Санкт-Петербург куоракка буолан ааспыт спортиҥ-компакка Гран-при Фитаск күрэһэр, Нонна Миронова Арассыыйа успуордун маастара нуорматын толордо.
Кини дьахталлар ортолоругар иккис миэстэни ылары ситистэ. Күрэстэһиигэ дойду араас муннугуттан 203 киһи кытынна. Олортон 12 кэрэ аҥаар. Дьахталларга бастакы миэстэни Ижевск куораттан норуоттар икки ардыларынааҕы кылаастаах успуорт маастара Айгуль Мубаракшина ылла. II миэстэ – Нонна Миронова, оттон III миэстэни Москуба куораттан Арассыыйа успуордун маастара Оксана Букина ылла. Нонна 170 сыалы ытта. Нуорма 200-тэн 166 сыал буолар.
Нонна Миронова: “Ытыынан 2015 сыллаахтан дьарыктанабын. Ол сыл аан бастакытын спортинг-компакка өрөспүүбүлүкэтээҕи турнирга кыттыбытым. Ол кэмтэн ыла номнуо 43 өрөспүүбүлүкэтээҕи күрэстэргэ кытынным. Онтон Арассыыйа таһымыгар тахсыбытым. Түгэнинэн туһанан тренербар Кобяков Сергей Николаевичка махталбын тиэрдэбин. Билигин спортинг көрүҥүнэн олус аҕыйах дьахтар дьарыктанар. Бу успуорт көрүҥүнэн эр дьон эрэ дьарыктанар буолбатах, онон кэрэ аҥаардары ыҥырабын”.
Нонна инникитин аны норуоттар икки ардыларынааҕы кылаастаах успуорт маастара буолар сыаллаах. Ол туһугар Арассыыйатааҕы уонна Аан дойдутааҕы таһымнаах күрэстэргэ ситиһиилээхтик кыттаары дьаныардаахтык эрчиллэр.
Сэҥээриилэр