Финляндия Лахти куоратыгар сэтинньи 6-10 күннэригэр пауэрлифтиҥҥэ ВПС Федерациятыгар Аан дойду чөмпүйэнээтэ ыытылынна. Манна аан дойду бары континеннарыттан 600-чэ спортсмен кэлэн күүстэрин холостулар.
Бу күрэхтэһиигэ биһиги биир дойдулаахпыт, 68 сааьыгар сылдьар Петр Баттахов 100 киилэҕэ ситиһиилээхтик кытынна. Кини штанганы тобукка диэри өрө тардыыга 205 киилэни көтөҕөн эрэллээхтик бастаата. Итини таһынан дойдулар икки ардыларыгар хамаанданан түмүк тахсарынан хамаанда туһугар классическай пауэрлифтиҥҥа троеборьеҕа кыттан троеборье үс көрүҥэр уонна сууматыгар 400 киилэни хомуйан Аан дойду саҥа рекордун олохтоото. Бу рекордар 2016 сыллаахха Велокобритания киһитинэн олохтоммут эбит.
Петр Баттаховы таһынан Арассыыйа хамаандатыгар 72 саастаах Эдьигээнтэн төрүттээх Сергей Никифоров “жимҥэ” чөмпүйүөннээтэ (82,5 кг). Классическай троеборьеҕа Таатта талыыта 67 саастаах Николай Матаннанов 82,5 кг диэри 385 кг хомуйан 2-с миэстэ буолла.
Петр Петрович Баттахов бачча ыраах дойдуга баран ситиһиилээхтик кыттыбытыгар кинини өйөөбүт төрөөбүт улууһун салалтатыгар (улуус баһылыга А.М. Иннокентьев), улуус дьаһалтатын куоракка бэрэстэбиитэлэ И.И. Яковлевка, успуорт управлениятын үлэһиттэригэр, биир дойдулаахтарыгар В.А. Ефремовка, урбаанньыттар И.Е. Алексеевка, А.М. Скобелевка, АО СӨ “Комдрагметалл” АУо (генеральнай дириэктэр К.И Васильев), быраатыгар Николай Баттаховка, үөлээннээхтэригэр М.И. Шестаковка, М.Ф. Семеновка, И.И. Шамаевка ис сүрэҕиттэн махтанар. Кинилэргэ дьоллоох олоҕу, доруобуйаны, үлэлэригэр, дьиэ кэргэттэригэр бары үчүгэйи баҕарар.
Саргылаана БАГЫНАНОВА.
