ГОРОСКОП. Алтынньы 17-23 күннэрэ

Хой

Күүс-кыах да сөбүгэр баар. Ол эрээри быһымахтык быһыыланарыҥ кэнники элбээбит. Туох буолла да, эн тус көҥүлгэр суудайалларын курдук саныыгын. Cыыһа. Дьону  өйдүү, сымныы сатаа. Оҕоҕун ыган-түүрэн барыма. Бэйэҕиттэн тэйитэр кутталлааххын. Үп-харчы тиийбэт кыһалҕата, тиэхиньикэ, тэрил алдьаныыта-кээһэниитэ да баар буоллаҕына, ыгылыйыма. Марс, Плутон дьайыылара оннук. Сотору уу нуурал олоххут эргиллиэ.

Оҕус

Түргэн-тарҕан быһаарыныыны ирдиир түгэн күөрэйиэн сөп. Өсөһөр, дьирээлэһэр быһыыгын бырах. Хата, хаһаайыстыбаннай үлэни үмүрүтэргэ, дьыаланы-куолуну бэрээдэктииргэ тоҕоостоох кэм кэлбитин туттумахтас.  Партнергар, эйигин тулалыыр дьоҥҥор болҕой: тугу сэргиир, баҕарар эбиттэрий?  Тугунан кинилэргэ көмөлөһүөххүн сөбүй? Дьыалабыай көрсүһүү табыллыыһы. Үтүө сураҕы истиэх курдуккун биитэр үчүгэй билсиһии күүтэр. Айан-сырыы табыллар.

Игирэлэр

Үлэ, түбүк тахсан кэлэ турар курдук. Ол эрээри сиэри таһынан илистибэт, доруобуйаҕар охсубат гына, кээмэйдээн, былааннаан дьаһан. Күүскүн-уоххун  иирсээҥҥэ, ол-бу бытархайга бараама. Харыстан. Айылҕаҕа элбэхтэ сырыт. Тыҥааһыннаах түгэн үөскээтэҕинэ да, сөптөөх быһаарыныыны ылынаргар бэйэ кыаҕар эрэлиҥ көмөлөһүө. Урут дьоҥҥо биллэрбэтэх, көрдөрбөтөх талааныҥ көмөтүнэн үлэҕэр ситиһиилэнэр кыахтааххын. Үпкүн кэмнээн, эрдэттэн былааннаан тутта сатаа.

Араак

Үлэтин, дьарыгын уларытыан, бэйэ кыаҕын-күүһүн холонон көрүөн баҕалаах  Араактарга онно тоҕоостоох түгэн баар буолсу. Ону олоххо булгуччу киллэрэбин диир түгэҥҥэр эрэ ылыс. Саарбахтыыр түгэҥҥэр бириэмэни халтайга ыытыма. Болҕомтолоох буол, ким да иннинэ элбэҕи билэр кыахтааххын. Онтуҥ сыыһа хардыыттан быыһыа. Көргө-нарга, саҥа иэйиини билэргэ тардыһыыҥ күүһүрбүт. Ол эрээри кыраадыстаах утахха чугаһаама.

Хахай

Туох мунньуллубуту барытын уонна хайаан да түргэнник бүтэрэ-оһоро охсуоххун баҕараҕын. Кырдьык, үлэҕэр ситиһиилэнэр, хайаҕытыгар эрэ карьераны да үрдэтэр кыах улахан. Сэҥээрдэр, ымсыырдар этии киирииһи. Элбэх алтыһыы күүтэр. Дьыала-куолу, докумуон толороргор ураты болҕомтолоох буол. “Ыт ыксаан, хараҕа суох оҕону төрөтөр” өс хоһоону умнума. Дьону, тапталлааххын кытта алтыһыы, саҥа билсиһии да бэртээхэй буолсу.

Кыыс 

Хайдахтаах да уустук соругу, үлэни толорор гына бэлэмнээххин. Бу – үөрэнэ сылдьааччыларга эмиэ сыһыаннаах. Көстүбэти да көрөр, аахайыллыа да суоҕу аахайар сатабыл онно туһалыа. Арай дьыалабыай сырыы баҕа хоту ситиһиилэниэ суоҕун эбэтэр түмүгэ күүппүккүнээҕэр арыый хойут кэлиэн сөп. Үп-харчы чааһын быһаарсарга табыгастаах кэм. Өр ыраламмытыҥ туолуох курдук. Арамаантыкалыы сыһыан көстөр, онтуҥ тус олоххор быһаарар оруолланар чинчилээх.

Ыйааһын

Үлэҕитигэр ситиһиилэнэр нэдиэлэҕит. Бэл, бу иннинэ ыарырҕата, уустугурда сылдьыбыттар кытта ат арҕаһыгар буолуох курдуккут. Ый-сулус хаамыыта саҥа эбээһинэһи баһылыыр, үөрэнэр дьүккүөрдээхтэри өйүүр. Дьиҥ кыахтаах өттүгүт солото, дуоһунаһа да улаатан турдаҕына, киһи соһуйбат.  Урукку билсиилэриҥ туһалыыллара улааппыт. Оҕолоргутун кытта уопсай тылы кэбэҕэстик булаҕыт.

Быһата, эһиэхэ үчүгэй нэдиэлэ. 

Скорпион

Ис таайан көрөр дьоҕургутугар болҕойуҥ, оччотугар барытын кэмигэр бүтэрэн-оһорон, ситиһиллибэти да ситиһиэххит, уустугу да туоруоххут. Көмө наада буоллаҕына, кэтэмэҕэйдээбэккэ быһаччы этиҥ. Чуолаан юрист, суут дьыалатынан дьарыктанааччылар табыллыахтара. Үп чааһа да куһаҕана суох. Бу иннинэ ыраахтан истэн эрэ билэр, биһириир дьоҥҥутун кытта билсиһиэх курдуккут. Биллэн турар, үлэ, түбүк эрэ үгүөрү буолан, сылайа быһыытыйбыккыт.

Охчут

Аралдьыйаргыт олус элбэх. Хомунан, сааһыланан быстыбаккыт боччумнаах дьыаланы быһаараргытыгар мэһэйдэһиэ да буоллар, сыыһаны оҥорортон быыһаныаххыт. Онуоха күүс, сатабыл наада. Сылайдыбыт диэн, ыытынан кэбиһимэҥ. Олус наадалааҕы көтүтэн кэбиһиэххитин сөп. Чугаһаабыкка, өйөөбүккэ барытыгар итэҕэйэн иһимэҥ. Бу иннинэ биир тылы була илик ыалларгытын, аймахтаргытын кытта сыһыаҥҥыт биллэ тупсууһу.

Чубуку

Үлэ-хамнас чааһа тупсан, үлэҥ сыаналанан, тупсан сылдьар кэмиҥ. Үчүгэйдэттэххинэ, үп өттүнэн да өйөнөр чинчилээххин. Дьикти көрсүһүү, туһалаах билсиһии күүтэр. Эйигин өйүүр, эйиэхэ дьүөрэ санаалаах дьонуҥ элбииһи. Арай дьону, ол иһигэр чугас киһигин, кытта сыһыан тыҥаан ылыан сөп. Ол дириҥээн, силистэнэн-мутуктанан барбата тус бэйэҕиттэн, эн муударай быһаарыыгыттан тутулуктаах. Дьону өйдүөххэ.

Күрүлгэн

Дьону кытта алтыһарга табыгастаах күн-дьыл  турар. Бэл, уруккута утарар, хадаардаһар да дьон тылгын ылынан соһутуохтарын сөп. Сайдар, үүнэр туһунан санаа. Эрдэттэн былааннаммыт да, соһуччу да  сырыы табыллар кэмэ. Дьиэ түбүгэ-садьыга элбэх, онно эбии туох эмэ өрөмүөннэнэрэ наадата күөрэйэн ылыа да буоллар, улахан сыраҕын, кыаххын ылыа суоҕа. Сынньана түһэр иллэҥ кэм да көстүө. 

Балыктар

Үөрүүлээх түгэн үгүс буолсу. Туох эмэ сонуҥҥа, урут дьарыктанан көрө да иликкэр ылыстаххына, улахан эрэйэ суох быыһы-хайаҕаһы, өйөөччүлэри, өйдөөччүлэри булар кыаҕыҥ лаппа улахан. Үп-харчы чааһа олус үчүгэйэ суох да буоллар, санааҕын ууран сыраластаххына, ону да кыайа тутар кыахтааххын. Олох дуона суохтан чугас дьоҥҥунуун иирсэн, кыыһырсан ылыаххын сөп. Ону туоратар, алы гынар кыахтааххын. Бэйэҥ баҕарыаххын эрэ наада.