Биһиги дьиэ кэргэн тапталлаах аҕабыт, эһэбит, Үөһээ Бүлүү улууһугар өр кэмҥэ дерматолог бырааһынан, суут-мэдиссиинэ эспиэринэн үлэлээбит СӨ доруобуйатын харыстабылын туйгуна, СӨ култууратын туйгуна, «Гражданскай килбиэн» бэлиэ хаһаайына, «СӨ Ис дьыала министиэристибэтин бочуота», «СӨ бочуоттаах бэтэрээнэ» бэлиэлэр хаһаайыннара, Үөһээ Бүлүү сэлиэнньэтин бочуоттаах олохтооҕо, «Сэлиэнньэ ытык ыала» анал аат хаһаайына, хомсомуол, үлэ бэтэрээнэ, улуустааҕы «Олоҥхо» норуот тыйаатырын артыыһа Васильев Василий Егорович бу сыл олунньу 4 күнүгэр уһун, ыарахан ыарыыттан күн сириттэн барыбыт сүрэҕин хайытан туораата.

Василий Егорович сэрии аас-туор кэмигэр, 1943 с. элбэх оҕолоох дьиэ кэргэҥҥэ төрөөбүтэ. Оччолорго тастыҥ убайа Васильев Егор Никифоровичтаах оҕолоро суох буолан, кырачаан уолу бэйэлэригэр ииттэргэ көрдөөн ылбыттар. Ийэлээх аҕатын тапталыгар бигэнэн, кыра эрдэҕиттэн дьиэ-уот, сүөһү көрүүтүн үлэлэригэр сыстаҕас буола улааппыта. Оскуолаҕа ССРС норуодунай учуутала Михаил Андреевич Алексеевка үөрэнэр дьолломмута. Кини быраас буоларга дьоҕурун учуутала оччолортон бэлиэтии көрөн, Васяны бу идэҕэ үөрэнэригэр өрүү сүбэлиирэ үһү.

1963 сыллаахха Ийэ дойдутугар ытык иэһин толорон, Камчаткаҕа аармыйа кэккэтигэр сулууспалаан, 3 сылынан сержант сыбаанньалаах төннүбүтэ. Бу кэннэ учууталын сүбэтин эркээйи оҥостон, 1968 сылтан 1974 сылга диэри Киргизияҕа Фрунзетааҕы Мэдиссиинэ судаарыстыбаннай институтун эмп-томп факультетын бүтэрбитэ. Үөрэҕин бүтэрээт, кылгас кэмҥэ Дьокуускайга, Алдан оройуонугар үлэлии сылдьыбыта.

1978 сылтан 2018 сыл бүтүөр дылы эмчит аналын ситиһиилээхтик толорбута. 1977 сыллаахха олоҕун доҕорун, үйэтин тухары таҥара оҥостон таптаабыт кэргэнэ Анна Дмитриевналыын ыал буолан, үс кыыс оҕоҕо күн сирин көрдөрбүттэрэ. Ыал аҕатын быһыытынан биһиги аҕабыт сатаабатаҕа диэн суоҕа. Дьиэ ис-тас үлэтэ диэн араарбат олус бүгүрү аҕа, эһэ этэ. Оҕолорун, сиэннэрин ис сүрэҕиттэн таптыыра, хаһан да кыыһыран тымтан, мөҕө сылдьыбат сымнаҕас, бэһиэлэй, уйаҕас майгылааҕа. Киһиэхэ киһилии, аһыныгас сыһыаннаах буоларга өрүү үөрэтэрэ, такайара, быһаарыылаах түгэннэргэ кини сүбэтэ өрүү ыллыктаах, кэскиллээх буолара, ханнык да кыһалҕаттан син биир быыс-хайаҕас тобулар күүстээх санаалааҕа.

Быраас быһыытынан олус киэҥ билиилээҕэ, киниэхэ эмтэнэн үтүөрбүт, махтаммыт дьон ахсаанын ааҕан сиппэккин. Бу уустук үлэтин таһынан, 1992 сылтан суут-мэдиссиинэ эспиэринэн түүннэри-күнүстэри үлэлиирэ. Тимир үстүрүмүөннэрдээх чымадаанын бэйэтэ сүгэн-көтөҕөн, суола-ииһэ суох сирдэргэ сатыы да тиийэн, өлбүт киһини көрөрө. Кини ыыппыт кырдьыктаах чинчийиилэригэр олоҕуран, эспэртиисэ түмүгэ суукка хаттаан көрүллүбэт этэ. Дьоҥҥо хайдах курдук аһыныгаһын, ыар күннэригэр төһөлөөх көмөнү оҥорбутун билигин, суох буолбутун эрэ кэннэ истэбит. Оҥорбут үтүөтүн туһунан кини биһиэхэ хаһан да кэпсээбэт буолара…

Аҕабыт айылҕаттан бэриллибит кылыһахтаах, олус чөллөркөй куолаһынан туойан доллоһутарын өрөспүүбүлүкэ үгүс олохтоохторо сөҕө-махтайа истэллэрэ, киэн тутталлара. Оройуон ыһыахтарын элбэхтик арыйсыбыт тумус туттар киһилэрэ этэ. Саҥа дьыл кэллэ да, кырачааннарга үөрүүнү бэлэхтиир Тымныы Оҕонньор буолан, «Солбуллубат Дед Моруос» диэн норуодунай аат киниэхэ чиҥник иҥэриллибитэ.

    Күндүттэн күндү, өйөбүл-тирэх киһибит, тапталлаах аҕабыт, эһээбит Васильев Василий Егорович туһунан «этэ» диир олус ыарахан. Арай кини туһунан биһиги уонна бар дьонун сылаас таптала, киэн туттуута, сүгүрүйүүтэ уонна билиниитэ сүрэхпитигэр өрүү тыыннаах буолуоҕа. Кини ситиспэтэҕин оҕолоро, сиэннэрэ ситиһиэхпит, аҕабыт сырдык аатын өрүү үрдүктүк тутуохпут.