Киир

Киир

Эрэдээксийэҕэ Амма Бөтүҥүттэн төрүттээх Афанасий Иннокентьевич Сергеев диэн икки хараҕа суох эмчит, олоххо актыыбынай позициялаах ытык кырдьаҕас Бөтүҥҥэ “балыыһабыт сууллаары турар, саҥаны туттарары туруорсабыт”, - диэн тахса сылдьыбыта. Балаһыанньаны билсэн баран “Кыым” муус устар 21 к. нүөмэригэр кини Сулҕаччы-Амма лииньийэтин тутууну уонна балыыһаны тутууну туруорсуутун кытта холбоон биир ыстатыйа оҥорон таһаарбытым.

Ол эрээри, интэриниэккэ балыыһа дьиҥнээх туругун көрдөрөр элбэх хаартыскалары киллэрэр кыалларынан, “Кыым.ру” саайпытыгар Бөтүҥ балыыһатын туһунан туспа ыстатыйа оҥорон таһаарарга быһаардым.

Больница 14

***

А.И. Сергеев СӨ Доруобуйатын харыстабылын министиэристибэтигэр Бөтүҥ сууллаары турар балыыһатын оннугар саҥа балыыһаны түргэнник тутары туруорсубут. Миниистир Л. Афанасьева ыыппыт эппиэтин көрдөххө, Бөтүҥ балыыһатын тутуу, хомойуох иһин, Амма уотун лииньийэтин курдук хаһан быһаарыллара биллибэт дьыала буолбут.

Бөтүҥ балыыһатыгар эрийэн, доруобуйа харыстабылыгар 43 сыл ыстаастаах сиэстэрэ Екатерина Николаевна Ивановалыын кэпсэтэбит. 2014 с. Бөтүҥ балыыһатыгар 1979 с. тутуллубут сопхуос эргэ дьиэтин ортоку хапытаалынай истиэнэтин эрбэтэн, гипсохордуонунан көрүдүөрдээн, балыыһаҕа майгынныыр дьиэ оҥорон биэрбиттэр. Дьиэ алааска уу ааһар сиригэр турар буолан, хапытаалынай истиэнэ быһыллыбытынан, улаханнык хамсаан, 2018-2019 сс. саахалланар, сууллар туруктаах диэн билиммиттэр. Улуустан хамыыһыйа бөҕөтө кэлэн көрбүт. Арай куораттан Доруобуйа харыстабылын министиэристибэтэ кэлэн көрө илик үһү. Хаартыскаларга көрдөххө, сорох сиринэн дьиэ үрдэ субу сууллан түһүөх айылаах.

Больница10

Улуус кылаабынай бырааһын солбуйааччы Д.Н. Васильев Бөтүҥ балыыһатын уустук балаһыанньатын бигэргэтэр. Араас таһымнаах отчуоттарга нэһилиэнньэ, олохтоох былаас саҥа балыыһаны тутууну өрүү туруорсар да, быһаарылла илик эбит.

СӨ Доруобуйа харыстабылын министиэристибэтин 2025 с. диэри былааныгар Абаҕаҕа биир модульнай амбылатыарыйаны туруоруу, Амма бөһүөлэгэр күҥҥэ 200 киһи сылдьар поликлиникатын тутуу, Амма балыыһатын хапытаалынай өрөмүөнэ, 11 массыына бэриллэрэ киирбиттэр.

Больница 11

Бөтүҥ балыыһата сууллар туруктаммытыгар, өссө биир модульнай амбылатыарыйа көрдөөбүттэр. Аммалар Бөтүҥ балыыһата күн сарсын сууллар туруктааҕын иһин биэриэхтэрэ диэн эрэнээхтииллэр да, миниистир эппиэтиттэн көрдөххө, модульнай амбылатыарыйа 2025 с. кэнниттэн туруоруллуон сөп эбит. Ол иһин буолуо, Д.Н. Васильев: “Тыҥааһыны сымнатаары, нэһилиэк иһигэр арыандаҕа дьиэ көрдүүбүт. Сайын хайдах эмэ өрөмүөн ыытан дуу эбэтэр саҥа дьиэ куортамнаан дуу, быһаара сатыахпыт” диир. Бу быстах быһаарыы буолара өйдөнөр. Оттон Бөтүҥ 1300 кэриҥэ киһи олорор улахан бөһүөлэгэ. Сиэстэрэ Е.Н. Иванова түһэрэн ыыппыт хаартыскаларыгар көрөргүт курдук туруктаах Бөтүҥ балыыһатыгар тыһыынчаттан тахса дьоҥҥо үрдүк хаачыстыбалаах мэдиссиинэ көмөто оҥоһуллар диэтэхтэринэ, мин эрэ буолбакка, элбэх киһи саарбахтыа дии саныыбын.

Больница 13

***

Олох уларыйыыта, тупсуута А.И. Сергеев курдук актыыбынай позициялаах дьон элбэҕиттэн тутулуктаах. Омос көрдөххө, кини туруорсубут боппуруостара быһаарыллаллара ыраах курдук да, кини туруорсар Амматын кыһалҕалара билигин хаһыатынан, интэриниэтинэн киэҥ эйгэҕэ тарҕанан, уопсастыбаннай санаа үөскэтэн, норуокка туһалаах гына быһаарыллыахтара диэн эрэнэбит.

Больница 12

Бал 4

Больница2Больница5Больница3Больница4Больница6Больница7Больница8

Владимир Степанов.

Тарҕат:

Санааҕын суруй