Быйыл күһүн балаҕан ыйын 1 күнүттэн ахсыс сылаас үөрэнээччилэрэ “Обществознание” биридимиэтин үөрэтэн бүтүөхтэрэ. Ити уруок 9–11-с кылаастарга эрэ хаалыаҕа. Ол туһунан РФ Үөрэххэ миниистирэ Сергей Кравцов РИА-ҕа кэпсээбит.
“Саҥа үөрэх бырагырааматыгар икки сыл устата сыыйа көһүөхпүт. Холобур, 2025 сыл балаҕан ыйын 1 күнүттэн “Обществознание” уруога 8 – 11-с кылаастарга хаалбыта. Оттон бу күһүҥҥүттэн 9-с – 11-с эрэ кылаастар үөрэтэр буолуохтара. Аны туран, учуобунньук барыта биир буолуоҕа”, – диэн миниистир эппит.
Атын кылаастарга “Обществознание” уруога тоҕо суох буолбутун тойон Кравцов маннык быһаарбыт: “Биридимиэт сорох тиэмэтэ орто кылаас үөрэнээччилэрэ ылыналларыгар аһара уустугун ааһан, устуоруйа уруогун сорох матырыйаалын хатылыыр”.
Санаттахха, ити иннинэ Үөрэх министиэристибэтэ 2026–2027 сс. үөрэх дьылыгар орто сүрүн үөрэҕи баһылыырга булгуччулаах үөрэх дьиссипилиинэлэрин бигэргэппитэ. Онно нуучча тыла, литэрэтиирэтэ, омук тыла, устуоруйа, обществознание, география, математика, информатика, физика, биология, химия, ойуулуур-дьүһүннүүр ускуустуба, муусука, үлэ (технология), куттал суох буолуутун уонна дойду көмүскэлин төрүттэрэ, эт-сиин култуурата киирбиттэрэ. Бу күһүҥҥүттэн онно эбии Арассыыйа духуобунай-нравственнай култуурата (ДНКР) диэн үөрэх эбиллиэхтээх.
Оттон төрөөбүт тылы, литэрэтиирэни уонна иккис омук тылын оҕо төрөппүт сайабылыанньатынан эрэ үөрэтэр кыахтаах.
Хаартыска – ЕГЭ. Обществознание паблик
