Уус Алдан улууһун сүүмэрдэммит хамаандата мас тардыһыыга федерация кубогын бэһис төгүллээх кыайыылааҕынан буолла. Иккис – Аммалар, оттон үһүс бочуоттаах миэстэни Дьокуускай куорат хамаандата ылла.
Федерция кубогын иһин хамаанданан күрэхтэһиигэ өрөспүүбүлүкэ чемпионатын түмүгүнэн аҕыс улуус сүүмэрдэммит хамаандата кытыннылар. Күрэхтэһээччилэри икки бөлөххө араардылар. Ол курдук, биир бөлөххө 23 спортсмен киирдэ: эдэрдэр, бэтэрээннэр, дьахталлар, эр дьон.
Иван Готовцев салайааччылаах Уус Алдан хамаандата сунтаардары, таатталары уонна Дьокуускай куорат хамаандатын кыайда. Оттон аммалар чурапчылары, ньурбалары уонна мэҥэ хаҥаластары кыайан финалга таҕыстылар.
Инньэ гынан, финалга уус алданнар уонна аммалар күөн көрүстүлэр. Тыҥааһыннаах күрэхтэһии түмүгүнэн, 14:9 ахсаанынан уус алданнар бэһис төгүлүн федерация кубогын хаһаайыттарынан буоллулар.
Оттон үһүс миэстэни Николай Константинов салайааччылаах Дьокуускай куорат сүүмэрдэммит хамаандата ылла. Кинилэр 13:10 ахсаанынан Мэҥэ Хаҥалас улууһун хамаандатын кыайдылар.
