Войти

Войти

БОРИС АФАНАСЬЕВИЧ ЕГОРОВ

Олоҕун сыллара: 1940-2020

 

От ыйын 5 күнүгэр биир идэлээхпит, аҕа табаарыспыт, учууталбыт, СӨ доруобуйа харыстабылын XX үйэ иккис аҥаарын – XXI үйэ саҥатынааҕы кэм биир бөдөҥ салайааччыта

                       Борис Афанасьевич Егоров

Орто дойдуттан барбыта 40 хонугун туолар. Кини киэҥ хабааннаах үлэтинэн дьон-сэргэ дириҥ ытыктабылын, махталын ылбыта.

Борис Афанасьевич атырдьах ыйын 16 күнүгэр 80 сааһын туолуохтааҕа. Уон оҕолоох ыал улаханнара буолан, кыра сааһыттан дьиэ-уот үлэтигэр эриллэн улааппыта, элбэхтик ааҕара, успуордунан дьарыктанара.

Борис Егоров буокса талааннаах тириэньэрэ Арсен Петров биир бастыҥ иитиллээччитэ буолбута. Сэбиэскэй аармыйаҕа сулууспалаан баран, СГУ медико-лечебнэй факультетыгар үөрэнэ киирбитэ. Факультет, СГУ, «Спартак» ДСО спортивнай чиэһин араас күрэхтэһиигэ ситиһиилээхтик көмүскээбитэ, маастарга хандьыдаат нуорматын толорбута.

Буоксаҕа туруулаһыы, кыайыыга дьулуур оскуолатын ааспыт эдэр быраас хирург идэтин талбыта. Алексеевскай, Орджоникидзевскай, Ньурба оройуоннарыгар элбэх суһал, былааннаах да эпэрээсссийэлэри оҥорон, үгүс ыарыһаҕы атаҕар туруорбута.

Салгыы Эдьигээн оройуонун кылаабынай бырааһынан анаммыта. Манна кэргэнэ эпэрээссийэлиир акушер-гинеколог Антонина Алексеевналыын санавиация пуунун тэрийэннэр, Эдьигээҥҥэ, Өлөөҥҥө, Халымаҕа киэҥ хирургическай көмөнү оҥорбуттара. Хоту санавиация пуунун тэрийии, онно олохтоох икки хирург тэҥинэн көмө оҥоруута үлэни тэрийии бастыҥ уопута этэ.

Онтон Б.А. Егоров САССР доруобуйа харыстабылын миниистирин солбуйааччытынан, миниистиринэн, «Фтизиатрия» НПХ дириэктэринэн үлэлээбитэ.

Ити улахан эппиэтинэстээх, салайар үлэлэргэ Б.А. Егоров кыаҕын, билиитин-көрүүтүн толору биэрэн, былаас араас таһымнаах салааларын, бырамыысыланнай, хаһаайыстыбаннай тэрилтэлэри, биир идэлээхтэрин тылыгар киллэрэн, көҕүлээн дириҥ хорутуулаахтык үлэлээбитэ. Ол курдук СӨ, РФ таһымыгар даҕаны сэдэх Медицинскэй, Оҕо уонна дьахтар доруобуйатын араҥаччылыыр кииннэри тутууга Б.А. Егоров сөҕүмэр улахан өҥөлөөх.

Кини каадыры бэлэмнээһиҥҥэ, наука сайдыытыгар улахан болҕомтотун уурара. Доруобуйа харыстабылыгар быраактыканы, медицинскэй науканы уонна үөрэхтээһини тэҥҥэ алтыһыннарбыта, билии-көрүү араас хайысхатын медицинаҕа чугаһаппыта. Ол курдук, 90-с сылларга Доруобуйа харыстабылын министиэристибэтин сүбэ мунньахтарыгар быраастары таһынан, биолог, физик, теплотехник, геолог, эколог, о.д.а. идэлээх учуонайдары көрүөххэ сөбө. Миниистир Б.А. Егоров оччолорго эмчиттэргэ «Европа түннүгүн дьөлбүт» салайааччылартан биирдэстэрэ этэ. Киэҥ, дириҥ көрүүлээҕэ, бэйэтин кэмиттэн биир хардыы инники иһэрэ.

Үлэтигэр, олоҕор кытаанах ирдэбиллээҕэ ... «Бочуот Знага» уордьаннааҕа.

Б.А. Егоровка «СӨ үтүөлээх бырааһа» үрдүк аат 2010 сыллаахха иҥэриллибитэ.      

Өрөспүүбүлүкэ ис-тас өттүгэр элбэх доҕоттордооҕо, дьоллоох дьиэ кэргэн аҕа баһылыга, кэргэнэ Антонина Алексеевналыын тапталлаах эбэ, эһэ этилэр.

Борис Афанасьевич туһунан сырдык өйдөбүл биһиги сүрэхпитигэр өрүү сылдьыаҕа.

Биир идэлээх табаарыстарын ааттарыттан:

И.И. Местников, В.Л. Александров, Г.А. Круглова, П.А. Семенов, В.П. Николаев, Л.Ф. Тимофеев, П.Д. Каратаев, В.И. Назаров, В.П. Старостин, Е.Е. Борисов, П.Д. Дьячковскай, Е.П. Аргунов, А.А. Корнилов.

Добавить комментарий