Бүгүн, муус устар 22 күнүгэр, күнүс 2 чаастан Дьокуускай куорат тэрилтэлэрэ уонна олохтоохторо үгэс буолбут субуотунньукка таҕыстылар. Мин буоллаҕына, үлэлиир тэрилтэбиттэн чугас эргин турар сирдэри, быһата, куорат киинигэр турар тэрилтэ үлэһиттэрэ субуотунньукка төһө тахсыбыттарын көрө-истэ, хаартыскаҕа түһэрэ таҕыстым.
Дьэ, тахсаат даҕаны, күрдьэх, сиппиир, куул уонна кыраабыл тутуурдаах олус элбэх дьону көрсө түстүм. Ыйыталаһан билбитим - ОДьКХ үлэһиттэрэ эбит.
ОДьКХ ГУП тэрилтэ үлэһиттэрэ бүттүүн субуотунньукка элбэх буолан таҕыспыттар.
Бары иллээхтик, күргүөмүнэн үлэлии, киин куорат уулуссатын ыраастыы туруннулар...
Субу курдук бөх-сах кыра-кыралаан хомулуннаҕына, куораппыт биллэ ырааһырыа турдаҕа.
Куораппыт күөх сирэмин, хатыҥ мастар анныларынааҕы эргэ сэбирдэхтэри ыраастаатылар, онно мунньуллубут бөҕү-саҕы хомуйдулар.
Элбэх буоллахха, үлэ түргэнник бүтэр.
Бөҕү-саҕы барытын куулларга симтилэр.
Ил Түмэн дьиэтигэр кэлбитим - үлэһиттэрэ таһырдьа тахсан, хахха күрүөнү наһаа үчүгэйдик сууйа-сото сылдьаллар эбит.
Ил Түмэн дьиэтин быылын сото сылдьаллар, наһаа маладьыастар!..
Хонтуора кыргыттара хара үлэттэн эмиэ чаҕыйбаттар.
Онтон, 1 нүөмэрдээх Бырабыыталыстыба дьиэтигэр кэлбитим, үлэһиттэр тахсан субу курдук үлэлии-хамныы аҕай сылдьаллар эбит.
Бэчээт дьиэтигэр кэлбитим - үлэһиттэр номнуо үлэ бөҕөтүн көрсөн, бөхтөрүн бу курдук куулларга симэн, өрөһөлүү уурбуттар эбит.
Бэчээт дьиэтин кэрэ аҥаардара чугастааҕы оптуобус тохтобулун сууйа сылдьаллар.
Бэрт сэргэхтик туттан-хаптан, ыраас эйгэ туһугар күүстээх үлэ күөстүү оргуйар.
Кыргыттар олус кыһаллан, ол-бу ойуу, сурук буолан ньамайданан хаалбыт тохтобул эркинин ыраастыыллар, сууйаллар.
Бэчээт дьиэтин эр дьоно мунньуллубут ууну биир сиргэ сүүрдэргэ туруналлар.
Дьиэ анныттан туһата суох буолбут эргэ малы хостоон, бөххө быраҕаллар.
Оттон, 2-с нүөмэрдээх Бырабыыталыстыба дьиэтигэр эргийэн тиийдим. Бириэмэбин үчүгэйдик аттарбакка, тахсыбыт дьону түбэһэн көрбөтүм. Ол эрээри, биир үлэһиттэрэ кыһаллан-мүһэллэн киирэр сири маннык сууйа-сото сылдьарын хаартыскаҕа түһэрдим.
Салгыы, хааман иһэн "Туймаада" ТРК дьиэтигэр баар Буокса Федерациятын уонна Чааһынай охраннай тэрилтэлэр үлэһиттэрэ күргүөмүнэн, бэйэлэрин сирдэрин-уоттарын хомуйа тахсыбыттарын түбэһэ көрдүм.
Тэрилтэлэрин дьиэтигэр сыста сытар газону ыраастаатылар.
Хатыҥ эргэ сэбирдэхтэрин хомуйдулар.
Хаппыт бадараан оннун сиппийдилэр.
Дьэ, бу курдук, эрдэ биллэриллибитинии, тэрилтэлэр субуотунньук күнүн тутуһан, куораты ырааһырдарга үлэ бөҕөтүн үлэлээтилэр. Ол эрээри, маннык көстүү биир күнүнэн түмүктэнэн хаалыа суохтаах, мантан антах тэрилтэлэр субуотунньугу нэдиэлэ ахсын балаҕан ыйын 30 күнүгэр диэри ыытыахтаахтар.
Санатар буоллахха, хайа тэрилтэ ханнык сири ыраастыырын туһунан дьаһалы салалта өссө 2021 сыл от ыйын 7 күнүгэр таһаарбыта.
Ираида Коркина-Чугдаара