Күөх сайыны көрсө Дьокуускай куорат Арчы дьиэтигэр Арассыыйаҕа тыйаатыр уонна Оҕо саас 10 сылыгар, СӨ сомоҕолоһуу, Дьокуускай куоракка иллээхтик ыаллыы олоруу сылыгар, сайыны уруйдуу-айхаллыы, Ньукуолун күнүгэр анаан “Күн төгүрүк алаадьыта” айыы аһын тэрээһинэ сүрдээх үрдүк таһымҥа буолан ааста. Тэрээһин ааптара – Арчы дьиэтин мэтэдииһэ – Любовь Константинова – Кыталы Куо.
Алаадьы астааһынын күрэҕэр сылтан сыл аайы кыттааччы ахсаана элбээн иһэрэ киһини үөрдэр, хараҕы сымнатар. Быйыл 104 кыттааччы кыттыыны ылан алаадьы эгэлгэтин астаан кэлбиттэр. Ас арааһыттан алаадьыны астыыр да буолар эбиттэр! Туохтан-туохтан астаабатахтарый? Итиртэн, дьаабылыкаттан, банаантан, моркуоптан, чучунаахтан, тайах этиттэн, хонууга үүнэр күөх лууктан, изюмтан, быартан, балыктан... Ахсаанын ааҕан сиппэккин. Барыта айаххар киирэн ууллан хаалар минньигэстэр.
“Кэскил” хомусчуттар ансаамбыла Хаҥалас улууһун Төхтүр нэһилиэгэ
“Кэскил” ансаамбыл алаадьылаах остуола
Хаҥалас улууһун, Төхтүр нэһилиэгин “Кэскил” норуодунай хомусчуттар ансаамбылларын Далбар хотуттара (сал. Анастасия Перловская) “Эркээним алгыстаах алаадьылара” диэн 12 көрүҥ алаадьыны астаан аҕаллылар.
Ол онтон 3 өбүгэ сиэргэ-туомҥа туттар алаадьылара. Хаҥалас улууһугар кэлии нууччалар, дьаамнар олохсуйбут сирдэрэ буолан алаадьылара араас ас булкадаһыктаах оҥоһуллар. Ол курдук, чочунаахтаах, убаһа эттээх, искэхтээх, быардаах, тэллэйдээх, иэдьэгэйдээх уонна суораттан оҥоһуллар. Онтон сиэргэ-туомҥа туттуллар алаадьыларынан – саҥыйахтаах, уоһахтаах алаадьы буолар.
Ас булкаастаах алаадьылар битэмииннээхтэринэн уонна киһи тыынар уорганнара тымныйыытыгар туһалыыллар.
Олортон биирдэстэрэ “Чочунаахтаах алаадьы” буолар. Маны тэҥэ хонуу лууга бэйэтэ бактыарыйаны утары ураты суолталаах буолан, күһүн, саас тымныйыыга астаныллар. Ис-үөс ыраастыырга “Тэллэйдээх алаадьы” олус туһалаах. Манна сүрүн састаабыгар тэллэй уонна сыр эбиллэр. “Убаһа эттээх” алаадьы киһиэхэ эниэргийэни биэрэр, хаан баттааһыныгар, хааны убатарга туох да олус туһалаах аһылыгынан буолар.
“Көмүс саастар” ырыа ансаамбыла
Дьокуускай куораттааҕы “Көмүс саастар” ырыа ансаамбыла (сал. Ирина Абрамова) 26 алаадьы араас көрүҥүн астаан аҕалан мустубут дьону күндүлээтилэр. Мин ордук “масленок, подберезовик” тэллэйтэн оҥоһуллубут алаадьыларын сэҥээрэн амсайдым.
Дьокуускайдааҕы мэдэссиинэ колледжа
Дьокуускай куораттааҕы мэдиссиинэ колледжын уопсайын үлэһиттэрэ Туйаара Алексеева салайыытынан, быйыл аан маҥнайгытын кытыннылар уонна (!) 40 алаадьы араас көрүҥүн астаан кэлбиттэр. Кинилэр зоналара барыларыттан уһулуччу үчүгэйдик толкуйданан оҥоһуллубут буолан, кэлбит ыалдьыт болҕомтотун тута тардар. Маладьыастар!
Туйаара Алексеева – Бу алаадьыларбытыттан саамай былыргы өбүгэлэрбититтэн кэлбит “саҥыйахтаах алаадьы” буолар. Өргөөт оттон алаадьы эмиэ баар. Камыш оту үргээн, силиһин ылан дэлби ньыһыйан бурдукка булкуйан буһараллар. Оҕуруот аһыттан, араас фруктаттан алаадьылар астаннылар. Маны тэҥэ күөх чучунаахтаах, өлүөхүмэлии, эбэҥкилии алаадьылар эмиэ бааллар. Эбэҥкилии алаадьы – доруоһалаах үлүннэрии алаадьы буолар. Ыстааданан айанныы бардахтарына төһө баҕарар хонук укта сылдьан сииллэр. Бу алаадьы өр сылдьар, курсуйбат.
Иннокентий Тарбахов маастар-кылааһа
Николай Атласов маастар-кылааһа
Биллиилээх асчыттартан маастар кылаастар
Саха биллиилээх асчыта, Тыгын Дархан эрэстэрээн шеф-повара Иннокентий Тарбахов алаадьыны астааһыҥҥа маастар кылааһа, “Атласовтар уһаайбалара” туристическай этно-комплекс салайааччыта уонна шеф повара Николай Атласов саха аһыгар маастар кылааһа ыытылынна.
Хоту сахалара
Быйыл куоракка олохтоох Усуйаана, Булуҥ, Эбээн Бытантай улууһуттан төрүттээх “Хоту сахалара” бөлөх (сал. С.Г. Горохова) аан бастаан кытынна. Кинилэр таба силиититтэн, үүтүттэн алаадьы 9 көрүҥүн астаан аҕалбыттара дьон, дьүүллүүр сүбэ биһирэбилин ыллылар. Хоту ыам ыйын балык ыыр ыйа дииллэр эбит.
“Чараҥ” ырыа ансаамбыла
Валерий Иванов салайааччылаах “Чараҥ” ырыа ансаамбыла быардаах, корицалаах, от тумалаах о.д.а. ас булкадаһыктаах алаадьы астаан аан бастакытын кытыннылар.
Наҕараадалааһын
Күөн күрэс түмүгүнэн кыайыылаахтар ааттара билиннилэр. Саамай үрдүк – “Кылаан Чыпчаал” ааты “Чэгиэн” хомусчуттар кэлэктииптэрэ (сал. У. В. Захарова) ыллылар.
Эһиилги тэрээһиҥҥэ көрсүөххэ диэри!
Бу күн “Арчы” дьиэтин тэрээһинигэр кэлбит дьон сүргэлэрэ көтөҕүллэн, астына-дуоһуйа сынньанан, алаадьы арааһын амсайан тарҕастылар. Тэрээһин үгэскэ кубулуйан, эһиил эмиэ Ньукуолун күнүн көрсө ыытыллыаҕа. Онон быйыл кыттыбатахтар эһиил ох курдук оҥостон, тэринэн кэлэн кыттыахтара диэн эрэнэбит.
“Күн төгүрүк алаадьыта” күөн күрэс кыттыылаахтара буолаары турар быйылгы “Туймаада Ыһыаҕа – 2019" үөрүүлээх аһыллыытыгар халадаай ырбаахыларын сайбаччы кэтэн, аһаҕас халлаан анныгар күн төгүрүктүү төгүрүччү олорон, таҕааннары уурунан, алаадьыны астаан сыт таһааран түһүлгэни ыраастаан ыһыах ыалдьыттарын көрсүөхтэрэ.
тэрээһини көрдө-иһиттэ Саргылаана БАГЫНАНОВА.
