Киирии

Киирии

Кулун тутар 15-16 күннэригэр Дьокуускайдааҕы “Дохсун” спорт комплексыгар оҕунан ытыыга өрөспүүбүлүкэ чөмпүйэнээтэ буолан ааста

 Классическай оҕунан ытыы көрүҥэр 16 дьахтар күрэхтэстэ. Бу көрүҥ финалыгар Европа чөмпүйэнээтин үрүҥ көмүс призера Евгения Тимофеева уонна 40 саастаах успуорт бэтэрээнэ, Покровскайдааҕы успуорт оскуолатын дириэктэрин солбуйааччы Анна Алексеева-Стасова таҕыстылар.

IMG 6917 Copy

Дьахталларга бу көрүҥ финала олус тыҥааһыннаах буолла. Ытыы түөрт сиэрийэтин кэнниттэн ахсаан тэбис тэҥ этэ. Кыайыылааҕы быһаарыыга балаһыанньа быһыытынан – хас биирдиитэ үстүү ытыылаах түөрт сиэрийэ бэриллэр. Ити да кэнниттэн кыайыылаах кыайан быһаарыллыбатаҕына эбии түһүмэх бэриллэр. Дьэ, онон, быһаарыылаах бэһис сиэрийэҕэ Евгения Тимофеева икки баалынан чорбойон тахсар. Кини иккитэ сыал хабыллар хаба ортотугар (“дэһээккэҕэ”) түһэртиир. Оттон биир ытыыта тоҕус бааллаах эргимтэҕэ түһэр.

Бу күөнтэһии хаһыс да төгүлүн өрөспүүбүлүкэ чөмпүйүөҥкэтинэн буолбут Евгения Тимофееваҕа туһалаах быраактыканан буолбута саарбаҕа суох. Билигин кини муус устар 6 күнүгэр Алуштаҕа ыытыллар Арассыыйа Куубагар кыттыыны ылыахтаах. Бириистээх миэстэни ыллаҕына – үөрэтэр-эрчийэр тэрээһиҥҥэ хаалан, Аан дойду Куубагар кыттыахтаах дойду хамаандатын састаабыгар киирэр иһин туруулаһыахтаах. Арассыыйа бу түһүлгэтигэр Саха сирин бастыҥ охчуттара бары кэриэтэ барыахтара.

Классическай оҕунан ытыы көрүҥүгэр 27 охчут бастыҥтан бастыҥы быһаардылар. Финалга Олимпийскай эрэллэр училищеларын иитиллээччитэ Емельян Степанов уонна ХИФУ спортка институтун устудьуона Мичил Алексеев тахсаллар. Манна Мичил Алексеев үс ытыы сиэрийэтигэр кыайан, бииргэ тэҥнэһэн – өрөспүүбүлүкэ чөмпүйүөнүнэн буолла.

Булуоктаах оҕунан ытааччылар кыһыл көмүс мэтээл иһин быһаарыылаах киирсиилэригэр – Арассыыйа Куубагын хас да төгүллээх кыайыылааҕа Асим Павлов уонна устудьуоннарга аан дойду чөмпүйэнээтин үрүҥ көмүс призера Михаил Филатов күөн көрүстүлэр. Иккиэн – аан дойду кылаастаах успуорт маастардара. Манна Михаил Филатов – тириэньэр, оттон Асим Павлов кини иитиллээччитэ буоларын бэлиэтиэххэ наада. Дьарыктыыр, уонна дьарыктанар сирдэрэ – Чурапчытааҕы успуорт региональнай киинэ. Тириэньэр уонна кини иитиллээччитэ диэн суруйарын суруйдубут да – Михаил Филатов иитиллээччититтэн алта эрэ сылынан аҕа ээ. Кини 30-таах, оттон Асим Павлов 24-тээх.

Булуоктаах оҕунан ытыыга кыайыылааҕы быһаарыыга хас биирдиитэ үстүү ытыылаах биэс сиэрийэ бэриллэр. Классическай оҕунан ытыыга сиэрийэҕэ кыайбыккынан (холобур 3-1) – ахсаан ааҕыллар буоллаҕына, манна сыалы хайдах табаргыттан көрөн бааллары барытын ааҕан лабырҕатан иһэллэр.

IMG 6933 Copy

Михаил Филатов бастакы сиэрийэттэн баалынан чорбойон тахсыбыта уонна салгыы эҥкилэ суох ытыыны көрдөрбүтэ. Асим Павлов кэнники сиэрийэлэргэ эрэ ахсааны тэҥнээбитэ, онон өрөспүүбүлүкэ чөмпүйүөнүнэн ким буолара-буолбата бүтэһик түһүмэххэ быһаарыллыбыта. Түмүккэ 143-142 ахсаанынан Михаил Филатов чөрбойон тахсар уонна кыһыл көмүс мэтээлинэн наҕараадаланар.

– Мин бу күрэхтэһиигэ тугу да сүтэрэрим суох этэ буоллаҕа, – диэн тириэньэр Михаил Филатов “Кыым” кэрэспэдьиэнигэр кэпсээтэ. – Асим Павлов – оҕунан ытыы бу көрүҥэр өрөспүүбүлүкэҕэ бастакы нүөмэрдээх спортсмен, Арассыыйа сүүмэрдэммит хамаандатын чилиэнэ. Онон бу күрэхтэһии киниэхэ эппиэтинэстээх даҕаны, долгутуулаах даҕаны. Асим бэйэтэ: “Ээ, суох, мин олох да долгуйбатаҕым”, – диир даҕаны, маннык тыҥааһыннаах, эрбии биитин курдук эриһиилээх киирсиигэ киһи хайдах да долгуйбат буолуон сатаммат.

Чурапчытааҕы успуорт региональнай киинигэр мин тириэньэр быһыытынан дьону дьарыктыыбын даҕаны, бэйэм даҕаны дьарыктанабын. Оҕунан ытыыга өрөспүүбүлүкэбитигэр доруобай күөнтэһии баар буоллун диэн санааттан бу чөмпүйэнээккэ кытынным. Ох саанан ытыы сайдыбыт эрэгийиэннэригэр, холобур, Бурятияҕа, Забайкалье кыраайыгар дьон маассабайдык дьарыктанар. Онон күрэхтэһиилэригэр доруобай күөнтэһии мэлдьи баар. Сотору Алуштаҕа ыытыллар Арассыыйа Куубагар кытта барыахтаахпыт. Онно тириэньэр быһыытынан сылдьарым буолуо. Чэ, хайдах буолар, онно миэстэтигэр тиийэн көрөн-истэн баран быһаарыныам. Асим Павлов, холобур, билигин күүһүн-уоҕун үгэнигэр сылдьар. Бу кыһын аан дойду кылаастаах успуорт маастарын нуорматын толорбута. Онон кэскиллээх уолаттары көрөр-истэр эмиэ наада.

Булуоктаах оҕунан ытыы көрүҥэр дьахталларга 15 киһи күрэхтэспитэ. Финалга Дайаана Винокурова уонна Марианна Винокурова тахсыбыттара. Кинилэр аймахтыылар буолбатахтар: Марианна Өлөөнтөн төрүттээх, оттон Дайаана Кэбээйи Сииттэтигэр 11-с кылааска үөрэнэр. Кини финалга утарылаһааччытын 141-120 ахсаанынан эрэллээхтик кыайда. Марианна Винокурова Дьокуускайга дьарыктана сылдьан баран, билигин төрөөбүт Сииттэтигэр дьарыктанар эбит.

Өрөспүүбүлүкэ күүстээх оҕунан ытааччылара икки ыйынан эмиэ Дьокуускайга мустуохтара. Онно атырдьах ыйыгар Аммаҕа ыытыллыахтаах Саха сирин норуоттарын VII оонньууларыгар кыттар быраабы ылар иһин сүүмэрдиир күрэхтэһии ыытыллыаҕа.

Федор РАХЛЕЕВ.

Чөмпүйүөннэр уонна призердар

 

Классическай оҕунан ытыыга

 

Эр дьоҥҥо: 1 – Мичил Алексеев (Дьокуускай); 2 – Емельян Степанов (Үөһээ Бүлүү); 3 – Софрон Лукин (Бэрдьигэстээх).

Дьахталларга: 1 – Евгения Тимофеева (Дьокуускай); 2 – Анна Алексеева-Стасова (Хаҥалас); 3 – Розалина Тимофеева (Бэрдьигэстээх).

Булуоктаах оҕунан ытыыга

Эр дьоҥҥо: 1 – Михаил Филатов; 2 – Асим Павлов (иккиэн – Чурапчы); 3 – Павел Мартынов (Хаҥалас).

Дьахталларга: 1 – Дайаана Винокурова (Нам); 2 – Марианна Винокурова (Өлөөн); 3 – Сардаана Жиркова (Дьокуускай).

Тарҕат:

Ырытыыгын суруй

Защитный код
Обновить