Хой
Бу күннэргэ олус холус туттуулааххын, сыаналаах малы-салы алдьатыаххын сөп. Үлэттэн ордуоҥ суоҕа, баһылыыр-көһүлүүр оруолу ылыаҥ. “Сүрэх” дьыалатыгар эппиэтинэстээх хардыыны оҥордоххуна, интэриэһинэй саҕахтар арыллыахтара. Саҥаны билэ-көрө сатааччыларга, үөрэнээччилэргэ кыайыылаах-хотуулаах күннэр. Дьиэлээхтэргэр аптарытыатыҥ үрдүөн наада, кытаатан сыыһа-халты туттума, кими да албыннаама.
Оҕус
Үп-харчы боппуруоһа тахсыылаахтык быһаарыллыаҕа. Үлэҕэ эппиэтинэстээх сыһыаныҥ, профессионал быһыытынан билииҥ-көрүүҥ ситиһииҥ төрдө буолуоҕа. Эдэрдэр үөрэххэ түһүнэн кэбиһиҥ. Маныаха, сулумахтар, ыксыыр-тиэтэйэр курдуккут. Бэйэни албыннанымаҥ, бириэмэни ыксатымаҥ. Барыта бэйэтин кэмигэр буолуоҕа. Бу күннэргэ доҕотторгутун кытары аһара бодоруспаккыт наада. Бэйэ-бэйэни уган биэрии буолуон сөп. Халыҥнык таҥна сырыт, тобук ыарыытын бэргэтимэ.
Игирэлэр
Сыралаах нэдиэлэ күүтэр. Үлэҕин кириитикэлээччилэр көстүөхтэрэ. Онно кыһаллыбакка, эмоцияҕын туттуна сырыт. Маҕаһыынтан мал-сал атыылаһарга, таҥас-сап кэккэтин хаҥатарга табыгастаах бириэмэ. Саҥа билсиһии-көрсүһүү элбэх. Таптал чааһыгар ордук кэрэ аҥаардар табыллыахтара. Ыаллар, аһаҕастык кэпсэтэн, кыһалҕаны бииргэ быһаарыҥ. Оччотугар сыһыаҥҥа саҥа үктэлгэ тахсыаххыт. Иллэҥ кэмҥитин туһулаахтык атаарыҥ, дьиэҕэ бүк түһэн сытымаҥ.
Араак
“Сүгэ кыайбатаҕын, сүбэ кыайар” диэн мээнэҕэ эппэттэр. Аҕа саастаах дьон сүбэтин-аматын болҕойон иһит. Үлэттэн сылайбыккын, олус элбэх эбээһинэһи ылыныма. Тымыр ыарыытыттан сэрэхтээх буол. Ыаллар, тапталы бөҕөргөтөргө турунуоххутун наада. Сыһыаҥҥа саҥа хардыыны оҥордоххунуа, ситиһии күүтэр. Уруккуттан ыра оҥостубут тэрээһиҥҥэр сылдьаргар, бараргар-кэлэргэр кыах көстүүһү.
Хахай
Эйигиттэн биир олус өһүргэс киһи арахпат. Кини санаатын табаары, күннэтэ кыһаллаҕын-мүһэллэҕин. Өйдөспөт түгэн үөскээтэҕинэ, санааҕын түһэримэ, син биир өйдөһүөххүт. Начаалынньыккын кытта уопсай тыл булан, олус таһаарыылаахтык үэлии-хамсыы сылдьаҕын. Дьиэ кэргэн бүддьүөтүн хаҥатарга үчүгэй кэм. Уопсайынан, үлэ уонна тус олох чааһыгар баартаах түгэн үүммүт. Онон түгэни мүччү тутума. Өрөбүллэри сэргэтик атаар, күннээҕи аһылыккар болҕомто ууруоххун наада.
Кыыс
Саҥа дьыллааҕы аптаах-алыптаах түгэн тосхойор күннэрэ. Таптал чааһыгар 100% табыллыы баар. Булчуттары Байанайдара үөрдэр гына “мичик” гыныаҕа. Кыыс бэлиэлээх эр дьон бу нэдиэлэҕэ ситиһиилэрэ үгүс буолуоҕа. Нэдиэлэ иккис аҥаарыгар дьыалаҕа-куолуга илии баттыыргытыгар болҕомтолоох буолуҥ. Кырачаан дьоҥҥун кытта киинэҕэ, тыйаатырга, маҕаһыыҥҥа сылдьан ороскуокка киириэххин сөп. Онон харчыгын ыһа-тоҕо туттума диэн сулустар сүбэлииллэр.
Ыйааһын
Үлэ, түбүк-садьык бөҕө. Бириэмэ туохха да тиийбэт үлүгэрэ буолбут. Айар куттаах Ыйааһыннар, түүн утуйбат буолбуккут. Өрүү тугу эрэ толкуйдуу, айа-тута сылдьаҕыт. Бу күннэри үлэ үөһүгэр атаардаххына, хармааныҥ халыҥыыһы. Өссө уопсастыбннай үлэ эмиэ баар буолуоҕа. Улахан кыһалҕа суох. Арай кэллиэглэргин, доҕотторгун кытары киҥир-хаҥыр кэпсэтиилэр буолуохтара. Ыаллар, дьиэ кэргэн интэриэһигэр болҕомтону уураргыт наада.
Скорпион
Саамай ыарахан сыалы-соругу ситиһэргэ туох да мэһэй үөскүө суоҕа. Быыс-арыт булан, чугас дьоҥҥун кытта алтыһа, бииргэ буола сырыт. Аҕа саастаахтар кистэлэҥ талааннарын арыйыахтарын сөп. Успуордунан дьарыктанарга, саҥа киинэ көрөргө, кинигэ ааҕарга, о.д.а. бэйэни сайыннарарга табыгастаах кэмнэр. Доруобуйа чааһыгар долгуйума, барыта этэҥҥэ буолуоҕа. Саамай сүрүнэ, санааҕа-онооҕо ылларыма, куһаҕаны санаама.
Охчут
Бириэмэни ыксатыма. Бииргэ үлэлиир кэллиэгэлэргэр сыһыаҥҥын уларытыаххын наада. Наһаа элбэхтик кыыһырар-тымтар буолбуккун. Бу күннэргэ дьиэҕэр туох эр кыһалҕа үөскүөҕэ. Холобур, чугас киһигин кытта улаханнык иирсии. Бу түгэҥҥэ тулуурдаах, дьулуурдаах буолуоххун наада. Элбэҕи үлэлиир, кэлэр-барар дьон карьералара тупсуоҕа. Саҥа толкуйгут, идиэйэлэргит ыһылла сылдьаллар.
Чубуку
Чугас доҕотторгун кытта олус дьыалабыайдык кэпсэтэр буолбуккун. Арааһа, дуоһунаһын үрдээн буолуо. Наар бэйэҕэр эрэ барыстаах өттүн толкуйдуугун. Онон хас биирдии хардыыгын чуумпуга олорон ырытан көр. Ол да буоллар үлэ нэдиэлэтэ ситиһиилээх буолуоҕа. Чугас дьонуҥ доруобуйаларын ыйыталаһа, билэ-көрө сырыт. Тапталлааххын кытары наһаа аһаҕастык кэпсэтэн, кыһалҕаны дириҥэтэ сатаама. Ааспыт да аастаҕа, кини урукку олоҕун ырытыма. Күнүүлэһии баар.
Күрүлгэн
Уруккуттан сөбүлүү көрөр киһиҥ хараҕар хатаммыккын. Киниттэн соһуччу бэлэх тутутуоҥ. Үлэҕэр эбээһинэскин үөрэ-көтө толоро сылдьаҕын. Төрөппүт буоллаххына, оҕону иитиигэ ылсыаххын наада. Оҕоҥ кэккэ кыһалҕалаах, аһаҕастык кэпсэт. Доруобуйа халбаҥныыр, күннээҕи аһылыккын көрүнэ сырыт. Өрөбүллэри дьиэ кэргэҥҥин кытары атаар. Дьиэҕэ бүк түһэн сыппакка, култуурунайдык сынньанаргыт буоллар.
Балыктар
Ылсыбыт дьыалаҕынтиһэҕэр тиэрдэргэр ситиһиилээх күннэр. Онон үлэ таһаарыылаах. Уһун айаҥҥа турунааччыларга алгыстаах айаны. Саҥа сылтан дуоһунаһыҥ үрдүүр сибикилээх. Үчүгэй хамнастаах үлэ көстүбүт. Сулумахтар, киирэн-тахсан иһиҥ. Сорох ардыгар бастакы хардыыны бэйэҕит да оҥороргут наада. Оттон, ыаллар, хас өйдөспөт түгэн буоллаҕын аайы “мин бу киһини таптыыбын дуо?” диэн саныыр буолбуккут... Кэлиҥҥинэн хараххыт биллэ мөлтөөбүт, бырааска көрдөрөр кэм уолдьаспыт.