Войти

Войти

Элбэх киһи сүрэҕэр махталы хаалларда

Олоҕун сыллара: 1934-2020
 

Амбросьев Петр Сидорович Сунтаар оройуонун Кириэстээх нэһилиэгэр 1934 сыл атырдьах ыйын 10 күнүгэр төрөөбүтэ. Кыра эрдэҕиттэн, 7-8 сааһыттан, сэрии кэмин аччык дьылларыгар бултаан, дьиэ кэргэнин аһатан, улахан көмө киһитэ этэ. Тойбохойдооҕу интэринээт-оскуоланы туйгуннук үөрэнэн бүтэрбитэ. 1957 сыллаахха тутуу собуотугар оробуочайынан үлэтин саҕалаабыта. Ол кэннэ 1958 сылтан 1967 сылга диэри “Холбос” бырабылыанньа Ньурбатааҕы кыылы иитэр пиэрмэҕэ үлэлиир. 1967 сылга дьиэнэн Ньурба Мархатыгар көһөр уонна онно сельпоҕа, онтон ыскылаат сэбиэссиэйинэн үлэлиир. 1973 сыллаахха дьиэ кэргэнин Дьокуускай куоракка көһөрөр уонна суоппарынан “Знание” уопсастыбаҕа, онтон “Якутмебель” тэрилтэҕэ 1993 с. биэнсийэҕэ тахсыар диэри үлэлээбитэ. Ханнык да үлэттэн толлубакка, үлэни барытын “на совесть” толорор киһи этэ. Ол иһин хаста да “Лучший по профессии” диэн аат иҥэриллибитэ, “За высокие производственные показатели” диэн бириэмийэ туттарыллыбыта. Тыыл уонна үлэ бэтэрээнэ, сэрии сылларын оҕото, Аҕа дойду сэриитин бэтэрээнэ, “Ытык Сүбэ” түөскэ кэтэр бэлиэлээх, “Почетный старейшина Республики Саха (Якутия)”. Улахан ыал аҕа баһылыга, тапталлаах кэргэн, уон оҕо ытыктыыр, убаастыыр күндү аҕата, элбэх сиэн, кырачаан хос сиэн ытыктабыллаах эһэтэ. Дьон убаастыыр киһитэ Петр Сидорович сэмэй-холку майгыта, үөрүнньэҥ дууһата, кыайыгаһа кинилиин билсибит дьоҥҥо үтүктэргэ, батыһарга үйэлээх холобур буолуо. Сүрдээх мындыр, элбэҕи билэр-көрөр, ааҕар этэ. Кини дьоҥҥо көмөтө, сүбэтэ-амата, өйөбүл буолбута элбэх киһи өйүгэр-санаатыгар хаһан да умнуллуо суоҕа.

Кэргэнэ, оҕолоро, сиэннэрэ, хос сиэннэрэ, аймахтара.

Добавить комментарий