От ыйын 3-6 күннэригэр Москуба куоракка бүтүн Аан дойдутааҕы кыайыылаахтар Х оонньуулара буолар. Манна искэн ыарыытын кыайбыт оҕолр кытталлар. Дойду араас эрэгийиэннэриттэн уонна тас дойдулартан хамаандалар кэлэллэр. Быйыл бу бырайыакка аан бастакытын Словакия хамаандата кыттар. Отто Саха сирэ номнуо алтыс сылын ситиһиилээхтик кыттар.
Сыл аайы өрөспүүбүлүкэ араас улуустарыттан уон ыал Белокаменнайга көтөллөр. Бу “Праздник жизни” аһымал пуонда көмөтүнэн олоххо киирбитэ.
“Быйыл хамаанда алта киһиттэн турар диэн саҥа быраабылалаах. Иллэрээ күн эдэр спортсменнары төрөппүттэрин кытта атаарбыппыт. Билигин кинилэргэ көхтөөхтүк “ыалдьабыт””, – диэн норуот дьокутаата Алена Атласова кэпсиир.
Онньуулар бастакы күнүгэр хаамыыга уонна остуол тенниһигэр күрэстэспиттэр. Номнуо бастакы көрдөрүүлэр бааллар. Ол курдук, Саха сирин хамаандата икки кыһыл көмүс мэтээллээх: Дьокуускайтан Сахаяна Слепцова спортивнай хаамыыга уонна Нерюнгриттан Миша Федоров остуол тенниһигэр.
Оҕолор ортолоругар дойду тэбэр сүрэҕэр аан бастакытын сылдьааччылар бааллар. Быйыл төрөппүттэр “Таҥас” фирматтан бары биир формалаахтар.
“Алта сыл тухары күүс-көмө буолар спонсордарга улахан махтал. “Якутия” авиа-хампаанньаҕа уонна “Металлторг” тэрилтэҕэ. Кинилэр хамаанда чилиэттэрин билиэтинэн хааччыйаллар”, – диэн Алена Николаевна кэпсиир.
Бу бырайыагы уон сыл аннараа өттүгэр волонтердар “Подари жизнь” аһымал пуонда этиитинэн тэрийбиттэр. Ол кэмтэн ыла 40 эрэгийиэнтэн уонна 20 тас дойдуттан 3 тыһ тахса оҕо кытынна.
