Германия футболга биир саамай күүстээх хамаандата “Боруссия” Дортмунд чаҕылхай талаана Марко Ройс сотору-сотору эчэйии ылан үгүстүк эмтэнэргэ күһэллэр.
Былырыын “Боруссия” Д Германия кубогар кыайыылаах тахсыбыта эрээри, Ройс үөрүүлээх кыайыыны бэлиэтиир оннугар суһаллык эмтэнэ барарга тиийбитэ. Быраастар “тобугар кириэстиҥи силгэтэ быһа барбыт (частичный разрыв крестообразных связок колена)” диэн диагноз туруорбуттара. Эпэрээссийэ кэннэ 8-9 ыйга футболлуурун булгуччулаахтык боппуттара.
Кыһыылааҕа диэн Марко Ройс Кубок финалын иннигэр аҕай уһун кэмнээх эмтэниини ааспыта эбээт. 3 сылы быһа араас эчэйиини ылан, уопсайа, 500 күн эмтэммитэ. Инньэ гынан, Германия хомуур хамаандатыгар эмиэ ыҥырыллыбатаҕа.
Дьиҥинэн ити өссө 2014 сыллааҕы Аан дойду Чемпионата буолуо 6 күн инниттэн саҕаламмыта. Кини бу турнирга кыттыбыта буоллар, хайаан да бэйэтин үчүгэй эрэ өттүттэн көрдөрүөхтээх этэ. “Боруссия” састаабыгар чаҕылхай оонньууну көрдөрбүтэ, 2013/14 сезонун 44 матчыгар «гол+пас» систиэмэнэн 43 (23+20) очукуолааҕа, “сборнай” күүстээх оонньооччуларын ахсааныгар киирэрэ.
Германия хамаандата Бразилияҕа көтүөн биир күн иннинэ Арменияны кытта табаарыстыы матчка киирсибитэ. Бу оонньуу кэмигэр Ройс хаҥас бэрбээкэйин силгэтин өлөрбүтэ – салгыы кыайан турбатаҕа. Икки ый эмтэнии. Бу спортсмеҥҥа улахан охсуу буолбута. Германия Футболга сойууһа Аргентинаны утары финалга ыҥырбыта эрээри, Ройс аккаастаммыта. Интервью аайы мантраны хатылыыр курдук: “Мин ити туһунан умнуохтаахпын. Салгыы барыахпын наада”, -- диирэ.
2014 с. кэннэ Марко Ройс сезон аайы хастыы да ыйга эмтэнэ барарга күһэллэр. Онтон үтүөрэн таҕыста даҕаны, туох да буолбатаҕын курдук чаҕылхайдык оонньоон барар. Бундеслигаҕа “Боруссия” иһин көрдөрүүтэ: 130 матчка – 101 результаттаах оонньуу. 2018 с. олунньу 10 күнүгэр – 8 ый буолан баран – хонууга төнүннэ. Түөрт оонньуу тухары хайыы үйэ 3 голлаах.
- Олус ыарахан кэрдиис кэм этэ. Мэлдьи соҕотоҕун дьарыктанар, үлэлиир киһи уйулҕатыгар сүрдээх охсуулаах. Топ-футболистар улахан харчыга сылдьаллар эрээри, сороҕор ол туһугар ыараханнык төлөһөллөр, доруобуйаларын толук ууран туран, – диэн Ройс билинэр. – Доруобуйа уонна сөбүлүүр дьарыгым – футбол – туһугар ханнык да харчыны кэрэйиэм суох этэ.
Ройсу футбол ыалдьааччылара наһаа сөбүлүүллэр. 2013 с. Лига чемпионов кэннэ Европа топ-кулууптара үөрүүнэн ыларга бэлэмнэрэ, ол эрээри кини түгэн эрэ көһүннэр “Боруссияттан” баран хаалбатаҕа. Бу иһин “Боруссия” ыалдьааччылара Ройсу бэриниилээх буолуу символын курдук көрөллөр.
Ыам ыйыгар 29 сааһын туолар футболист кулун тутар 9 күнүгэр “Боруссияны” кытта хантараагын 2023 сылга диэри уһатан биэрдэ. Билигин Ройс бары күүһүн эмтэниигэ уонна сөптөөх бэлэмнэниигэ уурар. Кини дьаныардаах эрчиллии уонна күүстээх санаа көмөтүнэн эрдэ мүччү туппутун ситиһиэ диэн эрэнэбит. Быйыл Арассыыйаҕа буолуохтаах Аан дойду чемпионатыгар кэлэрин күүтэбит.
- Мин ЧМ-2018 оонньуурга улахан баҕалаахпын. Тириэньэрим ханнык быһаарыныыны ыларын көрүөхпүт. Ол эрэн бииргэ эрэллээхпин – бу турниры эчэйии туһуттан көтүтүөм суоҕа, – диир Ройс.
matchtv.ru
