Улан-Удэҕэ – үс мэтээл

Кулун тутар 10-11 күннэригэр Улан-Удэҕэ Бурятия баһылыгын бирииһигэр XXIII аан дойдутааҕы турнир ыытылынна

Бу күрэхтэһиигэ Арассыыйаттан, Арменияттан, Белоруссияттан, Болгарияттан, Венгрияттан, Казахстантан, Кытайтан, Кыргызстантан, Литваттан, Монголияттан, Турцияттан, Узбекистантан, Эстонияттан, Соҕуруу Кореяттан, Таджикистантан 200 кэриҥэ бөҕөс кыттыыны ылла.

Арассыыйаттан, биллэн турар, бу турнирга бөҕөстөр хото кытыннылар. Турнир суолтата сыллата үрдээн иһэр. Ол курдук күрэхтэһии бастыҥнарыттан Аан дойду Куубагар кыттар Арассыыйа хамаандата сүүмэрдэниэхтээх. Аны туран турнир кыайыылаахтара аан дойду кылаастаах успуорт маастарын үрдүк аатын ылаллар. Онон Улан-Удэҕэ көҥүл тустууну күүскэ сайыннарарга үлэлэһэр эрэгийиэннэр бары кытыннылар. Холобур, аҥаардас Бурятияттан 38 бөҕөс кытынна.

Күрэхтэһиини улахан ааттаах-суоллаах бөҕөстөр киэргэттилэр. Ол курдук Улан-Удэ көбүөрүгэр Лондон Олимпиадатын (2012) чөмпүйүөнэ Джамал Отарсултанов, Рио-де-Жанейро Олимпиадатын (2016) үрүҥ көмүс призера Аниуар Гедуев, 2015 сыллааҕы аан дойду чөмпүйүөнэ Магомедрасул Газимагомедов, Европа үс төгүллээх чөмпүйүөнэ Анзор Уришев уонна былырыыҥҥы Европа чөмпүйэнээтин кыайыылааҕа Даурен Куруглиев.

Саха сирин сүүмэрдэммит хамаандатыттан 14 бөҕөс кытынна: Арыйаан Тютрин, ини-бии Алексей уонна Петр Копыловтар, Дмитрий Аксенов (57 кг), Вячеслав Ефремов, Айхаан Антонов, Петр Павлов (61 кг), Виктор Рассадин, Дьулустаан Булатов, Эдуард Григорьев (65 кг), Герман Устинов, Тимур Николаев, Константин Власов, Иван Барашков (70 кг). Күрэхтэһиигэ Белоруссия хамаандатын састаабыгар киирэн Ньургун Скрябин (61 кг) туһунна.

Күрэхтэһии бастакы күнүгэр саха бөҕөстөрө икки мэтээллэннилэр. Саха сирин хамаандатын лиидэрэ Виктор Рассадин (65 кг) соһуччу Монголия бөҕөһө Тумур-Очир Тулгаҕа кыайтаран кэбиһэр (5:2). Оттон бу ыйааһыҥҥа тустубут Эдуард Григорьев эр-биир Монголия бөҕөстөрүн Бензав Гансуҕу (3-1) уонна Тумур Тулганы (7-2) кыайталыыр. Кини салгыы Бурятия бөҕөстөрүгэр түбэһэр: финал аҥаарыгар Даша Шарастепановы (5-2) кыайан баран, быһаарыылаах хапсыһыыга Баяр Цыреновка (0-11) кыайтарар.

Арыйаан Тютрин (57 кг) бастакы эргииргэ Тыва бөҕөһө Туметей Меткены (10:0) кыайан баран – финал чиэппэригэр Монголия бөҕөһө Эрдэнэбат Бехбаярга (2-3) кыайтарар. Онтон үһүс миэстэ иһин хапсыһыыга Тыва бөҕөһө Белек-Оол Кужугеты 3-0 ахсаанынан кыайан боруонса мэтээл хаһаайынынан буолар.

Сарсыныгар Белоруссия аатыттан тустар Ньургун Скрябин (61 кг) бастакы эргииргэ Арассыыйа үс төгүллээх чөмпүйүөнэ Александр Богомоевка кыайтаран кэбиһэр (1:5). Бу кэнниттэн Ньургун Скрябин эмиэ өрөйөн-чөрөйөн биэрэн – үһүс миэстэ иһин хапсыһыыга Бурятия бөҕөһө Юлиан Гергеновы 20-8 ахсаанынан кыайар.

Бурятия өрөспүүбүлүкэтэ көҥүл тустууну сайыннарыыга сорунуулаахтык ылсан эрэрэ көһүннэ. Бүрээт бөҕөстөрө биэс ыйааһыҥҥа бастаатылар (барыта 11 мэтээллээхтэр). Ол иһигэр муҥутуур улахан ыйааһыҥҥа (125 кг) сахалар үчүгэйдик билэр бөҕөспүт Цыбик Максаров бастаата. Манна интэриэһинэйэ диэн – кини Бурятия хамаандатын сүрүн тириэньэринэн үлэлиир. Чугастааҕы сылларга Бурятияҕа Арассыыйа икки чемпионата ыытыллыахтаах: эһиил (2019 сылга) – дьахталларга, Токио Олимпиадата (2020) ыытыллар сылыгар – эр дьоҥҥо.

Федор РАХЛЕЕВ.

Чөмпүйүөннэр уонна призердар

57 кг: 1 – Эрдэнэбат Бехбаяар (Монголия); 2 – Хуреш-Оол Дондук-Оол (Тыва); 3 – Алексей Мантатов (Бурятия) уонна Арыйаан Тютрин (Саха сирэ). 

61 кг: 1 – Александр Богомоев (Бурятия); 2 – Зелимхан Абакаров (Москва); 3 – Ньургун Скрябин (Белоруссия) уонна Ефим Кормильцев (Арассыыйа).

65 кг: 1 – Баяр Цыренов (Бурятия); 2 – Эдуард Григорьев (Саха сирэ); 
3 – Даша Шарастепанов (Бурятия) уонна Батчулуун Батмагнай (Монголия).

70 кг: 1 – Евгений Жербаев (Бурятия); 2 – Алибек Акбаев (Кабарда-Балкария); 3 – Роланд Ондар (Тыва) уонна Алексей Боровицкай (Бурятия).

74 кг: 1 – Арсалан Будажапов (Бурятия); 2 – Ганзориг Мандахнаран (Монголия); 3 – Магомед Дибиргаджиев (Дагестан) уонна Расул Газимагомедов (иккиэн – Дагестан).

79 кг: 1 – Радик Валиев (Хотугу Осетия); 2 – Хусейн Суюнчев (Карачай-Черкессия); 3 – Алексей Сабидаев (Бурятия) уонна Кахабер Хубежты (Хотугу Осетия).

86 кг: 1 – Даурен Куруглиев (Дагестан); 2 – Унурбат Пурэвжав (Монголия); 3 – Канат Бердыев (Казахстан) уонна Уйтумэн Оргодол (Монголия).

92 кг: 1 – Анзор Уришев (Кабарда-Балкария); 2 – Тимур Баторов (Бурятия); 3 – Улзысайхан Баасанцогт (Монголия) уонна Алихан Жабраилов (Дагестан).

97 кг: 1 – Игорь Овсянников (Красноярскай); 2 – Батзуул Улзысайхан (Монголия); 3 – Алдар Хамаев (Иркутскай).

125 кг: 1 – Цыбик Максаров (Бурятия); 2 – Алан Хугаев (Хотугу Осетия)