Тохсунньу 1-15 күннэригэр “Ykt.Ru” саайтка “Якутянин года — 2019” диэн бириэмийэҕэ куоластааһын ыытыллыбыта. Ол түмүгүнэн социология билимин доктора, психология билимин хандьыдаата Ульяна Алексеевна Винокурова кыайыыны ситистэ.
Ол курдук, Ульяна Алексеевнаҕа 1225 куолаһы биэрбиттэр. Иккис миэстэни урбаанньыт, Дьокуускай куорат баһылыгын солбуйааччынан үлэлээбит Владимир Федоров ылла. Киниэхэ 1141 куолас киирбит. Оттон үһүс бочуоттаах миэстэни ХИФУ мэдиссиинэ институтун профессора, мэдиссиинэ билимин доктора Карл Башарин ылла. Кини 732 куолаһы ылбыт.
Бириэмийэ кыайыылааҕа Ульяна Алексеевна санаатын маннык үллэстэр: “Дьэ, кылгас кэмҥэ тыҥааһыннаах киирсии буолла. Саха дьоно ытык өйдөбүллэринэн түмсэр, туруулаһар кыахтаахпытын саҥа ньымалары суһаллык баһылаан көрдөрдүбүт. Интэриниэт эйгэтигэр сыыппара култууратыгар киирии сатабыла эбилиннэ. Хотугу улуустар, кыра дэриэбинэлэр түргэн Интэриниэт ситимигэр киирэр кыахтара күөмчүлэнэрэ билиннэ. Бүгүн В.В. Путин тоһоҕолоон эппитин курдук, Интэриниэт суһал сорукка босхо буоларын туһугар ситимин тардыыга, сыанатын түһэриигэ, хонтуруоллааһыҥҥа анал дьаһаллары ылыы тирээн турар сорук буолбутун бу да куонкурус көрдөрдө. Онон биһиги, сахалар, дьоһуннаах олоххо дьулуурбут дьэҥкэрдэ. Кыайыы сылын маннык хардыынан саҕалаабыппыт санааны бөҕөргөтөр, олукпутун чиҥэтэр. Онон бука барыгытыгар барҕа махтал! Үрдүбүтүнэн үргүөр үргүйбэтин, анныбытынан аргыар аргыйбатын!”.
