Войти

Войти

Иванов Владимир Ильич

Олоҕун сыллара: 1934-2020
 

ТАПТАЛЛААХ КҮНДҮ КИҺИБИТ

Таптыыр кэргэним, аҕабыт, эһэбит, Амма нэһилиэгин бочуоттаах олохтооҕо, «Амма» сопхуос Амматааҕы биригээдэтигэр первичнэй, партийнай тэрилтэ сэкирэтээрэ, «Хомсомуол 100 сыла» уордьан кавалера, үлэ, тыыл бэтэрээнэ, «Амма киэн туттуута» бэлиэлээх, Саха сирин тыатын хаһаайыстыбатын үтүөлээх үлэһитэ, каадырабай булчут, Саха сирин успуордун үтүөлээх үлэһитэ, успуорт судьуйата, Амма нэһилиэгин Сэбиэтин биэс ыҥырыытын дьокутаата

Иванов Владимир Ильич

бу дьыл ыам ыйын 19 күнүгэр 86 сааһыгар уһун ыарахан ыарыыттан олохтон туораабытын туһунан билэр дьонугар дириҥник курутуйан туран иһитиннэрэбит.

Владимир Ильич Иванов 1934 с. тохсунньу 13 күнүгэр Бүлүү оройуонугар Иккис Чочу нэһилиэгэр 4 оҕолоох Ивановтар дьиэ кэргэҥҥэ төрөөбүтэ. Ийэтэ бэлитсыылынай поляк кыыһа, аҕата холкуостаах саха эрдэ өлөннөр, Володя эһэлээх эбэтигэр иитиллибитэ. Сэрии сут-кураан сылларыгар тулаайахтары эһэлэрэ Алексей Николаевич Иванов булчут буолан тыыннаах хаалларбыта. Бииргэ төрөөбүттэриттэн Володя соҕотох хаалбыта.

Владимир Иванов Н.Г. Чернышевскай аатынан холкуоска саха оҕотун сиэринэн кыратыттан араас үлэҕэ элбэх көлөһүнүн тоҕон борбуйун көтөхпүтэ. Оскуола кэнниттэн 1953 сыллаахха Сахалиҥҥа ПВО (салгынтан көмүскэнии) чааһыгар планшетист идэлэнэн, Сэбиэскэй аармыйаҕа сулууспалаабыта.

Аармыйа кэнниттэн Дьокуускайга кэлэн “Якутстройтрест” тэрилтэтигэр киирбитигэр Амматааҕы тутуу учаастагар ыыппыттара. Аммаҕа Үлэ Кыһыл Знамята уордьаннаах Федор Иванович Федоров биригээдэтигэр түбэһэн болуотунньук идэтигэр уһуйуллар. Бу иллээх кэлэктиипкэ бэйэ киһитэ буолан, 12 сыл устата Амма Солобуодатыгар элбэх дьиэни, ол иһигэр улуустааҕы балыыһа дьиэтин туппуттара, билиҥҥи “Мир” кыбартаал иккилии этээстээх бастакы дьиэлэрин тутууну саҕаласпыта. Тутууга үлэлиир сылларыгар ыччат лиидэрэ Владимир Иванов МСКТ сэкирэтээринэн үлэлии сылдьан 1964 с. хомсомуолтан ССКП чилиэнигэр үүммүтэ.

1969 с. Амматааҕы райпоҕа книготорг сэбиэдиссэйинэн, биир сыл “Урожай” ДСО оройуоннааҕы сэбиэтин бэрэссэдээтэлинэн үлэлиир. Оройуон салалтата тэрийэр талааннаах эдэр киһини 1974 с. сопхуостар, холкуостар орто сүһүөх салайар каадырдарын бэлэмниир Дьокуускайдааҕы тыа хаһаайыстыбатын техникумугар үөрэххэ ыытар. Владимир Ильич 1976 с. үөрэҕин ситиһиилээхтик бүтэрэн “Амма” сопхуос биригээдэтигэр огурунуом-биригэдьииринэн ананар. Манна үтүө суобастаахтык 1992 с. диэри үлэлээн баран биэнсийэҕэ тахсыбыта. Сааһыран баран каадырабай булчутунан Амма үрэхтэринэн сылдьан саарбаны, андаатары бултаабыта. Үгүстэр Амманы дойду оҥостон, таптаан олохсуйбут, улууспут сайдыытыгар улахан кылааты киллэрбит үлэһит киһини нэһилиэкпит төрүт олохтооҕун курдук саныыллара буолуо. Үлэтин ыстааһа 60-тан тахса сыл. Манна даҕатан эттэххэ, Владимир Иванов техникумҥа үөрэнэр бөлөҕөр, кэлин Амма биригээдэтигэр МСПТ солбуллубат сэкирэтээринэн үлэлээбитэ.

Эдэригэр эт-хаан өттүнэн сайдыылаах спортсмен этэ, 62 кг.диэри ыйааһыҥҥа Амма улууһун хас да төгүллээх призёра уонна 1958 с. оройуон чөмпүйүөнэ. Саха сирин норуоттарын 1958 с. спартакиадатын көҥүл тустууга призёра. Спартакиада күннэригэр өрөспүүбүлүкэ араадьыйата күн аайы кэриэтэ Амма тустууктара Егор Бытыканов, Владимир Иванов кыахтаахтык тусталларын туһунан эрэпэртээстэри биэрэрэ. Буулдьалаах саанан ытыыга Г.Окороков куубагар призёрдаабыта. Техникумна үөрэнэ сылдьан Орджоникидзевскай (билигин Хаҥалас) оройуонун аһаҕас чөмпүйэнээтигэр 62 кг. диэри чөмпүйүөннээбитэ. Володя араас таһымнаах күрэхтэһиигэ 1967 с. диэри тустубута.

Дьоҥҥо-сэргэҕэ аптарытыаттаах, ыччат настаабынньыга, хомуньуус В.И. Иванов Амма сельскэй Сэбиэтин биэс ыҥырыытын дьокутаатынан, ДНД-га, элбэх сыл норуодунай суут сэтээтэлинэн, тустууга уонна успуорт национальнай көрүҥнэригэр спортивнай судьуйанан үлэлээбитэ. Бу барыта киин улуус, нэһилиэк уопсастыбаннай олоҕор актыыбынай позициялааҕын кэрэһилиир.

1958 с. алтынньы 27 күнүгэр оччолорго Амматааҕы тутуу учаастагар суотчут-хассыыр Роза Алексеева уонна болуотунньук Владимир Иванов сүрэхтэринэн сөбүлэһэн, хомсомуоллуу сыбаайбаны оҥорбуттара. Ити курдук дьоллорун холбоон, аал уоттарын кыттыһан оттон, эйэ дэмнээхтик ыал буолан олорбуттара 60 сылын туолбута.

Этэҥҥэ олордоххо, сыл-хонук дииллэр. Эдэркээн бэйэлэрэ баараҕадыйан, 85 саастаммыттара. Амма солобуодатын түс-бас олохтоох биир ытыктанар ыаллара Ивановтар уоллаах кыыс оҕолоохтор, 5 сиэннээхтэр.

Тапталлаах күндү киһибит Владимир Ильич сырдык мөссүөнэ, истиҥ-сайаҕас сыһыана барыбыт сүрэхпитигэр, өйбүтүгэр мэлдьи тыыннаах буолуоҕа.

Биһиги дьиэ кэргэн ыарахан күннэрбитигэр күүс-көмө буолбут, аһыыбытын тэҥҥэ үллэстэн хомолтолорун биллэрбит доҕотторбутугар, табаарыстарбытыгар, биир дойдулаахтарбытыгар, чугас дьоммутугар махталбытын тиэрдэбит.

Кэргэнэ, оҕолоро, сиэннэрэ, аймахтара.

Добавить комментарий