Тапталлаах киһибит сырдык кэриэһигэр
- Олоҕун сыллара: 10.06.1969-22.10.2019
- Подробности
Тапталлаах күндү кэргэним, күн күбэй ийэбит, эйэҕэс эбэбит, эдьиийбит, балтыбыт, биһиги аймах саамай тутаах киһитэ
НИКОЛАЕВА (Егорова) МАРИАННА НИКОЛАЕВНА
сирдээҕи олоҕун толору олорбокко, баара-суоҕа 50 сааһыгар соһуччу бу Орто дойдуттан барбыта бу дьыл алтынньы 22 күнүгэр биир сыла буолар.
Марианна Николаевна Николаева Ньурба улууһун Чаппанда нэһилиэгэр 1969 сыллаахха бэс ыйын 10 күнүгэр элбэх оҕолоох Егоровтар дьиэ кэргэҥҥэ 7 оҕоттон бэһис оҕонон күн сирин көрбүтэ. Аҕата Егоров Николай Никитич Үөһээ Бүлүү Ботулуутуттан төрүттээх. Кини Саалтааныга бэтэринээринэн үлэлии сылдьан, сүрэҕин аҥаарын Михайлова Мария Павловнаны көрсөн, Чаппандаҕа олохсуйан Егоровтар диэн дьиэ кэргэни төрүттээбиттэрэ. Мария Павловна, доруобуйата мөлтөх буолан, эп-эдэр сааһыгар, 30-ун ааһан баран, эмискэ ыалдьан өлбүтэ. Онтон Марианна үс саастааҕар аҕата эмискэ суох буолбута. Дьылҕа Хаан ыйааҕа тыйыс да буолар эбит... Бу курдук оҕо эрдэҕиттэн төгүрүк тулаайах хаалан, эдьиийдэрэ Маргарита көрүүтүгэр-истиитигэр сылдьыбыта. Чугас аймах туох кыалларынан бары көмө-ама, күүс буолаллара. Марианна кыра сааһыттан эдьиийигэр дьиэҕэ-уокка элбэҕи көмөлөһөрө. Кыра балтын Анютаны батыһыннара сылдьан көрөрө-харайара.
Оҕо сааһыттан сытыы, туохтан да толлубат, куттаммат, олоххо актыыбынай көрүүлээх буолан, оскуолаҕа үөрэнэр кэмнэригэр туох баар тэрээһиннэргэ барытыгар кыттара. Үөрэҕэр үчүгэйэ, тыл өттүгэр ордук дьоҕурдааҕа. Чаппанда орто оскуолатын 1986 сыллаахха ситиһиилээхтик бүтэрбитэ. Оскуола кэнниттэн бииргэ үөрэммит оҕолорун кытта пиэрмэҕэ үлэлии тахсыбыта. Ол үлэлии сылдьан уоппускатын кэмигэр, товаровед үөрэҕэр туттарса диэн, Дьокуускайга барбыта. Куоракка тэһийбэккэ, дойдутун ахтан ситэри туттарсыбакка төннөн кэлбитэ. 1989 с. сааһыгар сопхуостан уурайан, Ньурбаҕа көһөн киирбитэ.
Ол сайыныгар олоҕун аргыһын, сүрэҕин аҥаарын Сергей Васильевиһы көрсөн ыал буолбуттара. Бу дьыл сэтинньи 18 күнүгэр бииргэ олорбуттара 31 сыла буолуохтаах этэ. Марианна икки кыыс тапталлаах ийэтэ, үс сиэн эйэҕэс эбэтэ.
1996 сылтан 2011 сылга диэри бэйэ дьыалатын тэринэн “Холбос” атыы-эргиэн ырыынагар ситиһиилээхтик үлэлээбитэ. Марианна минньигэстик астыыра, баайара, иистэнэрэ, тугу барытын сатыыра. Киһи кыайбата, сатаабата суох диэн өрүү этэрэ. Тарбаҕар талааннаах уран уус буолан, кини айбыта-туппута остуоруйаҕа хоһулларыныы, уурбут-туппут курдук ситэн-тупсан, киэргэйэн кэлэрэ. Таҥас арааһын тигэн оҕолоругар, сиэннэригэр, аймах-билэ дьонугар бэлэхтээн үөрдэрэ-көтүтэрэ.
Ийэбит көнө майгылааҕа, күүстээх санаалааҕа, тулуурдааҕа, чугас дьонугар сылаас сыһыана, кыһамньыта хаһан да умнуллуо суоҕа. Төһө да ыарыы ыараханын тулуйа сырыттар, хаһан даҕаны ону тулалыыр дьонугар биллэрбэтэҕэ. Кинитэ суох туох да быһаарыллыбата. Ыалдьарын, сылайарын аахсыбакка туран барытын оҥоро-тута, бэрийэ сылдьара, өйөбүл-тирэх, сүбэ-ама буолара. Олоҕун устатын тухары өрүү кэрэни эрэ кэрэһэлии, үчүгэйи эрэ ыралана, күлэ-үөрэ, ис иһиттэн сырдаан мичилийэ сылдьара. Наар үчүгэйгэ-кэрэҕэ эрэнэрэ, барыта үчүгэй буолуоҕа диэнинэн сылдьара. Биһиги кини күүстээх санаатын, олоххо тардыһыытын, тулхадыйбат дьулуурун, дьиэ кэргэнигэр сылаас истиҥ сыһыанын өрүүтүн өйдүү-саныы сылдьыахпыт. Бу күн сиригэр дьиэ кэргэн толору дьолун, дьиҥнээх истиҥ тапталы, дьоллоох оҕо сааһы, амарах сыһыаны бэлэхтээбит күндү киһибитигэр махтанабыт, киэн туттабыт! Орто туруу дойдуга киһи барахсан сылдьар ыалдьыт, хонор хоноһо кэриэтэ кэлэн ааһар, ол эрэн оҥорбут үтүөкэннээх бэлиэ суола хаһан да оспот.
Күндү киһибитин сүтэрбит ыарахан кэммитигэр күүс-көмө буолбут дьоммутугар, аймахтарбытыгар, бииргэ үөрэммит дьоммутугар, доҕотторбутугар уонна “Ситим” медиа-бөлөххө истиҥ махталбытын тиэрдэбит.
Кэргэнэ Сергей Васильевич, оҕолоро, күтүөтэ, сиэннэрэ, бииргэ төрөөбүттэрэ, чугас аймахтара.