Хой
Карьераны оҥосторго, үбү харчыны тардарга табыгастаах нэдиэлэ. Күрэстэһии кытаанах буолуо. Ким да кими да аһыммат. Тумуу, сыстыганнаах ыарыы буулуон сөп. Соторутааҕыта аҕай арахсыбыт олоҕуҥ аргыһыттан соһуччу сураҕы истиэҥ. Сэрэдэҕэ саҥарбытыҥ дуораана кэтэххэ биэриэн сөп. Тугу саҥараргын маныыр дьон бааллар.
Оҕус
Байар-тайар кыах улааппыт. Сатыы хаамп, тыыныы гимнастикатын баһылаа. Дьылҕа Хаан биэрэринэн дуоһуйа үөрэн. Докумуона, сонун хайысхатынан кыайыы-хотуу суолунан баран иһэҕин. Эргимтэҕин уларытыаххын наада. Ыраах айаны тохтото түс. Айабын-тутабын диэччилэр күҥҥүт тахсыа. Ис сүрэхтэн кэпсэтии элбэҕи быһаарыа.
Игирэлэр
Былааннаабыккыттан ончу туораама. Үөрэнэн хаалбыт сылаас уйаҕыттан тахсыахтааххын. Өйгөр оҥорон көрөр уһулуччу үчүгэй киһини дьэ көрсүөҥ. Ону өйгүнэн эрэ билиэҥ, сүрэх туһата суох буолуо. Аһара ыксыыргыттан араас кыһалҕа элбиэ.
Араак
Харчы өлөрө сатаан биир кэм өрө мөхсүөҥ. Улахан иэс-күүс баар. Үлэҕэр балаһыанньа тыҥааһыннаах. Таптыыр киһигин кытта айантан, аймахтарыҥ кэлбиттэриттэн үөрүүҥ үксүө. Тус олоххор барыта этэҥҥэ. Бэйэҥ үлэҕэр эбии дохуоттанар кыаҕы туһаммакка сылдьар эбиккин.
Хахай
Сиэр-майгы, олохсуйбут быраабыла диэн баарын ыраахтааҕылыы майгылаах буолан сотору-сотору умнан кэбиһҥҥин улахан кыһалҕаҕа кыпчыйтарыаххын сөп. Эргиэн, менеджмент уонна бэлиитикэ эйгэтигэр ситиһии элбэх. Кыра да харчыны иэс биэримэ. Кистэлэҥи билиэҥ – күн сырдыгын туһугар кырыктаах киирсии саҥа түһүмэҕэр үктэммиккинэн эҕэрдэлиибит.
Кыыс
Төһөнөн элбэҕи билэҕин, соччонон барыларыттан чорбойон иһиэҥ. Кыраныысса таһыгар тахсааччылар сэрэхтээх буолуҥ: уоруу, албын-түөкэй дьону кытта алтыһыы баар. Өрөмүөнү, тутууну кытта ситимнээх үлэ-хамнас табыллыа. Харчыгын кэмчилээ. Ааты-суолу бөҕөргөтөр туһугар хамсаммахтыы түһүөхтээххин.
Ыйааһын
Урукку олоххуттан сураҕы истиэҥ. Алҕаһы көннөрүөҥ. Сүүрэн-көтөн туохха туһалааххын дакаастаа. Ороскуоккун суоттаа-учуоттаа. Табаҕы, арыгын бырах. Сарсыарда сүүрэр буол. Битэмииннэ ис. Өрөйөр-чөрөйөр кэмиҥ сырдык, сайдам санааҕыттан тутулуктаах.
Скорпион
Уопсастыба быраабылата диэн баарын санатыахтара. Күрүө-хаһаа, суут-сокуон баарын умуннаххына, кэмсинэн ытыаҥ. Үп-харчы оонньуутун тохтот. Уруу-аймах сүгэ-балта сүбэтэ туһалыа. Бээтинсэҕэ былыргы тапталыҥ эргиллэбин диэн тиийэн кэлиэ. Оҕоҥ улахан болҕомтоҕо наадыйар.
Охчут
Буурҕа курдук биир кэм ытыйан-ытыйан баран ааһан хаалыа. Тугу да өйдүөҥ суоҕа. Юрист сүбэтэ наада буолуо. Быстах имэҥҥэ ылларыма. Таҕылы ханнарар эрэ туһугар билсиһии содула улахан буолуон сөп. Дьоҥҥо амарах тылы эттэххинэ уон оччонон эргиллиэ. Иэс-күүс хара баһаан – бары көрдүү олороллор.
Чубуку
Ким туох буоларын барытын арыйан биэриэхтэрэ. Баай-дуол, нэһилиэстибэ боппуруоһа кытаанах. Үп, биисинэс дьыалатыгар ыйааһыннаах дьону кытта билсиэҥ. Кыраныысса таһыгар айан баар. Ыал буолуу аана тэлэччи аһыллан турар. Дьиэ кэргэн бырааһынньыгыттан батыныма.
Күрүлгэн
Бэйэҕин харыстан. Хараҥа санааны күөттүүртэн барытыттан аккаастан. Сэниэҕин бытархайга ыытыма. Ыраах айан, доҕоттору кытта көрсүһүү олус үчүгэйдик ааһыахтара. Уруккуттан сөбүлүүр киһигин сибидээнньэҕэ ыҥыр – хайаан да сөбүлэһиэ. Дьиэни-уоту, сири эргинэргэ табыгастаах нэдиэлэ. Кыра бырыһыаҥҥа кирэдьиит ылыаххын сөп.
Балыктар
Элбэҕи да элбэҕи баҕараҕын, иҥсэҥ-оботуҥ сүрдэммит. Сэрэхтээх буол. Элбэҕи ситиспит дьоҥҥуттан атан хаалыма. Аҥаардас балыктар ыал буолар киһигитин көрсүөххүт. Атын сиргэ көһөр, дьиэни-уоту атыылыыр кыһалҕа күөрэйиэ. Ол барыта оҕолоргун кытта ситимнээх буолуо.
