Черов Валерий Дмитриевич

Олоҕун сыллара: 05.10.1953 - 04.02.2017

Подробности

Ахтар-саныыр киҺибит

Ахтар-саныыр киһибит, тапталлаах кэргэн, аҕабыт, убаастыыр күтүөппүт Черов Валерий Дмитриевич ыарахан ыарыыттан эмискэччи күн сириттэн күрэммитэ бу дьыл олунньу 4 күнүгэр үс сылын туолла. Валерий Дмитриевич Муома оройуонун Соболоох бөһүөлэгэр 1953 с. алтынньы ый 5 күнүгэр Черовтар дьиэ кэргэттэригэр үһүс оҕонон төрөөбүтэ. Соболоох оскуолатын 8 кылааһын бүтэрэн, 1974 с. Уус Алдан оройуонугар Суоттутааҕы СПТУ-га суоппар үөрэҕэр киирэр. Бүтэрэн, дойдутугар «Муома» сопхуоска суоппардыыр. Үлэлии сылдьан 1977 с. аармыйаҕа наводчигынан 2 сыл сулууспалаан, ытык иэһин төлөөн кэлэр. Дойдутугар үлэтин салҕаан суоппардыыр, 1980 с. хомсомуолга киирэр, онтон салгыы баартыйа кэккэтигэр киирэр. Үлэтэ сыаналанан, хас да төгүл соц. куоталаһыы кыайыылааҕа, үлэ удаарынньыга буолар. Элбэх кырааматанан, хас да анал бэлиэнэн наҕараадаламмыта.

1990 сыллаахха олоҕун аргыһын Татаринова И.Н. көрсөн 1991 с. Мэҥэ Хаҥаласка, Матта бөһүөлэгэр кэлэн олохсуйаллар. Дьиэ-уот туттан сопхуоска улахан массыыналарга үлэлии киирэр. Үс оҕоҕо күн сирин көрдөрөн, 2000 с. кэргэнин дойдутугар — Уус Алдан Бэйдиҥэтигэр — көһөн киирэллэр. Онно эмиэ суоппарынан олох-дьаһах хомунаалынай хаһаайыстыбатыгар, чох, ньиэп таһыытыгар Сыырдааҕынан, Курбуһаҕынан, Арыылааҕынан, Бэйдиҥэнэн үтүө суобастаахтык үлэлээбитэ. Кэнники сылларга бодобуоска суоппардаабыта, хочуолунайдары, нэһилиэнньэни уунан хааччыбыта, биэнсийэҕэ тахсан үлэ бэтэрээнэ буолбута.

Күндү киһибитин, аҕабытын, кэргэммин сүтэрбит күммүт тэрээһинин сүүрэн-көтөн тэрийбит чугас аймахтарбытыгар Татаринов А.Н., Трифонов М.Е. уонна Светаҕа, Ираҕа, Далиманаҕа, Майаҕа, Аленаҕа, Гуляларга, Розаҕа, Янаҕа махталбытын тиэрдэбит. Бииргэ үлэлээбит кэлэктиибин дьонугар (начаалынньык Никитин С.Е.), нэһилиэк баһылыгар (Сивцев Н.Н.), оскуола кэлэктиибигэр (дириэктэр Артамонов И.В.), оҕолорум учууталларыгар, табаарыстарыгар, биэлсэрбит Иванова М.Л., бары аймахтарбытыгар, ытык кырдьаҕаспыт Говоров Уйбаан оҕонньорго, бииргэ үөрэммит оҕолорум Саввин А.Н., Пестряков М.И., Артамонов Я.Я., уонна Андросов И.С., Андросов Д.С., Крылов Тимофейга, Никонов А., нэһилиэкпит үтүө санаалаах дьонугар, чугас ыалларбытыгар барҕа махталбытын тиэрдэбит. Күндү кэргэним, аҕабыт, эн сырдык мөссүөҥҥүн тыыннаахпыт тухары умнуохпут суоҕа.

Кэргэнэ, оҕолоро, аймахтара.