Хой
Бу нэдиэлэҕэ үгүс хойдор дьон туһугар туох эрэ суолталааҕы оҥоруохтара. Ол саҥа үлэҕэ киирбит кэллиэгэҕэ эбэтэр биэнсийэлээх кырдьаҕаска, чугас аймахха көмөлөһүөҕэ. Үтүө дьыаланы оҥордоххуна санааҥ чэпчиэ. Үпкэ-харчыга, үлэҕэ табыллыаҥ. Иэйии чааһыгар бэйэни буруйданыы баар. Тапаллааххын эбэтэр сүрэҕин аҥаарынан ааттыаххын баҕарар киһигин кытта өйдөспөккө, санааҥ түһүө.
Оҕус
Бу нэдиэлэҕэ барыта табыллыаҕа. Бэйэҕин профессионал быһыытынан көрдөрөр бириэмэ тосхойбут. Үлэ көрдөөччүлэр табыгастаах үлэни булуоххут. Эдэр оҕустарга үөрэх сыла ситиһиилээхтик саҕаланыаҕа. Сынньалаҥ кэмигэр түүҥҥү кулуупка сылдьыма, арыгыттан, табахтан аккаастан. Хаарты оонньуутугар киирэн биэримэ. Кыах баар буоллаҕына, өрөбүллэргэ айылҕаҕа сырыт.
Игирэлэр
Олорон хаалаары гыммыккын. Ордук үлэҕэ. Маныаха туох эрэ оруннааҕы эрэннэрбит киһиҥ түһэн бириэҕэ. Ол онтон олус санаарҕаама. Күүскэр-уоххар ордук эрэнэриҥ буоллар бэрт буолуо этэ. Бу күннэргэ сатыыр дьыалаҕынан эрэ дьарыктан, ол ситиһиилээх буолуоҕа. Холобур, дьиэ өрөмүөнэ, суйуу-тарааһын, хомунуу. Интэриэһинэй дьарыктаахтар, чугас дьоҥҥут сүбэлэрин истиҥ, бэйэ дьыалатын тэриниэххэ сөп.
Араак
Харчы чааһыгар сэрэхтээх буол. Барыстаах этии киирдэҕинэ үчүгэйдик толкуйдан. Дьыалаҥ икки өрүттээх буолуон сөп. Харчы чааһыгар иҥсэримэ, дьону албыннаама. Маны таһынан дьиэ-уоту тупсарыыга, оҕону-урууну иитиигэ, саҥа билсиини-көрсүүнү олохтуурга интэриэскин күүһүрдүөххүн наада. Аҕа саастаах араактар балыыһаҕа доруобуйаларын көрдөрүнэллэрэ уолдьаспыт.
Хахай
Баҕа санаа туолара кыра хаалбыт. Харчыны кытары сибээһэ суох ыра санаа туолар чинчилээх. Бу нэдиэлэ тапталга билинэргэ, имиджы уларытарга, наадата суох малы-салы бөххө быраҕарга ордук табыгастаах. Уруккуттан сөбүлүү көрөр киһигэр тапталга билинэргин умнума. Бэйэ бодотун тардыныынан, дьүһүҥҥүн тупсарыынан аһара үлүһүйүмэ. Тас көрүҥҥүн буортулаама.
Кыыс
Бэйэҕэр бириэмэ аныырыгын умнума. Наһаа элбэҕи үлэлиигин, күнү супту сүүрэн-көтөн тахсаҕын. Ол доруобуйаҕа олус охсуулаах. Түүн үчүгэйдик утуйбат буолуоххар диэри түбүгүрэр эбиккин. Эн үчүгэй ис хоһоонноох литэрэтиирэни ааҕан санааҕын чэпчэтиэххин наада. Өр кэмнээх айаҥҥа турунартан, кирэдьииккэ киирэртэн, үчүгэйдик билбэт дьоҥҥун кытта алтыһартан туттун. Өрөбүллэргэ урукку олоххуттан “дорообо” тутуоҕуҥ. Бу кэпсэтии хайдах буолара эйигиттэн тутулуктаах.
Ыйааһын
Сыалгын-соруккун ситиһэргэ табыгастаах кэм. Мал-сал атыылаһарга табыллыаҕыҥ. Дьиэҕэр саҥа миэбэли, малы-салы атыылаһан санааҕын чэпчэт. Харчыламмыт боллаххына, иэскин-күүскүн төлөһө сатаа. Кэргэниҥ доруобуйата мөлтүөн сөп. Онно эн дьайыыҥ наада. Аҕа саастаахтар уруккуну-хойуккунун санаан култуурнайдык сынньаныахтара, барыахтара-кэлиэхтэрэ.
Скорпион
Наһаа сытыытык, туокката суох тыллаһар дьону кытта аахсыма. Уопсайынан, үлэҕин толоро сылдьан аралдьыйыма. Инники бэлэмҥин ыһа-тоҕо кимиэхэ да кэпсээмэ, туолуо суоҕа. Эн тускунан соччото суох сураҕы-садьыгы тарҕатааччылар бааллар. Доҕор диэн ааттыыр дьонуҥ чиэһинэйэ суохтук быһыыланыахтара. Таптал чааһыгар ким да сүбэтин истимэ, сүрэх тугу этэринэн сылдьар орук. Баары – баарынан, суоҕу – суоҕунан.
Охчут
Карьера чааһыгар өрө көтүү суох. Чугаһынан оннук түгэн тосхойоро да биллибэт курдук. Ол оннугар үлэҥ-хамнаһыҥ дьыалата ситиһиилэнэр чинчилээх. Дьиэ тутуута, дьиэ өрөмүөнэ күүрүүлээхтик бара турар. Үлэҕэр бэрэбиэркэ буолуоҕа. Онно бэйэ бодоҕун тардына сылдьыаххын наада. Өрөбүллэргэ күүскэ түбүгүрүмэ, чугас киһигин кытта бириэмэни атаарар ордук үчүгэй. Успуордунан дьарыктан, сибиэһэй аһынан аһаа.
Чубуку
Үүнэр нэдиэлэ түмүгүттэн астыныаххыт. Ким эрэ үлэҕэ табыллыа, ким эрэ – тус олоххо. Сулумах чубукулар сөбүлүүр киһигит туһунан үчүгэйэ суох сураҕы дьонтон истиэххит. Ол гынан баран тугун-ханныгын билбэккэ олорон итэҕэйэргэ тиэтэйимэҥ. Оттон ыаллар кэргэҥҥитин солуута суох күнүүлээмэҥ, тыллаһымаҥ. Өрөбүллэргэ соһуччу үөрүү күүтэр. Саамай сүрүнэ уугутун хана, үчүгэйдик утуйа сылдьыҥ.
Күрүлгэн
Дэлби сүрэҕэлдьээбиккин. Сэниэтэ суоҕуҥ аһыыр аскын кытары ыкса ситимнээх. Куһаҕаннык аһыы сылдьаҕын. Гаастаах утахтан, чипсыттан, халбаһыттан, о.д.а. аккаастан. Дьон куһаҕан эрэ өрүтүн буолбакка, үчүгэйин көрөгө эмиэ үөрэн. Тулалыыр дьоҥҥун кэннилэриттэн саҥарыма. Саалаҕа сылдьар кыах суох буоллаҕына, элбэхтик сатыы хаам, салгыҥҥа сырыт. Суолга-иискэ болҕомтолоох буол.
Балыктар
Киһи төбөтүгэр баппат, сидьиҥ быһыыны илэ хараххытынан көрүөххүт. Бу түгэн кэннэ олоххо сыһыаҥҥыт уларыйыаҕа. Ол уопсастыбаннай сиргэ этиһии, айдаарсыы буолуон сөп. Интэриниэт ситиминэн үлүһүйүмэ, наадата суох иһитиннэриилэринэн мэйиигин толорума. Өрөбүллэргэ ас астаан дьоҥҥун үөрдүөххүн, пуобар быһыытынан бэйэҕэ эрэлгин улаатыннарыаххын сөп. Наһаа минньигэстик астыыгын!
