Ахсынньы 9 күнүгэр, «Саха дьонун төрүт аһа» диэн ааттаах онлайн төгүрүк остуол буолла. Тэрээһини иилээн-саҕалаан норуот дьокутаата Мария Христофорова ыытта. Кэпсэтиһии, аныгы олох тэтимэ уларыйыыта, аһа-үөлэ саха норуотун олоҕун эргииригэр дьайыытын туһунан барда.
XXI үйэ саҥатыгар, бу уларыйыылартан сиэттэрэн, саха норуотун олоҕор-дьаһаҕар, төрүт укулаатыгар, доруобуйатын туругар тахсыбыт сытыы кыһалҕалары тула анал идэлээхтэр, үөрэхтээхтэр, тэрилтэлэр салайааччылара бэйэлэрин толкуйдарын эттилэр, хардары санаа атастастылар. Хайдах гынан норуот, нация чэгиэн туруктаах буола үүнэ-сайда чэчириэн сөбүн туһунан ырааҕы анаарар киэҥ сэһэргэһии таҕыста.
Онлайн-кэмпириэнсийэҕэ актыыбынай кыттыыны ыллылар: Владимир Степанов - “Ситим” медиа-бөлөх генеральнай дириэктэрэ, Ульяна Лебедева -- Доруобуйа харыстабылын министиэристибэтин диетолог бырааһа; Константин Степанов – тыа хаһаайыстыбатын билимин дуоктара - АГАТУ үөрэх кыһата, Александр Артемьев-Кулан – айылҕаттан айдарыылаах, ойуун; Николай Аржаков – СХПК “Чурапчы” салайааччыта, Николай Атласов – “Атласовтар этнокомплекстара” сынньанар сир шеф-асчыта, Ньургуйаана Заморщикова – “Сахачай” хампаанньа дириэктэрэ, Евгения Никифорова – эндокринолог быраас, Татьяна Никифорова – кардиолог быраас, биирдиилээн уопсастыбанньыктар, урбаанньыттар уо.д.а.
Кэпсэтии олох тыын боппуруоһун -- арҕааттан кэлэр кэлии астан сэдиптээн олохтоох нэһилиэнньэ доруобуйата айгырыырын, төрүт олохтоох ас суолтата, таһыма таһыччы үрдүгүн, хайдах гынан олохтоох бородууксуйаны оҕо уһуйааннарыттан саҕалаан, эмтэнэр балыыһаларга тиийэ киэҥ хабааннаах туһаныыга киллэрии туһугар сайдар, тобулар суоллары, соруктары торумнастылар.
Кэпсэтиһии, санаа атастаһыыта, сүбэ-ама барыта тиһиллэн, ырытыллан сокуон чэрчитинэн олоххо бигэтик киириэҕэ диэн сырдык эрэллээх кэмпириэнсийэ түмүктэннэ.
Кэмпириэнсийэ видеоҕа устуутун салгыы бу сигэнэн көрүҥ: https://youtu.be/Q6Vjn3-uRbg
Бу тэрээһин туһунан сиһилии "Кыым" хаһыат кэлэр нүөмэригэр, суруналыыс Нина Герасимова матырыйаалыгар ааҕаарыҥ.
