Войти

Войти

Саҥа дьылбыт тиийэн кэлэрэ баара-суоҕа 6 хонук эрэ хаалла. Бырааһынньыктааҕы сандалыбытын хатыламмат минньигэс астарынан киэргэтээри, чугас дьоммутун күндүлээри дьиэ хаһаайкалара куйаар ситимиттэн, асчыт дьонтон ас ырысыабын хомуйабыт.

Бүгүн “СҮБЭ” балаһаҕа биһиги ыалдьыппыт -- Дьокуускай куорат олохтооҕо, учуутал идэлээх, социальнай ситим инстаграмыгар 18 000 тыһыынча сурутааччылаах блогер, минньигэс астаах дьиэ хаһаайката МАРФА ЯКОВЛЕВА.  

Эттээх үс муннук

1treygolnik

Начыыҥка:

Эриллибит ынах этэ – 500 г

Хортуоппуй – 2-3 уст.

Эриэппэ луук – 1 уст.

Чосунуок – 1-2 өлүүскэ.

Күөх укуруоп – 1 сүүмэх.

Туус уонна биэрэс бэйэ билэринэн. Эккэ аналлаах ханнык баҕарар туманы туттуохха сөп.

Тиэстэтигэр:

Суорат (3% сыалаах) – 500 г

Сымыыт – 2 уст.

Суода – 0,5 кыра ньуоска.

Туус – 0,5 кыра ньуоска.

Саахар – 1 улахан ньуоска.

Бурдук – тиэстэ төһө ыларынан.

Эриллибит эккэ сиикэй хортуоппуйу ньыһыйабын. Луугу кыра гына кырбыыбыт, чосунуогу уонна күөх укуруобу иккиэннэрин бытархай гына илдьиритэн кырбыыбыт. Барытын эппитигэр кутабыт уонна үчүгэйдик булкуйабыт.

Миискэҕэ суораты кутабыт уонна суоданы кытта булкуйабыт (көөнньөрүн кэтэһэбит). Атын миискэҕэ 2 сымыыт, туус, саахар уонна ынах арыытын кутан булкуйабыт. Салгыы маны барытын суоракка холбуубут, булкуйа-булкуйа бурдук кутабыт. Тиэстэ сүрдээх сымнаҕас, имигэс, киһи илиитигэр сыстыбат буолан тахсар. Маннык тиэстэни мин наһаа сөбүлүүбүн. Миискэҕэ бэйэтигэр эбэтэр салапааҥҥа 20 мүнүүтэ сынньата туруорабыт.

Салгыы тиэстэни 3 чааска араарабыт, 4-5мм гына тэнитэбит, төгүрүк гына быһабыт, үрдүгэр начыыҥкабытын уурабыт уонна үс муннуктуу оҥорон таһаарабыт. Ас буһарар тимир лиискэ пергамент кумааҕыны тэлгээн 180 кыраадыска35-40 мүнүүтэ устата буһара уурабыт. Бу састааптан 40 устуука оҥоһуллан тахсар.

Бурууктаттан (сухофрукт) эттээх рулет

2fryktalaaxetteexrylet

Бырааһынньыктааҕы остуол саамай кэрэ бүлүүдэтэ. 700 г эриллибит эккэ 1 сымыыт, туус, биир өлүүскэ кырбаммыт чосунуок уонна үүккэ булкуллан сымнаабыт 2 уст. хаппыт килиэби кутан булкуйабыт. Кумааҕы тэлгэммит тимир лиискэ эриллибит эппитин 2 см халыҥнаах гына тэлгэтэбит. Үрдүгэр курага уонна чернослив (150г) уурталыыбыт. Начыыҥкатыгар ханнык баҕарар оҕуруот аһын талыаххытын сөп – эриэхэ, сыыр, о.д.а. Эппитин икки илиибитинэн сэрэнэн суулуу эрийэбит. Үөһээ өттүн мас арыытынан, кетчубунан, сүөгэйинэн эбэтэр соуһунан сыбыыбыт. 200 кыраадыс ититиллибит духуопкаҕа 30-40 мүнүүтэ устата буһарабыт. Минньигэс амтаннаах рулет бэлэм. Сылаастыы да, тымныылыы да сиэххэ сөп.

 Ананаастаах бекон уонна

сыырдаах куурусса этиттэн РУЛЕТ

3ananactaaxkyyryccabekona

4 куурусса түөһүн этин ылан аска туттуллар өтүйэнэн ылан быһа охсуталыыгын. Туустуугун, биэрэстиигин. Начыыҥкатыгар: 200 г кытаанах сыыры (Гауда) түөркэҕэ ныһыйабыт уонна бааҥка аҥара кыра гына кырбаммыт ананаһы эбэбит, 1 улахан ньуоска сүөгэйи эбэтэр майаныаһы кутан булкуйабыт. Кууруссабыт этин үрдүгэр начыыҥкабытын сыбыыбыт, рулет оҥоробут. Ол кэнниттэн беконунан (бэлэм оҥоһуллубут бекон ордук барсар – мин 200 г бекон туттабын) суулуу тутабыт. 200 кыраадыс ититиллибит духуопкаҕа 30-40 мүнүүтэ устата буһарабыт. Бекон кытархай, хачыгырас буола буһан тахсар. Сойбутун кэннэ хас да өлүү гына быһабыт уонна сибиэһэй оҕуруот астарынан киэргэтэн бырааһынньыктааҕы остуолга уурабыт.

Араас өҥнөөх салаат

4araacenneexcalaat

Буспут эт эбэтэр тыл – 600 г.

Кыһыл уонна араҕас өҥнөөх минньигэс биэрэс – 2 уст.

Кэнсиэрбэлэммит оҕурсу – 1 бааҥка (600мл).

Эриэппэ луук – 1 уст.

Чосунуок – 1 өлүүскэ.

Маласянь тума (өскөтүн суох буоллаҕына туус уонна биэрэс булкадаһыга.

Кунжут сиэмэтэ (баҕарар буоллаххына).

Үүнээйи эбэтэр оливка арыытынан булкуйабыт.

Бу ингредиеннэри барытын солуомкалыы кырбастаан баран дириҥ миискэҕэ кутаҕын. Ол кэнниттэн кунжут сиэмэтин, специяны, арыыны кутан булкуйаҕын. Наһаа минньигэс, бырааһынньыктааҕы салаат бэлэм!

Тыл салаата

5tylcalaata

4 орто быһыылаах оҕурсуну, минньигэс биэрэһи, тылы синньигэс гына, эриэппэ луугу биһилэхтии кырасыабай гына быһабыт. Ол кэнниттэн маны барытын 2 улахан ньуоска кунжут арыыта, 2 улахан ньуоска мас арыыта, 3 улахан ньуоска суойа соуһа, 2 кыра ньуоска кунжут сиэмэтэ, 2 ныһыллыбыт чосунуок өлүүскэтин салааппыт үрдүгэр кутан биир маасса буолуор диэри булкуйабыт. Салааппытын 30 мүнүүтэҕэ халадыынньыкка уурабыт.

Оруоса буулка

6rozabylka

Доруоһата суох тиэстэ (слоеное бездрожжевое тесто) бастакы араҥатын чараас гына тэнитэбит. Сакалаат паастатынан (100г) чараас гына сыбыыбыт. Үрдүнэн иккис араҥа тиэстэбитин уурабыт уонна кытыыларын үмүрүччү сыһыара тутабыт. Синньигэс дьураа гына быһабыт, тиэстэ халыҥа 2 см кэриҥэ буолар. Хаартыскаҕа көстөрүн курдук, оруоса сибэккилии суулуу тутабыт. Сибэккилии моһуона алдьамматын курдук, тиэстэ кытыытын ыга тутан, силимнээн биэрэбит.

Ас буһарар тимир лиискэ пергамент кумааҕыны тэлгээн буулкабыт үрдүн сымыыт уоһаҕынан ньалҕаарыччы сотобут. 200 кыраадыска диэри итийбит духуопкаҕа 15-20 мүнүүтэ буһаран ылабыт.

*   *   *

Бу ас ырысыаптарын быраабылатын, кээмэйин барытын тутуһан туран астаан, кырасыабайдык киэргэтэн уурдаххытына, Саҥа дьыллааҕы САНДАЛЫ остуолгут эһиэхэ үөрүүнү-көтүүнү, бырааһынньыктааҕы өрө көтөҕүллүүлээх настарыанньаны аҕалыа диэн эрэнэбит. Барыгытын Саҥа дьылынан! Кэлэр сылга сандалы хотойорунан минньигэс, тотоойу астаах буолуҥ, мэлдьи тот-өҥ сылдьыҥ!

 

 

Саргылаана БАГЫНАНОВА.

 

 

 

 

 

 

 

 

 

 

 

 

 

 

 

 

 

 

Тарҕат:

Добавить комментарий