Күндү киһибит, сүрэхпитигэр өрүү тыыннааххын...
- Олоҕун сыллара: 06.12.97 - 07.01.2023
- Подробности
Тапталлаах оҕобут, бырааппыт, убайбыт, 3 уол амарах аҕата, тапталлаах кэргэн Потапов Михаил Леонидович Орто дойду олоҕуттан букатыннаахтык баран, дойдутун ийэ буоругар кистэммит күнүттэн аахтахха, бу дьыл муус устар 13 күнүгэр 40 хонуга туолла.
Миша 1997 сыл ахсынньы 6 күнүгэр элбэх оҕолоох Потаповтар (Луиза Петровна, Леонид Михайлович) дьиэ кэргэннэригэр сэттис оҕонон Маар Күөл нэһилиэгэр күн сирин көрбүтэ. 2000 сыллаахха аҕабыт дойдутугар көһөн, оҕо сааһа онно ааспыта. 2005–2015 Дьаархан орто оскуолатын ситиһиилээхтик үөрэнэн бүтэрбитэ. Үөрэнэр кэмнэригэр кылаас, оскуола чиэһин көмүскээн, элбэх спортивнай күрэххэ кыттара. Уол оҕо буолан, туох да үлэттэн толлубат, дьиэ ис-тас үлэтигэр төһүү күүс буолара. Кыра сааһыттан сылгыны олус сөбүлээн, сылгыһыттары сырса сылдьан ат миинэн, Станислав Архипов эрчийиитинэн ат сүүрдэр идэлэммитэ. Кириэстээх нэһилиэгин сүүрүк аттарын сүүрдэн, ыһыахтары кэрийэн, элбэхтик кыайыы өрөгөйүн билбитэ. Тиэхиньикэҕэ олус сыһыаннааҕа, хайдах да алдьаммыт тиэхиньикэни оҥостон, иннин ылан сүүрдэрин сөбүлүүрэ, күннүктээн гарааска сылдьар буолара. Оҕону кытта оҕо, кырдьаҕаһы кытта кырдьаҕас буолан, тэҥҥэ алтыһан, мэлдьи көмө-имэ буолара. Олоҕун аргыһа Гутялыын 2015 сыллаахха ыал буолан, оҕо-уруу төрөтөн, ньир бааччы орто ыал сиэринэн Дьаархаҥҥа олорбуттара. 2015 сыллаахха ытык иэһин толоро Амурскай уобалас Свободнай куоратыгар в/ч 03415 50-с тимир суол туспа биригээдэтигэр сулуспалаан «водолаз-понтонщик» идэтин баһылаан кэлбитэ. 2016 сыллаахха дойдутугар кэлэн, ГУП ДьУоХХ хачыгаарынан үлэтин саҕалаабыта. Оҕобут эдэр сааһыгар суох буолуон эрдэттэн билбит-сэрэйбит курдук, эрдэ ыал буолан, аатын ааттатар уол оҕолордонон, орто киһи сиэринэн кылгас олоҕун дьоллоохтук олорон ааста.
Олунньу 17 күнүгэр биһиги дьиэ кэргэҥҥэ ыраас халлааҥҥа этиҥ эппитинии, эмискэ ыар сурах дууһабытын аймаабыта.
Миша бу сыл тохсунньу 7 күнүгэр Артемовскай (Бахмут) куоракка СВО-ҕа ытык иэһин толоро сылдьан дьоруойдуу сырдык тыына быстыбытын иһитиннэрдилэр. Айманан, кэлэр-барар сир булбакка, айылҕаттан айдарыылаах көрбүөччү Роман Сергеевичтиин билсэн, кэпсэтэн, кини сүбэтин ылынан, оҕобут суола ыраастанан, аһыллан, бу күннэргэ тиийэн кэлиэн, оҕобутун сүтэрбиппитин өйбүтүнэн-санаабытынан эрэ буолбакка, сүрэхпитинэн ылынан кутун көрдөһөн ыҥырарбытыгар сүбэлээн, аймаммыт дууһабытын арыый да уоскуппута. Ол курдук, оҕобут Новосибирскай куоракка ыйтан ордук дойдутугар кыайан кэлбэккэ сытан баран, олунньу 28 күнүгэр Новосибирскай–Москуба–Мииринэй–Дьокуускай–Ньурба–Сунтаар морсуруутунан уһуннук өр айаннаан, кулун тутар 4 күнүгэр оҕобут көмүс уҥуоҕун тутан, дьэ уоскуйбуппут. Роман Сергеевич аймана сылдьар кэммитигэр үтүө сүбэһит буолбутугар махтанабыт!
Сөмөлүөтү көрсөн хоруобун көтөхсүбүт убайдара Станислав, Анатолий Семеновтарга, Александр Сергеевичкэ авиапорт үлэһиттэригэр, дойдутугар сыыҥка хоруоптан мас хоруопка көһөрөргө көмөлөспүт, Олоҥхо дьиэтин дириэктэрэ Алексей Дмитриевичкэ махталбыт муҥура суох. Сунтаар нэһилиэгин баһылыга Эдуард Егорович көрдөһүүтүнэн сыыҥкабай хоруобу аһан көмөлөспүт Царство Божье сиэркэп итэҕэллээхтэригэр Михаил Васильевичка, Олег Иннокентьевичка махтанабыт!
Кулун тутар 5 күнүгэр төрөөбүт Сунтаарын буоругар оҕобут көмүс уҥуоҕа кистэннэ. Оҕобут тиһэх суолун тэрийэн, салайан ыыппыт убайбыт Валерий Иннокентьевичка улахан махталбытын тиэрдэбит.
Бу ыарахан кэммитигэр аттыбытыгар өрүү бииргэ буолбут аймах дьоммутугар, оҕобут үөрэммит оскуолатын кэлэктиибигэр (дириэктэр Гамапета Сергеевна) үлэлии сылдьыбыт Дьаарханнааҕы ДьУоХХ кэлэктиибигэр (маастар Арсен Анатольевичка) Дьаархан олохтоохторугар, бииргэ үөрэммит кылааһын оҕолоругар (кылаас салайааччыта Наталья Иннокентьевна) суох буолуоҕуттан сүүрэн-көтөн көмөлөспүт Дьаархан олохтоох администрациятыгар (баһылык Петр Вячеславовичка), улууспут баһылыга Анатолий Васильевичка, соц.бэлиитикэҕэ улуус баһылыгын солбуйааччы Гаврил Михайловичка, нэһилиэк баһылыга Эдуард Егоровичка, Сунтаар бойоҥкуома Игорь Семеновичка, посредник Семен Тимофеевичка, “Кыл-сиэл, туос абылаҥа” өрөспүүбүлүкэ иистэнньэҥнэрин, маастардарын бөлөҕөр, Сунтаардааҕы киин балыыһа кылаабынай бырааһын солбуйааччыта Константин Владимировичка, идэлээх сойууһугар (салайааччы Степан Васильевич Тихонов), оҕо, төрүүр дьиэ, тэрэпиийэ отделениеларын кэлэктиибигэр, “Матери России” уопсастыбаннай хамсааһын Сунтаардааҕы филиалын бэрэссэдээтэлэ Дария Михайловнаҕа, «АВТОРИТЕТ» бөлөх салайааччыта Дмитрий Альбертовичка, Сунтаардааҕы 3 №-дээх оскуола кэлэктиибигэр (дириэктэр Андрей Николаевич), Маар Күөл орто оскуолатын кэлэктиибигэр (дириэктэр Люция Семеновнаҕа), ийэтин-аҕатын бииргэ үөрэммит доҕотторугар, уҥуоҕун оҥорбут Игорь, Гаврил Трифоновтарга, Ростислав Валерьевичка, Сунтаардааҕы ГУП ДьУоХХ кэлэктиибигэр (салайааччы Михаил Юрьевичка), Дьаархан орто оскуолатын 2004 с., 2010 с. выпустарыгар, чугас аймах дьоммутугар бу ыарахан кэммитигэр күүс-көмө, өйөбүл буолбуккутугар барҕа махталбытын тиэрдэбит. Баҕарабыт эһиэхэ ыраас эйэлээх халлааны, дьаҥ-дьаһах ыалласпатын, дьол-соргу аргыстастын!
Ийэтэ, аҕата, бииргэ төрөөбүттэрэ, кэргэнэ, оҕолоро.