Новгород уобалаһыгар Улуу Кыайыыга уонна Ильмень күөлгэ хорсун быһыыларын көрдөрбүт саха буойуттарын сырдык кэриэстэригэр анаан иккис төгүлүн ыытыллар чэпчэки атлетикаҕа сүүрүү саҕаланар. Түөрт күн иһигэр, ыам ыйын 4 – 7 диэри, спортсменнар уопсайа 260 км сүүрүөхтээхтэр, диэн иһитиннэрэр Vnru.ru саайт.
Ильмень күөлү туорааһыҥҥа уонна онтон да атын Старорусскай оройуон сирдэрин ниэмэс фашист халабырдьыттарыттан босхолуур байыаннай эппэрээссийэлэргэ ( 1943 сыл олунньу ыйыттан – кулун тутарга диэри), 400 – тэн тахса саха саллаата сырдык тыынын толук уурбута.
Сүүрүү кыттыылаахтарын ортотугар: Ильмень кыргыһыытын кыттыылаахтарын сыдьааттара, уонна Арассыыйаҕа марафонунан сүүрүүгэ биэс төгүллээх чемпион Сардаана Трофимова. Сүүрүү инники күөнүгэр сылдьыаҕа - Саха сирин физическай култууратын уонна успуордун үтүөлээх үлэһитэ Дмитрий Горохов. Сүүрүү сүрүн тэрийээччитэ уонна көҕүлээччитэ кини бэйэтэ буолар.
Быйыл итиэннэ патриотическай сүүрүүгэ Новгород спортсменнара кытталлар. Улуу Новгород куоракка тиийиилэригэр, саха сирин сүүрээччилэригэр олохтоох «NovgorodRun» успуорт кулуубун спортсменнара кыттыһыахтара. Ону таһынан өссө 40 Старорусскай оройуон үөрэнээччилэрэ ыам ыйын 7 күнүгэр бүтэһик финиш кэрдиис сүүрүүгэ кыттыыны ылыахтара.
