Балаҕан ыйын 27-тигэр - ИҺИЙЭЭНЭП КҮНЭ, сахалар биир ытыктыыр бэлиэ күннэрэ буолар.
Билэрбит курдук, дьылбыт-күммүт бэлиэ ааттарын православнайдар кэлэн баран барыларын бэйэлэрин сибэтиэйдэрин ааттарынан ааттаталаабыттар. Ол курдук, Ньукуола, Бөтүрүөп, Илдьиин, Ыспааһаптар, СэмэнэП, Бокуруоп о.д.а. бары нуучча сибэтиэйдэрэ ааттаахтар. Ол иһин үгүспүт Иһийээнэп да син биир ханнык эрэ сибэтиэй аата буолуо дии саныыр буолуохтаах. Ол гынан баран, ИҺИЙЭЭНЭП диэн ааттаах биир да сибэтиэйи араастаан көрдөөн көрдүм да булбатым. Ол аата бэлиэ күннэри ааттааһыҥҥа Иһийээнэп диэн суос соҕотох ордон хаалыт дьиҥнээх сахалыы аат сылдьар эбит диэн сабаҕалыахха сөп.
Оччоҕо Иһийээнэп диэн ИҺИЙЭР, чуумпурар диэн өйдөбүллээх уонна ити тыл Сыл бу кэминээҕи Айылҕа туругун олус табатык быһаарар эбит диэххэ сөп.
Ол курдук, өссө да утуйа илик бүтэһик эһэлэр бу күн арҕахтарыгар киирэллэр, оттон күрдьүгэстэр хорооннорун булаллар. Инньэ гынан айылҕа иһийэр, кэлэр сааска диэри утуйар, сынньанар.
Тиит мутукчатын, хатыҥ, үөт сэбирдэҕин суйдуур тыаллаах, тоҥуон иннигэр сирин силимниир ардахтаах күннэри үүннэртээн, Айылҕа барахсан иһийэр, утуйар кэмин быйыл үчүгэй бэлэмнээх көрүстэ.
Аны, норуот кэрдииһиньиинэн, Иһийээнэпкэ сир үрдэ чакылыччы тоҥон, аты уйар буолар. Ол аата тоҥмут суол устун атынан айаннатан дибдигирэттэххэ, ат туйаҕын тыаһа добдугураан, бэрт ыраахтан иһиллэр буолара үһү. Онон бу кэми өссө добдурҕан кэмэ диэччилэр.
Билиҥҥи кэмҥэ Күн-дьыл уларыйан, улам сылыйан иһэр, ол түмүгэр үгүс улуустарга, Күһүммү уһаан, быйыл сир үрдэ алтынньыга диэри өссө да ситэ тоҥо илик.
ТИМИР КҮҺҮН САҔАЛАННА
Балаҕан ыйын 14 күнүттэн Саха сиригэр Тимир күһүн саҕаланар.
Хатыҥ, үөт сэбирдэҕэ суйданан баранан эрэр. Тиит мас иннэтэ хагдарыйан, тохтон бүттэ даҕаны. Онон, ойуурбут барахсан Күһүн саҕаланыытыгар кыһыл Көмүс курдук тырымнаабыта, Көмүс күһүн дуо дэммитэ бүтэн, онтон дьэс алтан өҥүнэн кыыспыта, онон Алтан күһүн диэн ааттаммыта ааһан, харааран, тимир өҥө дьүһүннэннэ ол аата Тими күһүн саҕаланна.
Тиит ойуурга таҕыстахха тииттэр күһүҥҥү, өҥө бараммыт таҥас курдук, өлбөөркөй халлаан урсунугар, график худуоһунньук холустаҕа түһэрбит уруһуйун курдук буолан көстөллөр. Сэниэ тыал муткучата суох тиит лабааларын, өҕүрүйэн ыллахха дьүрүһүйэ хамсыыр хомус тылыныы, сирилэтэччи тыаһатан ааһар.
Тимир күһүн алтынньы 14 күнүгэр - Бокуруопка, Кыһын кэлэр күнүгэр диэри туруоҕа.
Эһээ Дьыл
