Кулун тутар 6-7 күннэригэр АХШ Коламбус куоратыгар, “Arnold Sports Festival” бэстибээл иһинэн мас тардыһыыга норуоттар икки ардыларынааҕы күрэхтэһии буолан ааста. Бу туһунан “Спорт Якутии” хаһыат саайтыгар суруйаллар.
Арнольда Шварценеггер бэстибээлэ коронавирус ыарыыта туран биир да көрөөччүтэ суох ыытылынна. Күрэхтэһии сахалыы тойугунан уонна хомус тыаһынан арылынна. АХШ-га мас тардыһыытын тарҕатар, сайыннарар сыаллаах үлэлиир Одди Хогенҥа, мас тардыһыытын норуоттар икки ардыларынааҕы федерациятын аатыттан үрүҥ көмүс мэтээли туттардылар. Күрэхтэһии биэс категориянан ыытылынна. АХШ-тан, Бенинтан, Данияттан, Канадаттан, Пакистантан, Узбекистантан о.д.а. дойдулартан спортсменнар “күөн көрүстүлэр”.
Ол курдук 90 кг ыйааһыҥҥа диэри Канадаттан Эндрю Болингер, 105 кг диэри ыйааһыҥҥа Мичигантан Джейкоб Данко, 125 кг – Майк Линдтофт, олус ыарахан ыйааһыҥҥа Улис Пейн III тэҥнээхтэрин булбатылар.