ГОРОСКОП. Ыам ыйын 2-8 күннэрэ

Хой

Бу нэдиэлэҕэ аһара долгуйбуккун, өрүкүйбүккүн туттуна сатыаххын наада. Ону кыайдаххына, бэрт элбэх, ордук-хос кыһалҕалартан быыһаныаҕыҥ. Үлэҕэр салалтаҕын кытта үчүгэй сыһыаны олохтууруҥ – кэнэҕэски үүнүүҥ-сайдыыҥ бигэ мэктиэтэ. Үлэҥ, идэҥ таһымын үрдэтэргэ, саҥаны билэргэ-көрөргө табыгастаах нэдиэлэ. Ол эрээри, үлэҕин уларытарга тиэтэйимэ.

Табыллар күнүҥ – 2, табыллыбат – 3.

Оҕус

Нэдиэлэ бастакы аҥаарыгар кыра тыҥааһын, долгуйуу баар эрээри, чэппиэртэн саҕалаан ол барыта сүтүө, холкутуйуоҥ. Саҥа дьону кытта билсэргэ, билиини хаҥатарга үчүгэй кэм. Бэйэҥ санааҕын, көрүүгүн туруулас эрээри, иирсээҥҥэ киирэн биэримэ. Кыра боппуруоһу күүркэтэн улахаҥҥа кубулутума. Сүрэхтэрин аҥаарын көрдүү сылдьар оҕустары ситиһии күүтэр.

Табыллар күннэр – 2, 6, табыллыбат – 8.

Игирэлэр

Бу нэдиэлэҕэ өр кэм устата турууласпыт, эрэммит-итэҕэйбит ыра санааҕын толоруоххун сөп. Бу – быһаарыныылаах, күүстээх дьайыылары эрэйэр нэдиэлэ. Үлэҥ төһө да элбэҕин иһин, бэйэҥ дьиэҕин-уоккун умнума. Бээтинсэ – табыллыы күнэ, таптыыр киһиҥ үлэтигэр-хамнаһыгар үрдүк ситиһиитинэн үөрдүө.

Табыллар күннэр – 5, 6, табыллыбат – 4.

Араак

Өр аалан сордуу-муҥнуу сылдьыбыт кыһалҕа сүтүө. Нэдиэлэ икки бастакы күнүгэр сынньанар кыах үөскүө. Сэрэдэҕэ туох эрэ саҥа, сонун дьыалаҕа ылсыс. Сүрүн болҕомтоҕун ол дьыалаҥ үпкэ-харчыга дьайыытыгар уур. “Баай” нэдиэлэ күүтэр: командировка, аймахтардыын иирсээн, таптал, ураты истиҥ уонна айар иэйии...

Табыллар күннэр – 4, 8, табыллыбат – 6.

Хахай

Сүрэх баҕарарын сүһүөх уйуо суоҕун сөп. Санааҕар, атын дьон бары эйигин босхо туһана сатыыллар. Дьиҥинэн, оннук буолбатах. Онтон сылтаан иирсээни күөртүүр наадата суох. Бэйэҥ кыайар-сатыыр дьыалаҕар ылсарыҥ ордук буолуо. Кыраттан да үөрэр төрүөтү бул. Элбэххэ үөрэнэ сатаа, ол иһигэр, өстөөхтөргүттэн эмиэ. Сүрэҕиҥ тугу этэрин иһит.

Табыллар күннэр – 6, 7, табыллыбат – 8.

Кыыс

Салалтаны кытта үтүө сыһыаны олохтуурга үчүгэй кэм. Санаабытыҥ барыта сатанан, табыллан иһиэ. Олохтон дуоһуйууну ыл, үөр-көт эрээри, харчыны аһара матайдаама. Урукку-хойукку хом санааны умнан кэбис, сарсыҥҥы кэскили анаар. Сүрэҕи долгутар көрсүһүү-билсиһии баар буолуон сөп. Өрөбүллэргэ дьиэлээхтэргин кытта сыһыаҥҥын өссө тупсар.

Табыллар күннэр – 6, 8, табыллыбат – 3.

Ыйааһын

Сынньанар үчүгэй эрээри, наһаа элбэх үлэ мунньуллубут. Онон, күүскүн-уоххун, өйгүн-санааҕын барытын түмэн баран түһүнэн кэбис! Эн ситиһиигэр мэһэйдиир туох да суох, барыта кыайтарыа. Дьон барыта эйигин өйүүр, биһириир. Ол эрээри бэйэҥ саарбах дьону кытта билсэ сатаама, харчыны мээнэ ыһыма-тоҕума.

Табыллар күн – 6, табыллыбат – 8.

Скорпион

Тугу эрэ чинчийэргэ-үөрэтэргэ үчүгэй нэдиэлэ. Ыра санаа, былаан барыта олоххо киирэн иһиэ. Эбии дохуот киириэн баҕарар буоллаххына, күүскэ хамсаныаххын наада. Оччоҕуна урут кыайтарбакка сылдьыбыт боппуруостаргын кытта быһаарыаҥ. Бэйэҕэр эрэллээх буоллуҥ, туохтан да куттамматыҥ да, саҥа кыах, сайдар суол бөҕө арылла түһүө.

Табыллар күннэр – 3, 6, табыллыбат – 8.

Охчут

Араас түбүк-садьык, бытархай кыһалҕа быһаарыытыгар тиритэ-хорута сүүрүөҥ. Ол сылдьан ааккын-суолгун, аптарытыаккын түһэн биэрбэтиҥ наада. Бэйэҥ ис кыаххын туһан (ол “ис кыаҕыҥ” тугун бэйэҥ бэркэ билэҕин). Оччоҕуна, боппуруос да быһаарыллыа, харчы да көстүө. Баскыһыанньаҕа улахан болҕомто үөһүгэр киириэҕиҥ, аптарытыаты “кууһунан” хомуйуоҕуҥ.

Табыллар күннэр – 5, 6, табыллыбат – 4.

Чубуку

“Тыал хайа диэкиттэн үрэрин” өйдүү охсон, ол биэрэр үтүө кыаҕын толору туһан. Сиэрдээх уонна чиэһинэй буоллаххына, ааккын-суолгун ким да алдьатыа суоҕа. Сэрэдэҕэ күҥҥүн үчүгэйдик былааннаан баран, мустубут боппуруостары быһааран кэбис. Нэдиэлэ бүтүүтүн диэки дьыалабыай сыһыан тупсан, соһуччу харчы кэлиэн сөп. Бу нэдиэлэҕэ тосхойор саҥа кыахтартан батыныма, ылсан ис.

Табыллар күннэр – 4, 8, табыллыбат – 6.

Күрүлгэн

Төһө да араас түбүк элбэҕин иһин, саҥа дьону кытта билсэртэн батыныма. Бу нэдиэлэҕэ билсибит дьоҥҥуттан ылбыт билииҥ-көрүүҥ кэлин олус улаханнык туһалыа. Билиҥҥи ыра санааҥ барыта ыраах айаны, нуһараҥ сынньалаҥы кытта сибээстээх буолуо. Дьыала-куолу, биисинэс туһунан уһуну-киэҥи толкуйдаама. Туохха барытыгар кэргэниҥ бигэ тирэх, көмө буолуо.

Табыллар күннэр – 4, 6, 7, табыллыбат – 8.

Балыктар

Интэриэһинэй идиэйэлээх, саҥа толкуйдаах буоллаххына, ол олоҕу кытта быһаччы сыһыаннаах, туһалаах буолара наада. Ону салалтаҕар үчүгэйдик өйдөөн-дьүүллээн тиэрт. Дьыалабыай кумааҕыга болҕомтолоох буол, алҕаһыаххын сөп. Үлэни-хамнаһы барытын бигэ хонтуруолга илдьэ сырыт. Ыраах айаҥҥа бардаххына, уустуктары көрсүөххүн сөп.

Табыллар күннэр – 2, 5, табыллыбат – 4.