Хой
Бу нэдиэлэҕэ эн тугуҥ да табыллыбат. Төһөнөн дьаныһан туран бэйэҥ сыалгын ситиһэ сатыыгын да, барыта төттөрүтэ буолан иһэр курдук. Нэдиэлэ бастакы аҥаарыгар аны дьиэ кэргэниҥ иһигэр өйдөспөт сыһыан үөскүө. Ол барыта эн ньиэрбэҕэр оонньуур да, тугу да көннөрөр кыаҕыҥ суох. Онон, сүрэҕиҥ тугу этэринэн, баар балаһыанньаны кытта эйэлэс эбэтэр киирсэ сатаа. Нэдиэлэ иккис аҥаарыгар уоскуйан, ону барытын анааран көр.
Оҕус
Нэдиэлэ бастакы аҥаарыгар доруобуйаҕын көрүн. Наһаа элбэҕи үлэлээҥҥин, хамсанаҥҥын, аһара сылайбыккын. Сэргэхсийэн, “тиллэн” кэлэр туһугар элбэхтик сытан сынньан, утуй. Нэдиэлэ иккис аҥаарыгар дьэ сэниэлэнэн, хамсанан барыаҥ. Доҕотторгун-атастаргын кытта көрсөн ханна эрэ маассабай тэрээһиҥҥэ, кулуупка баран сынньан, күүлэйдээ. Ол эйиэхэ эргиччи туһалаах буолуо.
Игирэлэр
Бу нэдиэлэҕэ оҕоҕуттан сылтаан кыра долгуйуу баар буолуон сөп. Оҕоҥ эйигин истибэт, тугунан эрэ дьарыктаан сэргэхситиэххин баҕараҕын да, кини онно наадыйбат. Онон, онуоха-маныаха диэри, “иитэр үлэҕин” тохтотон эр. Нэдиэлэ иккис аҥаара быдан сэргэх буолар чинчилээх. Туох барыта кыайтарар, сатанар. Карьера үүнэр, харчыны иэс ылыахха-биэриэххэ сөп. Ол эрээри ыраах айаҥҥа барбатыҥ ордук буолуо.
Араак
Нэдиэлэ бастакы аҥаарыгар дьиэҕэ-уокка элбэх түбүк күүтэр. Дьиэ кэргэн иһигэр өйдөһүспэт сыһыан, адаарыһыы үөскүөн сөп. Дьонноох-сэргэлээх сиргэ сылдьа сатаама, онно тиийдэххинэ уруккуттан абааһы көрсөр киһигин ыы муннугунан көрсүөҕүҥ. Нэдиэлэ иккис аҥаарыгар тулаҥ барыта сырдаан, тупсан кэлиэ, аптарытыатыҥ улаатыа, үөрэх-үлэ барыта “ааһан иһэн” кыайтарар буолуо.
Хахай
Нэдиэлэ бастакы аҥаарыгар хахайдар иммунитеттара мөлтүө, онон бэйэлэрин күүскэ харыстаннахтарына сатанар. Тула ыарыы бөҕө баар. Онуоха эбии, үөрэҕи ылар, саҥаны билэр дьоҕурдара эмиэ намтыа. Нэдиэлэ иккис аҥаарыгар аны дьиэ кэргэҥҥэ, үлэҕэ өйдөспөт сыһыан көбөн кэлиэ. Ону дириҥэппэт туһугар уһуну-киэҥи толкуйдааҥ, уоскуйа сатааҥ. Өрөбүллэри эмтэнэргэ, доруобуйаны көрүнэргэ анааҥ.
Кыыс
Нэдиэлэ иккис аҥаарыгар харчы боппуруоһун көрүн, аһара матайдаама. Бу кэмҥэ тугу да атыыласпатах ордук, ол ылбыт малыҥ тута алдьанар чинчилээх. Сүрэҕиҥ аҥаарын кытта үп-харчы, атыы-тутуу боппуруоһун ырытыһыма. Ол туһата суох иирсээни эрэ собуоттуо. Сүүйсүүлээх оонньууга кыттыма, сүүйтэрэр куттал баар. Ыал Кыыска өрөбүллэр бэрт үчүгэйдик ааһыахтара.
Ыйааһын
Нэдиэлэ бастакы аҥаарыгар дьиэҥ иһигэр күргүөмнээх убуорканы тэрийбэтэҕиҥ ордук. Ол дьиэлээхтэргин кыынньыа, этиһиини күөртүө. Нэдиэлэ иккис аҥаарыгар дьиэ иһинээҕи сыһыан уоскуйуо, урукку чөлүгэр түһүө. Дьэ ол кэмҥэ дьиэҕин салгыы хомуйан бүтэрэн кэбис...
Ыал ыйааһыннар оҕолоргутун илдьэ ханна эрэ баран сынньанан, чэччийэн кэлиҥ. Туһалаах буолуо.
Скорпион
Нэдиэлэ саҕаланыытыгар туора дьоннуун алтыһыыга уустуктар үөскүөхтэрэ. Кимнээх эрэ эн тускунан мөкү сурахтары тарҕаталлар. Уопсайынан, бу – дьону кытта алтыһарга-бодоруһарга табыгаһа суох кэм. Оттон нэдиэлэ иккис аҥаарыгар балаһыанньа төрдүттэн уларыйыа. Туох барыта үөрүү-көтүү аргыстаах табыллан барыа. Онтон бэйэҥ да сөҕүөҥ, соһуйуоҥ.
Охчут
Нэдиэлэ бастакы аҥаарыгар ньиргиэрдээх бырааһынньыктан, көртөн-күүлэйтэн тэйиччи сырыт. Эн харчыҥ онно син биир тиийбэт туруктаах. Иэс ылсарга-бэрсэргэ – уустук кэм. Бу кэмҥэ эн киһи көҥүлүгэр, дьолугар-соргутугар харчы суоҕа күүскэ дьайарын өйдүөҕүҥ. Оннук уустук балаһыанньа нэдиэлэ бүтүүтүн эрэ диэки уларыйыа. Хантан эрэ харчы көстөн олоххун биллэ сэргэхситиэ.
Чубуку
Нэдиэлэ бастакы аҥаарыгар ханнык эрэ аҕа саастаах дьон (үлэҥ салалтата, төрөппүттэриҥ) эн көҥүлгүн күөмчүлүү, үөрэтэ, ыйа-кэрдэ сатаан кыынньыахтара. Онон, бу кэмҥэ улахан эппиэтинэстээх үлэни-хамнаһы тохтотон эр. Нэдиэлэ иккис аҥаарыгар тулалыыр сыһыан барыта ирэн, сымнаан, тупсан барыа. Өрөбүллэргэ култуурунай тэрээһиннэргэ сырыт, бу кэмҥэ сүрэҕиҥ аҥаарын булан ылыаххын сөп.
Күрүлгэн
Нэдиэлэ бастакы аҥаарыгар доруобуйаҥ мөлтөөн, аһааҕыран, көҥүл сылдьар кыаҕыҥ күөмчүлэниэ. Ону-маны оҥоруоххун, кыайыаххын-хотуоххун баҕараҕын да, доруобуйаҕыттан сылтаан, кыаҕыҥ тиийбэт. Бу кэмҥэ суут-сокуон үлэһиттэриттэн ырааҕынан сырыт. Холобур, суол быраабылатын эҥин кэһимэ. Нэдиэлэ иккис аҥаарыгар, ордук өрөбүллэргэ, үп-харчы боппуруоһа лаппа тупсан үөрдэр чинчилээх.
Балыктар
Нэдиэлэ бастакы күннэригэр аһара хамсамматыҥ, успуорт күрэхтэһиитигэр кыттыбатыҥ ордук буолуо. Эчэйиэххин сөп. Уопсайынан да, бытовой тиэхиньикэни талкыйбатыҥ, “астаах-үөллээх” бырааһынньыктарга сылдьыбатыҥ ордук. Оттон нэдиэлэ иккис аҥаара быдан сэргэх буолуо. Тас сэбэрэҕин, дьүһүҥҥүн-бодоҕун, таҥаскын-сапкын уларытан дьону сөхтөрөр, “былааһы ылар” кыахтааххын.
