Дьокуускай куоракка сирэй үөрэнэ (очно) кэлбитим аҕыйах күн буолла. Манна сандал саас кэлэн, тулабыт биллэ сэргэхсийбит, киһини олох «ханна эрэ бар, көрүлээ» дииргэ дылы. Хас күн аайы ханна эмит дьүөгэлэрбин кытта баран хаҥкылаабыт киһи дуу диэммин, катоктары кэрийэргэ сананным.
Кэлбитим иккис күнүгэр аймахтарбар баран иһэн, Ленин болуоссатыгар баар катогу көрөн аастым.
Көрдөхпүнэ киһини эрэ ымсыырдыах киэҥ, ыраас эбит. Дьэ, ыллым эрэ хаҥкылыах санаа киирэр. Киһи дьиксиниэх, дьоно-сэргэтэ ол күн аҕыйах буолан биэрдэ.
Аныгыскы күн «Таалай күөл» хаҥкылыыр сирин көрдүм. Син киһи элбэх. Босхо. Ол эрээри, бириэмэм ыгым буолан, сылдьыбатым.
Күндүл халлаан мэндээрэ көҕөрөн наһаа үчүгэ-ээй, киһини ыҥырарга дылы! Ол иһин, ыксыы-ыксыы хааман иһэн, кыргыттарбар: «Киэһэлик да буоллун, хаҥкылыы тахсыахпыт», - диэн бассаапка баар бөлөхпүтүгэр суруйдум.
Уопсайбар тиийэн, сынньанан, уоскуйан баран, киэһэ дьүөгэлэрбин кытары Ленин болуоссатыгар хаҥкылыыр сиргэ бардыбыт.
Олус астык лаампалардаах, киһи кутун-сүрүн таарыйар түргэн тэтимнээх ырыалаах каток эбит.
Киэһэ хаҥкылыыр биир уратылаах - тулабыт барыта сандаархай уот буолан, хаартыскаҕа түһэр олус үчүгэй буолла.
Манна төрөппүттэр кырачаан оҕолорун кытта илдьэ кэлэллэр эбит.
Эдэр саас, эдэр саас... мэниктээн, күлэн-үөрэн, көччүйэн хаалыахха!
Онтон, бу аҕыйах хонуктааҕыта, 150 солкуобай төлүү-төлүү, күн кыратык киэһэриитэ, Сайсары күөлүгэр баар катокка тахсан олус үчүгэйдик сынньанан кэллибит. Сайсарыбыт хаҥкылыыр сиригэр үксүн устудьуоннар, эдэр ыччаттар сылдьаллар эбит.
Каток олус киэҥ, ортотугар сылаас кафелаах, эмиэ аныгы, тэтимнээх музыкалаах.
"Ким түргэнник каток түгэҕэр тиийэр эбитий?" - диэтибит да, иннибит хоту хаҥкылаан сурулаатыбыт.
Төһө даҕаны хаҥкылыыр олус үчүгэй буолбутун иһин, сэрэхтээх буолуох тустаахпыт. Субу курдук охтон түһүү сыысхаллаах буолан хаалан туруон сөп.
Олус астыык!
Маннык үчүгэй сааскы кылгас күннэри мүччү туппакка элбэхтэ сибиэһэй салгыҥҥа сылдьар ордук.
Өссө даҕаны үүнэр сылларбыт сааскы күннэригэр хаҥкылыы туруохпут. Эдэр саас, бүтүмэ, уһаа!
Суруйда ХИФУ ИТИ ТДО-18 4-с кууруһун устудьуона Марианна Коркина.
Ааптар уонна кини бииргэ үөрэнэр доҕотторо хаартыскаҕа түһэриилэрэ