Улуустардааҕы РФ оборуонаҕа министиэристибэтин байыаннай комиссариатын отделларын үлэһиттэрэ, Арассыыйа бэрэсидьиэнэ В.В. Путин мобилизация туһунан уурааҕын ис хоһоонун өйдөөбөккө, тута сөрөөн ыксалынан хабырдык, дьон быраабын кэһэн туран, сорох улуустарга дьиэлэри полицейскайдардаах кэрийэ сылдьан, күһэлэҥ хомуур оҥордулар. РФ оборуонаҕа министиэристибэтин байыаннай комиссариатын отделларын үлэһиттэрэ, улуустардааҕы дьаһалталар, Ис дьыала министиэристибэтин үлэһиттэрэ Арассыыйаҕа байыаннай балаһыанньа биллэриллибэтэҕинэн, быстах өрүттээх мобилизация биллэриллибитин сыыһа өйдөөннөр, РФ оборуонаҕа министиэристибэтин миниистирэ С.К. Шойгу быстах өрүттээх мобилизацияны ыытыы туһунан бирикээһин сыыһа толордулар.
Арассыыйаҕа байыаннай балаһыанньа биллэриллибэтэҕинэн, быстах өрүттээх мобилизация ыытыллар. Бу быстах өрүттээх мобилизация хас да түһүмэҕинэн ыытыллара миниистир С.К. Шойгу бирикээһигэр ыйылла сылдьар. Бу ыытылла турар мобилизация бастакы түһүмэх. Манна, судургутук эттэххэ, бастакы быстах өрүттээх мобилизацияҕа, аармыйаҕа сулууспалаабыт 35 саастарыгар диэри саастаах дьон ылыллаллар. Ону да бука бары 35 сааска диэри саастаахтар буолбатах. Аармыйаҕа сулууспалаабатах дьон ылыллыбаттар.
Бу бастакы мобилизацияҕа аармыйаҕа сулууспалаабыттара 3 сылын ааспатах, эбии үөрэтиигэ наадыйбат, аармыйа үөрүйэҕин, сатабылын умна илик салгын-десантнай чааска уонна муора пехотатыгар, танковай, автомобильнай, артиллерийскай, зенитнэй, мотострелковай чаастарга сулууспалаабыттар, снайпер, связист уонна программист идэлээх дьон бэбиэскэнэн ыҥырыллан, мобилизацияланаллар. Ону да тута сөрөөн, үс чаас иһинэн бараҕын диэн буолбатах. Бу бастакы мобилизация алтынньы 15 күнүгэр диэри ыытыллара былааннанар.
Мобилизацияҕа хабыллыбаттар – күнүскү уонна кэтэхтэн үөрэнэр устудьуоннар, байыаннай бырамыысылыннаска үлэлиир бары исписэлиистэр, оробуочайдар, радио-электроннай фирмаларга, бырамыысыланнаска үлэлээччилэр, ити хайысха сайдыытыгар чинчийии, үөрэтии ыытааччылар, сууттаммыт дьон, холуобунай дьыала көбүтүллүбүт дьонноро, байыаннай-врачебнай хамыыһыйанан сыыйыллыбыттар, медико-социальнай эспэртиисэнэн инбэлиитинэн билиниллибит уонна биологическай туруктарынан, ыарахан эчэйиилэринэн байыаннай сулууспаҕа сөбө суохтар, 4 оҕолоох аҕалар, саастарын ситэ илик кыра оҕолоох соҕотох аҕалар, кырдьаҕас уонна доруобуйаларынан бэйэлэрин көрүммэт төрөппүттэрин, инбэлиит оҕолорун, бырааттарын, балыстарын, иитимньи оҕолорун көрөр-харайар уонна сокуоннай саастарын ситэ илик оҕолорго опекунунан анаммыт дьон.
Мобилизация сыыһа барыытыгар эрэгийиэннэр баһылыктара эппиэтинэһи сүгэллэр. РФ бэрэсидьиэнэ В.В. Путин 2022 сыл балаҕан ыйын 21 күнүнээҕи 647 нүөмэрдээх “РФ быстах өрүттээх мобилизацияны биллэрии туһунан” уурааҕын 8 пуунунан мобилизацияны ыытыыны хааччыйыы субъектар үрдүк сололоох сирэйдэригэр сүктэриллэрэ ыйыллар.
Бастатан туран, эрэгийиэн баһылыга мобилизацияны ыытыыны сүрүннүүр штабы тэрийиэхтээҕэ. Бу штаб Саха сиринээҕи РФ оборуонаҕа министиэристибэтин байыаннай комиссариатын салалтатын кытта бииргэ үлэлэһэн, бастакы быстах өрүттээх мобилизация бастакы түһүмэҕэр аармыйаҕа сулууспалаабыт, 35 саастарыгар диэри саастаах дьон ылыллыыларын, мэдиссиинэ көрүүтүн тэрийиэхтээх этэ.
Маны таһынан, суһал байыаннай балаһыанньа суоҕунан, Саха сирин килиимэтин уонна суол-иис уустугун, хоту уонна Арктика улуустарыгар хааччыйыы кыһынын суолларынан эрэ оҥоһулларынан, РФ Бырабыыталыстыбатыгар уонна РФ оборуонаҕа министиэристибэтин тэрийэр-мобилизациялыыр Сүрүн управлениетыгар Саха сирин бары нэһилиэнньэлээх пууннарыгар олох-дьаһах хомунаалынай сулууспаҕа, аһынан-үөлүнэн, ГМС матырыйаалынан хааччыйыыга үлэлиир исписэлиистэри, оробуочайдары уонна суоппардары мобилизацияттан босхолуурга этии киллэриэхтээх этилэр.
Кыстыкка киирии саҕаланыаҕыттан хотугу уонна Арктика улуустарыттан саамай үлэни-хамнаһы кыайар, ыарахан үлэни үлэлиир дьону мобилизациялаан хомуйан, бэлиэр бу улуустарга ыарахан уонна уустук кыһалҕалары үөскэттэ. Оннооҕор күһүөрү халааҥҥа олоччу ууга барбыт Үөһээ Дьааҥы улууһун бөһүөлэктэриттэн дьону хомуйан ыллылар. Бу кыһалҕа билигин быһаарылла охсоро наада.
Өйдөөн кэбиһиҥ: Арассыыйаҕа байыаннай балаһыанньа биллэриллибэтэҕэ, онон олоҕу-дьаһаҕы хааччыйар, олох куттала суох буолууга үлэлиир дьону мобилизациялыыр сыыһа!
