Сырдык мөссүөнэ мэлдьи тыыннаах...

Олоҕун сыллара: 13.02.1957 - 20.03.2022

Подробности

Биһиги аймах дириҥник ытыктыыр, истиҥник саныыр күндү киһибит, тапталлаах балтыбыт, эдьиийбит, ийэбит, эбэбит, үлэ бэтэрээнэ, “Сэбиэскэй потребкооперация туйгуна”, "Арассыыйа потребительскай кооперациятыгар килбиэннээх үлэтин иһин" анал бэлиэлэрдээх Степанова Розалия Иннокентьевна бу Орто дойдуттан барбыта 2023 с. кулун тутар 20 күнүгэр биир сылын туолла.

Розалия Иннокентьевна 1957 с. олунньу 13 к. Бэрдьигэстээххэ күн сирин көрбүтэ. Төрөппүттэрэ холкуос-сопхуос туруу үлэһиттэрэ буолан, оҕо сааһыттан хара үлэҕэ эриллэн улааппыта. 1974 с. оскуоланы бүтэрэн баран Бэрдьигэстээххэ почтальоннаабыта. 1976 с. Ленскэй куоракка СПТУ-га бэрэдэбиэс үөрэҕин бүтэрбитэ. Бэрдьигэстээххэ хаһаайыстыбаннай маҕаһыыҥҥа үлэҕэ киирбитэ. 1981–1983 сс. универмагка сэбиэдиссэйдээбитэ. 1983–1993 сс. РайПО киин ыскылаатын сэбиэдиссэйинэн, 1996 с. РайПО-ҕа буҕаалтырынан, 1997 с. кыл. буҕаалтыр солбуйааччынан, 1999 с. РайПО үбүн отделын начаалынньыгынан, 2000 с. РайПО иһинэн тэриллибит "Пригорное" тэрилтэҕэ кыл. буҕаалтырынан, 2002 с. "Байдам" ХЭТ тэрилтэҕэ маҕаһыын сэбиэдиссэйинэн 2009 с. бочуоттаах сынньалаҥҥа тахсыар диэри таһаарыылаахтык үлэлээбитэ-хамсаабыта. Кини улууһун сайдыытыгар киллэрбит үтүө суобастаах, үрдүк ситиһиилээх үлэтин элбэх бочуотунай кыраамата, дьупулуом, Махтал сурук кэрэһилиир.

Розалия Иннокентьевна эдэриттэн нэһилиэнньэ уопсастыбаннай олоҕор актыыбынайдык кыттара. Сүрүн үлэтин таһынан, араас субуотунньукка, сопхуоска от үлэтигэр, сиилэс угуутугар, сүөһү үлэһиттэрин солбуйууга сылдьара. Бэрдьигэстээх нэһилиэгин Сэбиэтин икки ыҥырыытыгар дьокутаатынан талыллыбыта.

Күндү киһибит Розалия Иннокентьевна төрөппүттэрин утумнаан, киэҥ-холку, үтүө, аһыныгас майгылааҕа, дьону кытта уопсай тылы булара, өрүү көмөлөһөрө. Күлэ-үөрэ, мичилийэ сылдьара, санаатын түһэрбэт олоххо күүстээх тардыһыылааҕа. Төрүттэрин, дьоннорун ааттарын үйэтитээри 2015 с. "Өтөх төҥүргэстээх, үтүө дьон олоҕун утума салҕанар" диэн төрүттэрин, чугас дьонун кэриэстиир кинигэни таһаартаран хаалларбыта.

Розалия Иннокентьевна дьиҥ сахалыы тыыннаах, олус аймаҕымсах, үтүө мааны киһи этэ. Дьонун, аймахтарын туһугар төһөлөөх көмөнү, сүбэни биэрбитин ааҕан сиппэккин. Кини дьоҥҥо үтүө санаата, аймахтарыгар көмөлөспүтэ үйэлэргэ үтүө тылынан ахтылла туруоҕа. Сырдык мөссүөнэ биһиги сүрэхпитигэр, өйбүтүгэр мэлдьи тыыннаах буолуоҕа, үтүө тылынан ахта, махтана, өрүү өйдүү сылдьыахпыт.