Сивцева Анастасия Васильевна

Олоҕун сыллара: 25.01.1938 - 29.12.2019

Подробности

Күндү ийэбит, эбэбит өйбүтүгэр-сүрэхпитигэр...

Күндүтүк саныыр ийэбит, эбэбит, хос эбэбит, Мэҥэ Хаҥалас улууhун Наахара нэhилиэгин бочуоттаах олохтооҕо, үлэ бэтэрээнэ, СӨ доруобуйатын харыстабылын туйгуна Сивцева Анастасия Васильевна уhун ыарахан ыарыыттан 81 сааhыгар биhиги кэккэбититтэн туораабыта бу сыл олунньу ый 6 күнүгэр 40 хонугун туолла.

Анастасия Васильевна 1938 сыллаахха тохсунньу 25 күнүгэр Уус Майда оройуонун Майда нэhилиэгэр Василий Николаевич уонна Мария Павловна Атласовтар дьиэ кэргэннэригэр төрөөбүтэ. Аҕата Василий Николаевич Атласов 1943 сыллаахха Аҕа дойдуну көмүскүүр Улуу сэриигэ ыҥырыллан барбыта, сэрии толоонуттан төннүбэтэҕэ.

Анастасия Васильевна 1956 сыллаахха орто оскуоланы бүтэрээт, эмчит буолуон баҕаран, биэлсэр идэтин талан, Дьокуускай куоракка медучилищеҕа үөрэнэ киирэр. Үөрэҕин 1958 сыллаахха бүтэрэн баран, Мэҥэ Хаҥалас Наахаратыгар ананан учаастактааҕы балыыhаҕа үлэтин саҕалыыр. Маҥнай ол саҕана киэҥник тарҕаммыт трахома уонна лиистик курдук сыстыганнаах ыарыылары эмтииргэ күүстээх үлэни ыыппыта, трахоманы суох гынарга дьоһун кылаатын киллэрбитэ. Наахара балыыhатыгар биэлсэрдиир, нэhилиэнньэни эмтиир, 1962-1964 сылларга сэбиэдиссэйдиир. Доруобуйа харыстабылыгар эҥкилэ суох үлэтин иhин 1965 сыллаахха Саха АССР Үрдүкү Сэбиэтин Бүрүсүдьүүмүн Бочуотунай кыраамататынан наҕараадаламмыта.

Наахара нэhилиэгин олохтооҕо Сивцев Модест Гаврильевичтыын 1963 сыллаахха     ыал буолаллар, 5 оҕону төрөтөн, иитэн, улаатыннаран, үөрэхтээн атахтарыгар туруораллар. Аҕабыт Модест Гаврильевич хомуньуус буолан, 1976 сыллаахха баартыйа райкома Дьоруой Попов аатынан сопхуоска кылаабынай мэхээнньигинэн аныыр. Ийэбит Анастасия Васильевналыын 5 оҕолорун илдьэ Төхтүргэ көhөллөр, онно биэлсэрдээн, эйэҕэс майгытынан, киэҥ билиитинэн, кыhамньылаах үлэтинэн   дьон - сэргэ ытыктабылын ылбыта. Аҕабыт 1980 сыллаахха Майаҕа Сельхозтехникаҕа хааччыйар отдел салайааччытынан анаммытыгар ийэбит Майаҕа оҕо консултаассыйатыгар патронаж сиэстэрэнэн үлэлии киирбитэ. Ол саҕана оҕо төрөөhүнэ элбэх этэ. Анастасия Васильевна барыларын дьиэлэринэн сылдьан, ис сүрэҕиттэн   кыhаллан туран көрөрө-истэрэ, хас биирдии оҕо быһыытын кэмигэр ыларыгар олус ирдэбиллээҕэ. Майа олохтоохторо ийэбитин ыарыhахха үтүө санаалаах, сымнаҕас сыhыаннаах эмчит быhыытынан билинэллэрэ. Түбүктээх эмчит үлэтин таhынан олохтоох Сэбиэт дьокутаатынан, төрөппүт кэмитиэтигэр үлэлиирэ; нэhилиэк иhинээҕи тэрээhиннэргэ көхтөөхтүк кыттара. Үрдүк көрдөрүүлээх үлэтин иhин «Ударник социалистического соревнования» бэлиэни туттарбыттара.

1984 сыллаахха дойдуларыгар — Наахараҕа — төннөн кэлэн аҕабыт сопхуоска кормопроизводство салайааччытынан, ийэбит балыыhаҕа патронаж сиэстэрэнэн 1990 сыллаахха диэри олус бэриниилээхтик үлэлээбиттэрэ. Ийэлээх аҕабыт биэнсийэҕэ тахсан баран, сиэннэрин көрсөн, оҕолоругар күүс-көмө буолбуттара. 1999 сыллаахха аҕабыт Модест Гаврильевич ыарахан ыарыыттан олохтон туораабыта.

Биhиги ийэбит олус ыалдьытымсах, өрүү кимиэхэ эмэ сүбэ-ама биэрэр, наада тирээтэҕинэ, күүс-көмө буолар майгылааҕа. Дьиэтэ өрүү ыраас, сылаас, остуола мэлдьи минньигэс бурдук астаах буолааччы. Сайын аайы куораттан тапталлаах Наахаратыгар сайылыы тахсан, оҕуруот аhын олордон, сибэкки үүннэрэн, дьиэ таhынааҕы ыкса ыалларын кытта олус тапсан дуоhуйа сайылыыра.

Биhиги ийэбит Анастасия Васильевна бу Орто дойдуга дьоhуннаах, дьоллоох олоҕу олорон ааста. Күндү ийэбит, эбэбит, эн биhиги өйбүтүгэр-сүрэхпитигэр өрүү тыыннаах буолуоҥ. Олорбут олоххун оҕолоруҥ, сиэннэриҥ, хос сиэннэриҥ салгыы туруохтара.

Оҕолоро, сиэннэрэ, кийииттэрэ, күтүөттэрэ, хос сиэннэрэ.