2019 сылга “Азия оҕолоро” успуорт оонньууларын устуоруйатыгар аан бастакытын кыһыҥҥы көрүҥнэргэ күрэстэһиэхтэрэ. Үгэскэ кубулуйбут оонньуу  эһиил  Сахалиҥҥа буолуохтаах.

 

Эһиилги Оонньууларга уопсайа успуорт 8 көрүҥэр илин-кэлин түсүһүөхтэрэ: фигурнай хаҥкылааһын, хоккей, шорт-трек, хайа хайыһарын успуорда, сноуборд, биатлон, хайыһарынан сырсыы уонна хайыһарынан трамплинтан ыстаныы. Билиҥҥитэ күрэхтэһии ыытыллыахтаах сирдэрэ, ыалдьыттары, спортсменнары түһэрии, аһатыы быһаарыллан турар. Маны таһынан куттал суоһаабатын курдук дьаһаллар ылыллаллар. Шорт-трек, биатлон, сноуборд уонна хайыһарынан трамплинтан ыстаныы Бүтүн Арассыыйатааҕы федерациялара успуорт эбийиэктэрин көрбүт-истибит уонна үрдүктүк сыаналаабыт. Билигин Южно-Сахалинскай куорат килбэйэр киинигэр саҥа муус комплекса уонна хайыһар-биатлон киинэ тутулла турар. Маны таһынан Сибииргэ уонна Уһук Илиҥҥэ тэҥнээҕэ суох саамай улахан аквапаарка тутуллар. Оонньуулар кэннэ Южно-Сахалинскай Уһук Илин куруордун киинэ буоларыгар саарбахтаабаттар. Бу дойду килиимэтэ, ичигэс хаардаах кыһына, ыалдьыттары сааппакка көрсөр көстүүнэйдэрдээҕэ, табыгастаах инфраструктууралардаах буолан “Азия оҕолоро” Оонньууну ыытарга толору эппиэттэһэр.

Бу кулун тутар 20-23 күннэригэр Южно-Сахалинскайга Азия дойдуларын олимпийскай кэмитиэттэрин бэрэстэбиитэллэрэ мустан тырааныспар логистикатын, спортсменнары аһатыы, түһэрии хайдах буолуоҕун билсэ кэлиэхтээхтэр. Күн-бүгүн эһиилги “Азия оҕолоругар” 21 судаарыстыба номнуо кыттарга бэлэмнээҕин биллэрбит. Барыллааһын быһыытынан, эһиилги Оонньууларга 27 судаарыстыбаттан 1979 спортсмен кыттара былааннанар. Онньууларга 600-тэн тахса үрдүк таһымнаах, норуоттар икки ардыларынааҕы быраабылаларга эппиэттэһэр судьуйа үлэлиэҕэ. Оонньуулар кэмигэр 16 хайысханан 1000 волонтер үлэлиэҕэ.

Үгэс курдук, “Азия оҕолоро” саҕаланыахтара 100 күн инниттэн Оонньуулар уоттара умайыаҕа уонна Уһук Илин устун айанныаҕа. Оонньуу уотун Саха сиригэр уматыахтара уонна салгыы Уһук Илин куораттарынар кэритиэхтэрэ.

I-кы норуоттар икки ардыларынааҕа кыһыҥҥы “Азия оҕолоро” оонньуулара Южно-Сахалинскай куоракка 2019 сыл олунньу 8-17 күннэригэр ыытыллыаҕа.

 

Тарҕат:

Ырытыыгын суруй

Защитный код
Обновить