Киирии

Киирии

Дьокуускай куорат дьоһун туонатыгар,  "Өрөгөйуспуорт киинигэр саха норуотун төрүт успуордун көрүҥнэрин сайдыытыгар улахан кылааттаах, Саха Өрөспүүбүлүкэтин физкультураҕа уонна успуорка үтүөлээх үлэһитэ, Уус Алдан улууһун, Лөгөй, Баатаҕай нэһилиэктэрин бочуоттаах олохтооҕо, Саха Өрөспүүбүлүкэтин төрүт успуордун көрүҥнэригэр бочуоттаах маастара, Дыгын оонньууларын сэттэ төгүллээх муҥутуур кыайыылааҕа Иван Прокопьевич Белолюбскайы улахан успуортан атаарыы сиэрэ-туома ыытылынна.

Долгутуулаах түгэҥҥэ Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын салайааччыта Федор Борисов, «Сахаада-спорт» успуорт национальнай көрүҥнэрин Ассоциациятын бэрэсидьиэнэ, Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн, Уус Алдан улууһун баһылыга Алексей Федотов, Саха Өрөспүүбүлүкэтин успуорка миниистирин бастакы солбуйааччы Семен Чердонов, Дьокуускай куорат баһылыгын солбуйааччы Георгий Михайлов, М.К. Аммосов аатынан ХИФУ физическэй култуураҕа уонна успуорка институтун дириэктэрэ Дмитрий Платонов кыттыыны ыллылар.

Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын салайааччыта Федор Борисов Ил Дархан Егор Борисов аатыттан Иван Белолюбскайы истиҥник эҕэрдэлээтэ уонна кининэн бүтүн саха норуота киэн туттарын эттэ. Саха төрүт спорда сайдарыгар дьоһун кылаатын киллэрбитин  бэлиэтээн туран, "Гражданскай килбиэн" бэлиэни туттарда.

Ил Түмэн Бэрэссэдээтэлэ Александр Жирков Уйбаан Белолюбскай - чахчы саха норуотун киэн туттуута, таптала, дьулуура, кэнэҕэһин-кэнэҕэс көлүөнэттэн-көлүөнэҕэ уос номоҕор ахтыллыаҕа диэн бэлиэтээтэ. "Бүгүн суруллубутун быһыытынан Иван Прокопьевич Белолюбскайы улахан спортан атаарар күн. Ол гынан баран, кини улахан спортан атаарыллар күнэ буолбатах. Кини норуот номоҕор, саха норуотун спортивнай историятыгар киирэр үөрүүлээх күнэ. Маннык кыахтаах, сылайбат сындааһыннаах, элэйбэт иҥиирдээх, күүстээх-уохтаах дьон бааллара ханнык баҕарар норуоту ахсаана аҕыйаҕыттан-элбэҕиттэн тутулуга суох дьулуурдаах, тирэхтээх оҥорор. Ыччат инники өттүгэр боотур олохтообут ситиһиитин аһары түһүөн, дьонун-сэргэтин сөхтөрүөн баҕарар сыаллаах-соруктаах, норуотун аатын ааттатар баҕа санаалаах буолар", - диэн бэлиэтээтэ.

Спикер Иван Прокопьевич спортка бэйэтин кыаҕынан-уоҕунан, быһыытынан-таһаатынан, чаҕылхай ситиһиитинэн бүтүн саха норуота киэн туттар киһитэ буоларын тоһоҕолоото. "Биһиги аатырбыт спортсменнарбыт Роман Дмитриев, Павел Пинигин, Александр Иванов, Тимир Пинегин, Георгий Балакшин, бырааттыы Герман, Александр Контоевтар, Леонид Спиридонов онтон даҕаны атыттар курдук кини аата саха спордун историятыгар доргуччу ааттана туруоҕа. Иван Прокопьевич күн бүгүн үлэтин үөһүгэр сылдьар. Быыкайкаан кырачаан оҕолору, ыччаттары уһуйан, ол оҕолор олоххо кыахтаах, дохсун санаалаах, эт-хаан, өй-санаа өттүнэн дэгиттэр сайдыылаах буолууларыгар санаатын, күүһүн-күдэҕин ууран үлэлиир". Ытыктыыр киһибит үлэтэ тахсыылаах, ситиһиилээх, үрдүк көрдөрүүлээх буоларыгар баҕарыаҕыҥ диэбитин, саалаҕа мустубут дьон дохсун ытыс тыаһынан, уруйунан-айхалынан арыаллаатылар.

Ил Түмэн Бэрэссэдээтэлэ Александр Жирков Иван Прокопьевич Белолюбскай Саха Өрөспүүбүлүкэтигэр спорт сайдыытыгар киллэрбит кылаатын иһин Ил Түмэн Бочуотунай грамотатынан наҕараадалаата. Үгүс сылларга спортка өрөгөйдөөбүт түгэннэриттэн таҥыллыбыт бастыҥ фотографтар үйэтиппит хаартыскаларынан таҥыллыбыт коллаһы бэлэхтээтэ.

«Сахаада-спорт» спорт национальнай көрүҥнэрин Ассоциациятын президенэ, Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн спорду таптааччылар ааттарыттан Уйбаан Белолюбскайга барҕа махталын тириэртэ. Туймаадабыт ыһыаҕа, үгүс күрэхтэһиилэр Уйбаан кылбар кыайыытынан үгүс киһи сүргэтин көтөхпүттэрэ. Эдэркээн уолаттар кинини батыһаллар, кини курдук буоларга дьулуһаллар. Инникитин салайар "Боотур" кулуубуттан уос номоҕор киирэр Боотурдар уһуйуллан, хатарыллан таҕыстыннар диэн баҕа санаатын эттэ, алгыс тылын анаата.

Салгыы үөрүүлээх түһүлгэҕэ Уус Алдан улууһун баһылыга Алексей Федотов уонна улууһун нэһилиэктэрин баһылыктара эҕэрдэлээтилэр. Алексей Федотов ханнык баҕарар сир-дойду, омук тумус туттар, чулуу дьонноох буолар, уйгу сирэ Уус Алдан улуу өбүгэлэрдээхпит, туруу үлэһит аҕыс геройдаахпыт, Майаҕатта Бэрт Хара саҕаттан кус-быһый уолаттардаахпыт кинилэринэн киэн туттабыт, айхаллыы ааттыыбыт диэн эҕэрдэтин саҕалаата. "Биһиги үйэбит геройа, уолбут Уйбаан Белолюбскай буолар. Кини кыайыыларыттан үөрбүт, кынаттаммыт, бүгүҥҥү үөрүүлээх күн тоҕуоруһа мустубут саха спордун сүгүрүйээччилэригэр махталбытын тириэрдэбит", - диэтэ. "Инникитин спорт туонатыттан ылбыт баай уопуккун кэнчээри ыччакка тириэрдиэн диэн эрэнэбит. Бу түһүлгэҕэ мустубут бар дьонун үтүө санаалара күүскэр күүс эптин, үрдүккэ кынаттаатын", -  диэн туран, Уус Алдан улууһун дьаһалтатын уонна бары нэһилиэк баһылыктарын ааттарыттан саха дьонун сиэринэн бастыҥ атыырдаах хас нэһилиэк аайыттан биэлээх сылгы үөрүн анаата.

Түмүккэ саха норуотугар өрөгөй үөрүүнү бэлэхтээбит, Дыгын оонньууларын сэттэ төгүллээх муҥутуур кыайыылааҕа Уйбаан Белолюбскай дьонун-сэргэтин иннигэр харда тылы эттэ. "Бүгүн долгутуулаах күммэр мустубут, мин спортивнай олохпор тирэх буолбут, күүс-сэниэ эппит сүгүрүйээччилэрбэр, сахам дьоһун-мааны дьонугар ис сүрэхпиттэн махтанабын. Миигин оҕо эрдэхпиттэн иитэн-такайан, уһуйан, хатаран таһаарбыт тренердэрбэр: Григорий Константинович Дьячковскайга, Лазарь Иннокентьевич Яковлевка, Дмитрий Николаевич Платоновка, Александр Будимирович Слепцовка, Федор Матвеевич Дегтяревка, Андрей Аксеновка сүһүөхтээх бэйэм сүгүрүйэбин. Бүгүҥҥү кыайыым-хотуум кинилэр сыралаах үлэлэрин түмүгэ буолар. Үгүс дьон: "Улахан спорт түһүлгэтиттэн баран эрэрин ыарыылаах соҕус буолбатах дуо?" - диэн ыйыталлар. Бу кэннибэр турар саха төрүт көрүҥнэригэр уһуйар, үөрэтэр оҕолордоох, ыччаттардаах буоламмын бүгүҥҥү күҥҥэ чэпчэки курдук. Кинилэр ситиһиилэринэн саха дьоно сүргэтэ көтөҕүллүө диэн эрэнэбин. Мин спортан букатыннаахтык барбаппын, бу көбүөр тула уолаттарбын уонна сүгүрүйээччилэрбин эһигини кытта бииргэ буолабын", - диэн эттэ.

Үрдүк үктэлгэ дохсун ытыс тыаһынан үһүс кылааска хайыһарга дьарыктаабыт, бастакы тренерин, 80-нус хаарын санныгар түһэрбит ытык киһи Григорий Константинович Дьячковскайы ыҥыран таһааран, киниэхэ уонна кэргэнигэр Анна Степановнаҕа махтанан туран, соҕуруу дойдуга баран эмтэнэллэригэр путевка бэлэхтээтэ.

Иван Прокопьевич долгутуулаах күнүн үөрэнээччилэринээн: "Саха боотура, эн: "Дьулус! Тулуй! Кыай!", - диэн дохсун этиинэн түмүктээтилэр.

Майаҕатта Бэрт Хара, Күүстээх Уйбаан удьуордарын утумнаабыт, кыайыыттан кыайыыны, өрөгөйтөн өрөгөйү, тулхадыйбат дьулууру,  дьоһун санааны, эрэли-эрчими эбэр Уйбаан Белолюбскай ыччат дьоммутугар баай үөрүйэҕин иҥэрэр дьаныардаах үлэтэ ситиһиилээх буоллун.

Ил Түмэн пресс-сулууспата

Тарҕат:

Ырытыыгын суруй

Защитный код
Обновить

Бүтэһик сонуннар