Нэдиэлэтээҕи гороскоп (кулун тутар 18-24 күннэрэ)

Хой

Бириэмэни түргэтэтэ сатаама. Аһара ыксаатаххына, туох да табыллыа суоҕа. Оптуорунньукка аймахтарыҥ эн көмөҕөр наадыйыахтара, хайаан да көмөлөһөөр. Оттон сэрэдэҕэ уонна чэппиэргэ сүрүн болҕомтоҕун үлэҕэр аныаххын наада. Бу нэдиэлэ көхтөөх уонна сытыы-хотуу хойдорго ордук ситиһиилээх буолуо. Атын дьон санаатын наһаа истэ сатаама, бэйэҥ сүрэҕиҥ этэрин итэҕэйэриҥ ордук. Үлэҥ этэҥҥэ буоллаҕына, салалтаттан хайҕал тылларын истиэҥ. Өрөбүллэргэ бириэмэҕин чугас дьоҥҥун кытта атаар, көй салгыҥҥа элбэхтик сырыт.

Оҕус

Үлэҕэр нус-хас буолбуккун. Ол аата үлэ аччаабыт диэн буолбакка, сатабылгын сөптөөхтүк туһанар буолбуккун. Бу курдук бэйэҕэр ирдэбиллээх буол. Иллэҥ бириэмэҕин дьиэ үлэтигэр аныыгын. Дьиҥэр, тус кыаххын сайыннаран эбии куурустарга үөрэнэриҥ буоллар, өссө үчүгэй буолуо этэ. Уопсайынан, карьераҕын оҥосторгор кыах бөҕө баар. Ону сөптөөхтүк туһаныаххын наада. Дьиэ кэргэн сэбиэтигэр турбут боппуруос, эн туһаҕар быһаарыллыаҕа. Онон олох-дьаһах кэминэн эрээри, доруобуйаҕын кытаат. Сорохтор балыыһаҕа көрдөрө барар чинчилээхтэр.

Игирэлэр

Олоххо көхтөөх көрүүҥ ситиһии суолун арыйар. Кэскиллээх толкуйдарыҥ эбии дохуот киллэриэхтэрин сөп. Онон туохтан да куттаммакка үлэлиэххэ эрэ наада. Туох эмэ суолталаах быһаарыныылары ылынар буоллаххына, элбэх киһиэхэ кэпсээмэ. Нэдиэлэ устата үчүгэй настарыанньалаах буолуоҥ. Үлэҕэр кэлии-барыы, билсии-көрсүү, тус олоххор истиҥ сыһыан барыта баар. Оптуорунньук -- маҕаһыынтан суолталаах малы-салы атыылаһаргар табыгастаах күн.

Араак

Эрдэттэн тугу да былааннаама. Үлэҕэр чэппиэргэ уонна бээтинсэҕэ түбүктээх күннэр буолуохтара.Эн бэйэҥ кыаххар итэҕэйэ үөрэниэххин наада эбит. Дьон сүбэтин-аматын иһит, ол эрээри тиһэх быһаарыыны бэйэҥ ылын. Өссө бу күннэргэ тапталлааххын кытта култуурунайдык сынньаныаҥ. Үлэ боппуруоһун өссө таарыйдахха: саҕалаабыккын тиһэҕэр тиэрдэ сатаа. Оччотугар кыайыы өрөгөйүн билиэҥ. Ол эрээри, аһара үлэҕэ охтон чугас дьонуҥ туһунан умнан кэбиһиэххин сөп. Төһө да бириэмэ ыгым буоллар, таптыыр дьоҥҥун билсэ-көрсө сырыт. Дьиэ кэргэн чилиэннэрэ эн болҕомтоҕор наһаа наадыйаллар эбит.

Хахай

Туруоруммут сыалгын ситиһэргэр, бириэмэ бөҕө баар. Онон түгэни мүччү тутумуоххун наада. Эн туох баар ситиһиини барытын хара көлөһүҥҥүнэн ситиһэҕин. Кимиэхэ да үлэни найылаабаккын, мээнэ ытыы-соҥуу, сулана сылдьыбаккын. Дьиҥэр, үлэҕэр араас барыта буолар. Оптуорунньукка аттыгар баар киһини кытта тыл-тылга киирсимиэххитин сөп. Наһаа аахса сатаама, наҕыллык сырыт. Ол оннугар сылайбыт буоллаххытына, сынньанаргыт ордук. Эн үлэҕэр, доҕотторгор улахан аптарытыаттааххын. Нэдиэлэ кутталынан, бу күннэргэ доруобуйаҥ аларыйыан сөп. Онон хас биирдии хардыыгар сэрэхтээх буол. Дохуотуҥ улаатан иһэр, оттон тус олоххор туох да хамсааһын суох буоллаҕына, хомойума. Өрөбүллэргэ саҥа билсии күүтэр.

Кыыс

Таптыыр дьоҥҥор сымнаҕас буол. Сорох ардыгар, кинилэри аһара кириитикэлиир курдуккун. Саамай ситиһиилээх күнүҥ – бээтинсэ. Оттон сэрэдэ ыарахан соҕус буолуоҕа. Бу күннэргэ дьиэҕин-уоккун сууй, үлэлээ. Наадата суох малы-салы, таҥаһы-сабы быраҕан кэбис. Өрөбүллэргэ харчыттан сылтаан дьиэлээхтэргин кытта иирсиэххин сөп. Ол эрээри, бу күннэргэ соһуччу үөрүү-көтүү элбэх. Өссө успуордунан дьарыктанарга, бэйэ бодотун тардынарга табыгастаах күннэр.

Ыйааһын

Нэдиэлэ бастакы аҥаарыгар урукку дьыалаҕын түмүктүүргэ дьулус. Хаалларан кэбиһэр табыллыбат. Чэппиэргэ кэллиэгэлэриҥ өттүлэриттэн, соччо үчүгэйэ суох быһыы-майгы үүнүөн сөп. Сэрэхтээх буол. Эйигин өйдүүр, көмө-тирэх буолар доҕотторуҥ өрүү аттыгар бааллар. Кэлии-барыы наһаа элбэх, хайдах эрэ үлэттэн сылайбыт курдуккун. Харчылаах буоллаххына, маҕаһыыҥҥа, тыйаатырга, киинэҕэ сырыт. Доруобуйаҥ этэҥҥэ.

Скорпион

Бэнидиэнньиккэ дьиэ кэргэҥҥэр болҕомтоҕун уур. Оҕолоргун кытта бириэмэни атаар. Бэйэҥ кыаххын билинэн үлэлээ. Аһара элбэх эбии үлэни ылыма, кэлин доруобуйаҕар охсуулаах буолуоҕа. Маны таһынан, сурахха-садьыкка итэҕэйимэ. Араас үҥсүү-харсыы баар. Эн киэҥ көҕүстээх буолаҥҥын, буола турар уларыйыылары холкутук ылынаҕын. Онон, маладьыаскын. Сулумахтарга интэриэһинэй көрсүһүүлэр, соһуччу үөрүүлэр буолуохтара. Онон кырасыабай көстүүлээхтик, бэйэҕэ эрэллээхтик сырыт.

Охчут

Кэллиэгэлэргэр, доҕотторгор уонна бэйэҥ дьоҥҥор сыһыаҥҥын ырытан көр. Кэнники кэмҥэ эйигиттэн хомойбут киһи элбээбит. Аһара кытаанахтык саҥарталыыгын. Эппиэтинэстэн куота сатаама. Эйиэхэ ким даҕаны кыһалҕаны, тустаах дьыаланы соҕотоҕун быһаартара сатаабат. Ол иһин эппиэтинэһи атын дьоҥҥо сыбыыр үчүгэйэ суох. Бу күннэргэ дьиэҕин уларытар-тэлэритэр баҕа санаа күүһүрбүт. Онон кыра өрөмүөн үлэтин тэрийиэххин сөп. Онтон санааҥ наһаа көтөҕүллүө.

Чубуку

Элбэҕи ситиһиэҥ. Оптуорунньукка сүҥкэн суолталаах бырайыакка илии баттаһыы буолуоҕа. Оттон учуутад чубукулар, төрөппүттэргитин кытта сыһыаҥҥыт тупсуо. Бу курдук хорсуннук, инниҥ хоту айаннаан ис. Бу нэдиэлэҕэ айаннар, командировкалар ситиһиилээх буолуохтара. Атын хампаанньалар салайааччылара эн сатабыллаах исписэлиис буоларгын таба көрөн үлэҕэ ыҥырыахтарын сөп. Хаһааҥҥытааҕар да тупсубуккун. Эйигин хараҕынан хайҕыы көрөр киһи элбээбит.

Күрүлгэн

Билиҥҥи дьарыккар өйгүн-санааҕын уур. Биир дьыаланы хаачыстыбалаахтык толорор быдан ордук. Оптуорунньукка туохха да ыксаама. Өрөбүллэргэ кимтэн да иэс ылыма уонна биэримэ. Дьиэлээхтэриҥ баҕа санааларын учуоттаа, кинилэр тустарыгар сыраҕын-сылбаҕын бараа. Үлэ элбэх, ханна да куотуо суоҕа. Саамай сүрүнэ, дьыалаҕа-куолуга болҕомтолоох буол. Үп-харчы өттүгэр ыарахаттар бааллар гынан баран, таһаарыылаахтык үлэлээтэххинэ эбии дохуот баар буолуо.

Балыктар

Эйигин соһуччу уоппускаҕа эбэтэр командировкаҕа ыытыахтарын сөп. Үлэҕэр бэйэҥ кыаххар эрэн. Эйиэхэ ким да көмө-тирэх буолуо суоҕа. Саҥа дьыаланы ылсартан, саҥа дьоннуун билсэртэн куттаныма. Киирэн-тахсан ис. Өрөбүллэргэ бириэмэҕин доҕотторгор анаа. Эйигин араас эйгэ ситиһиилээх дьоно тулалыыллар. Кинилэри кытта алтыһаргын наһаа сөбүлүүгүн. Таптал да чааһыгар табыллыы баар. Харчы баар, ыһа-тоҕо туттума. Төбөҥ ыалдьар буоллаҕына, элбэхтик салгыҥҥа сырыт, ааһыа.