саалата уонна Бөтүҥҥэ өрөспүүбүлүкэҕэ бастакынан, адаптивнай успуорт көрүҥнэригэр саала баар буолбута ураты суолталаах.
Арассыыйа бэрисидьиэнэ В. Путин дойду нэһилиэнньэтэ 50%-тэн итэҕэһэ суох успуордунан дьарыктаныахтааҕын туһунан этиини эппитин, бары сэргии иһиттибит. Бу курдук улуустарга, нэһилиэктэргэ успуорт эбийиэктэрэ тутуллан, өссө элбэх киһи чөл олохтоох буоларыгар бигэ эрэллээхпит. Билигин Норуоттар оонньууларыгар кытта сылдьар оҕолор, бука бары онно үтүө холобур буолаллар. Онон бу саха норуотугар олимпийскай оонньууга тэҥнээх тэрээһиммит сиэрдээхтик, чиэһинэйдик, үрдүк таһымнаахтык ыытылларыгар баҕарабын.
Екатерина АФАНАСЬЕВА.
