“Сэргэлээх уоттара” култуура киинигэр иккис төгүлүн “Мисс Образование -2019” өрөспүүбүлүкэтээҕи аһымал куонкурус ыытылынна. Манна үөрэхтээһин эйгэтигэр үлэлиир 10 кыыс кытынна.
Куонкурус буолуо ый иннинэ кыттааччылар квалификацияларын үрдэттилэр, өрөспүүбүлүкэ бас-көс дьонун кытта көрүстүлэр, ону таһынан, форумнарга, араас маастар-кылаастарга сырыттылар, педагогическай үлэ бэтэрээннэрин кытта көрүстүлэр уонна хамыыһыйа иннигэр уруок ыыттылар.
Аһымал куонкурус буолан ыалдьар оҕоҕо көмөлөһөр сыаллаах-соруктаах ыытыллар. Быйылгы түһүлгэҕэ онкология ыарыылаах кырачааҥҥа Стас Колесов эмтэнэригэр 200 тахса тыһ солк хомулунна. “Праздник жизни” пуонда тэрийээччилэрэ этэллэринэн, бачча суума хас да оҕо эмтэнэригэр тиийэр.
Куонкурус түмүгүнэн “Мисс Образование — 2019” ааты 79-с №-дээх “Лучик” уһуйаан иитээччитэ Валерия Никифорова ылла. Киниэхэ хоруона уонна мааны саҕынньах бэлэх туттардылар. Иккис миэстэни Горнай улууһуттан Бэрдьигэстээх орто оскуолатын химия учуутала Светлана Евстафьева, оттон үһүс миэстэни Дьокуускайдааҕы 7-с №-дээх оскуола омук тылын учуутала Алена Степанова ыллылар.
