Урукку кэмнэргэ Арассыыйаҕа доруобуйатынан хааччахтаах дьонҥо улахан болҕомто суоҕун тэҥэ этэ. Оттон билигин доруобуйаларынан хааччахтаах дьону былаас да өттүттэн, дьон-норуот даҕаны улаханнык өйүүр буолбута харахха быраҕыллар. Иньэ гынан, бу дьон олоххо тардыһыылара, эрэллэрэ улаатан киһи тэҥинэн сайдаллар, успуорт, култуура да өттүгэр улахан ситиһиилэнэллэр.
Доруобуйатынан хааччахтаах дьон улахан ситиһиилэригэр чугас дьоно уонна дьоҕурдаах тириэньэрдэрэ, учууталлара улахан оруолу ылаллар. Бу соторутааҕыта Эбээн Бытантай улууһун Кустуур нэһилиэгиттэн төрүттээх Виктор Скрыбыкин ситиһиилэриттэн биир дойдулаахтара үөрдүлэр, киэн тутуннулар. Кини ситиһиилэрин туһунан эбэтэ , Кустуур нэһилиэгин олохтооҕо Мария Васильевна Скрыбыкина сиһилии кэпсээтэ:
—Виктор олунньу 2 күнүгэр 1995 сыллаахха Кустуур нэһилиэгэр күн сирин көрбүтэ. Үөһээ Дьааҥы улууһун Үөттээх коррекционнай оскуолатын 9 кылааһын бүтэрбитэ уонна Дьокуускайга инбэлииттэр лицейдэригэр үөрэнэн, столяр-станочник идэтин ылбыта. Ол кэннэ өссө туттарсан, “сапожник-обувщик” идэтин баһылаабыта. Олус үлэлиэн баҕаран , балыыһаттан көрдөһөн иккис курууппалаах инбэлиититтэн үһүс курууппаҕа көһөртөрбүтэ. Ол кэннэ «Саха булт» тэрилтэҕэ, Дьокуускайга хос куортамнаан олорон, атах таҥаһын тигиитигэр идэтинэн үлэлээбитэ. Виктор бастаан гиирэ успуордунан дьарыктаммыта. 2018 сыл алтынньы ыйыттан Петр Васильевич Андросов диэн оҕунан ытыы тириэньэрэ Викторы “дьоҕурдаах уол эбит” диэн бэлиэтии көрөн, күүскэ дьарыктаан саҕалаабыта. Онтон ыла оҕунан ытыынан үлүһүйэн туран дьарыктанар.
Виктор ситиһиилэрэ:
2018 сылга Дьокуускай куорат чемпионатыгар оҕунан ытыыга успуорт маастара
2019 сыл тохсунньу ыйга Саха Өрөспүүбүлүкэтигэр инбэлииттэргэ оҕунан ытыыга үрүҥ көмүс мэтээл хаһаайына
2019 сыл тохсунньу ыйга Орел куракка ыытыллыбыт Арассыыйа кубогар кыһыл көмүс мэтээл хаһаайына
« Микс »салалтатыгар үрүҥ көмүс мэтээл хаһаайына
Хамаанданан оҕунан ытыыга эр дьоннорго боруонса мэтээли ылан, Арассыыйа успуордун маастарын хандьыдаата буолбута.
2019 муус устар ыйга Алушта куоракка ыытыллыбыт Арассыыйа чемпионатыгар үрүҥ көмүс мэтээл хаһаайына, быйыл от ыйыгар Улан-Удэ куоракка бүтүн Арассыыйатааҕы «Байкал охторо» күрэххэ хамаанданан оҕунан ытыыга эр дьонҥо боруонса мэтээлин эрэллээхтик ылла. Маны ааһан, соторутааҕыта эмиэ Улан-Удэ куоракка Арассыыйа кубогар үрүҥ көмүс мэтээл хаһаайына буолары ситистэ Микс эрчиллиигэ Артахинова Степанидалыын кыһыл көмүс мэтээл хаһаайына буоллулар.
Кустуур уолугар тус олоҕор дьолу-соргуну, сөбүлүүр дьарыгар өссө да улахан ситиһиилэри баҕарыаххайыҥ!
Оксана Апитова
