Сандал саас кэлэн, күн уота чаҕылыччы тыган дьон-сэргэ күргүөмнээн чэбдик салгыҥҥа, киэҥ дуолга таласта! Уһун тымныы устата дьиэҕэ-уокка хаайтарбыт кут-сүр көҥүлгэ тардыста, бугуһуйбут эт-хаан эрчимнээх хамсаныыны, эрчиллиини эрэйдэ!
Ол курдук мин эмиэ сандал саас чаҕыл күннэрин мүччү туппакка эмиэ, хайыһар быракаата арыллыбытын истээт Күөх Хонууга ыстаннардым. Үлэбиттэн быыс булан, кыл мүччү эбиэт кэмигэр баран биир эргиири эргийэн кэллим. Бу үчүгэйиэн сибиэһэй сааскы салгын, арыый да сайа охсор сааскы тыал, киэҥ-куоҥ киһи төһө баҕар көҥүл көтөр-дайар Күөх Хонуута! Туох эрэ уһун, тымныы кыһын устата хам тута сылдьыбытыттан босхоломмут буоллум кырдьык, төлөрүйдүм.
Төһө да үлэ күнэ буоллар, дьон-сэргэ син балай эмэ баар. Иннибэр үс бэһиэлэй, үөрбүт-көппүт кыргыттар кинилэри хаартыскаҕа түһэрэргэ көрдөстүлэр. Үөрүүнү кытта сөбүлэстим. «Наһаа үчүгэй, сынньанныбыт ахан, астык!», - дэһэллэр кыргыттар. Оруобуна «Кыым» хаһыат саайтыгар матырыйаал таһарарбар хайыһардыы сылдьар дьон хаартыската наада диэбиппэр кыргыттар күлэ-күлэ хаартыскаҕа сөбүлэстилэр.
Хайыһар быракаатын сыаната:
Улахан дьоҥҥо 1 чааһа – 300 мөһөөх
Оҕолорго 1 чааһа – 200 мөһөөх
Үлэлиир чааһа сарсыарда 8 – тан, түүн 12 чааска диэри.
“Ама дуу, түүннэри үлэлиигит дуу”? – диэн быракаат үлэһитэ уолтан ыйыппыппар. “Төгүрүк суукканы быһа, дьон түүннэри да кэлээччилэр,” – диэн этэн соһутта.
Онон, бугуһуйбут дьон кытаатыҥ, хайыһар кэмэ саҕаланна! Туругурдун чөл олох, чэбдик салгын, хайыһар!
Чаҕыл
